Joab Absalón ome pedeeda
14
1 Sarvia warra Joabpa k'awaji rey David audú k'îsia nâbada ichi warra Absalón pari. 2 Mapa Tecoa p'uurudepema wêra ik'awaa bada t'â pëiji. Joabpa irumaa mãgaji:—Seewata nãga óoji. Chi–ùadak'ãri p'aru jâpata jâ béeji mãik'aapa k'era p'urunaáji p'êtrãapa ooparik'a taarã chi–ùak'ãri. 3 Maap'eda reymaa wåji mãik'aapa mùa jarateeruk'a jarapáde aji.
T'êepai Joabpa pedee jaraji ma wêrapa mãga jaranamerã.
4 Maap'eda ma Tecoadepema wêra reymaa wãji. Rey k'îrapite panak'ãri, bedabaidachi ichi tau bùùrù te jãde t'õbairumaa, mãgá ak'ùpiit'ee ichia rey waawee bù. Mãpai mãgaji:
—¡Rey Waibùa, mù chupùria k'awaapáde! aji.
5 Mãpai reypa iidiji:
—¿Sãga nâbùma? aji.
Irua p'anauji:
—Mù p'êtrãapù. Mù chupùria k'ùrù. Mù ùmùk'îra piujida aji. 6 Mùchi Rey Waibùa, mù, pù mimiaparipa warrarã omeepai iru bajida aji. Ãra mêe nidade chõodachida. Mama eperã apida wê–e pada perã mãga oopinaadamerã, abaapa chi âpema peet'aaji. 7 Ârá mù ëreerã jõmaarãpa mù, pù mimiapari, k'îra unuamaa iru p'anù mãik'aapa ãrapa k'inia p'anù mùa mù warra ãramaa teemerã, peet'aadait'ee perã irua ichi âpema peeda k'aurepa. Mamîda mùa mãga ooru pùrã, warra apida wêe beeit'ee mù k'aripamerã mãik'aapa mù ùmùk'îrapa net'aa atabëida jâamerã. Ma awara Israel eujãde mù ùmùk'îra t'â waa k'irãpada–e pait'eeda aji.
8 Mãpai reypa ma wêramaa mãgaji:
—Pùchi temaa wãpáde aji. Mùa mù ek'ari p'anùùrãmaa jarait'eeda aji, pù k'aripadamerã.
9 Ma Tecoadepema wêrapa p'anauji:
—Rey Waibùa, iididak'ãri sãap'eda mù warra ome ooda–e paji Tachi Ak'õre leyde jara bùk'a, mù k'aurepa adaipia bù maa–e pùrã mù ak'õre tedepemaarã k'aurepa. Mùchi rey, pù k'aurepa adaik'araa bùda aji.
10 Mãpai reypa p'anauji:
—Apidaapa pù ùmùateeru pùrã, mùmaa anéeji. Mãgá pù waa joreeda–e pait'eeda aji.
11 Mamîda ma wêrapa mãgaji:
—Rey Waibùa, mù chupùria k'awaapáde aji. ¡Iidíji pùchi Ak'õre Waibùa, Tachi Ak'õremaa mù ëreerãdepema, chi mù warra pee k'inia bùpa irua k'achia ooda pari, mãga oonaamerã mù warra ome!
Mãpai reypa mãgaji:
—Tachi Ak'õre ichita chok'ai bù k'îrapite mùa juraa bù: ¡pù warra porodeepa puda k'ãu apida baai–e pait'ee!
12 Mãpai ma wêrapa mãgaji:
—Rey Waibùa, mù pù mimiapari. Mù chupùria k'awáaji mãik'aapa mùmaa pedee awaraa jarapíji.
Reypa mãgaji:
—Pedeepáde aji.
13 Mãpai ma wêrapa iidiji:
—Rey Waibùa, mù ëreerãpa mùmaa oo k'inia p'anùk'a, mãga pùk'a pùa oomaa bù Tachi Ak'õre p'uuru pidaarãmaa. Ãrapa mù warra pee k'inia p'anù apida beenaamerã chi ak'õre net'aa jâait'ee. Mãga pùk'a pùata pù warra chepi–e irua pù mimiade beemerã mãik'aapa israelitaarã ak'ùpariimerã. Pù k'aurépata mãga p'asa–e pait'ee. 14 Tachi jõmaweda piudait'ee. Pania eujã ârù weedaik'ãri, p'oyaa waa joi atadak'aa. Tachi Ak'õrepa piudap'edaarã chok'aipi–e bù mîda, reypa ichi warra t'ùmùùpa chepii. 15 Rey Waibùa, mùa pùmaa ma pedee jara cheji eperãarãpa mù p'erapidap'edaa perã. Maperã mù, pù mimiapari pù ome pedee cheji, pùa ooi jîak'aapa mùa iidi bùk'a. 16 Rey Waibùa, pùa mù pedee ûriru pùrã, mù, mù warra ome k'aripai tai pee k'inia bù juadeepa, ma eperãpa tai uchiapi k'inia bairã Tachi Ak'õrepa teeda eujãdeepa. 17 Rey Waibùa, mù, pù mimiaparipa k'îsiaji pùa pedee jara bù k'aurepa mù k'ãiwee beeit'ee, pùa k'awa bairã k'ãare ne–inaata pia bù mãik'aapa k'ãare ne–inaata k'achia bù, ùt'aripema angelpa k'awaparik'a. ¡Mùa k'inia bù Tachi Ak'õre, pù Ak'õre Waibùapa pù k'aripamerã!
18 Mãpai reypa ma wêramaa mãgaji:
—Mùa pùmaa ne–inaa iidiit'eeda aji. K'inia bùda aji, pùa wãarata jaramerã.
Ma wêrapa p'anauji:
—Rey Waibùa, pedeepáde aji.
19 Mãpai reypa iidiji:
—¿Joábpata pùmaa na nepùra jarapiji–ek'ã? aji.
Wêrapa p'anauji:
—Rey Waibùa, pù k'îrapite mùa juraa bù pùa jara bù wãarada aji. Wãara pù jua ek'ari mimiapari Joabpa mù namaa pëiji. Iruata mù, pù mimiaparimaa, jarapiji jõmaweda mùa pùmaa et'ewa jarada. 20 Irua mãga ooji pù k'îsia awara atamerã pù warra ome. Rey Waibùa, wãara pù ùt'aripema angelk'a bù, pùa k'awa bairã ne–inaa jõma na eujãde p'asapari.
21 Ma t'êepai rey Davidpa Joab t'â atap'eda, mãgaji:
—Pùa k'inia bùk'a ooit'eeda aji. K'ûtrãa Absalón atanapáde aji.
22 Joabpa mãga ûrik'ãri, rey k'îrapite bedabaidachi tau bùùrù te jãde t'õbairumaa. Mãga ooji ak'ùpiit'ee rey waawee bù. Mãpai reymaa pedee pia jarap'eda, mãgaji:
—Mùchi Rey Waibùa, ârata mùa k'awa bù pùa mù pia ak'ùpari, ooit'ee perã mùa ûraadak'a pùa oomerã.
23 Mãpai Joab Guesurdee wãji Absalón atade mãik'aapa Jerusalendee aneeji. 24 Mamîda aù naaweda reypa Joabmaa nãga jaraji: “Ichi temaa ateepáde aji, mù k'îrapite anee–ee.” Joabpa mãga ooji. Absalón jîp'a ichi temaa wãji, rey unu–ee.
25 Israel eujã jõmaade ùmùk'îra k'ap'ùa pia, k'îra wãree wê–e paji Absalonk'a. Maperã jõmaarãpa iru t'o p'anapachida. Iru bùùrùdeepa porosãude parumaa maarepida ne–inaa k'achia wêe baji. 26 Año chaa chi puda t'ùùpipachi, pudara bada perã. Chi puda t'ùùdak'ãri, chi chùk'ùa kilo omé uchiapachi. 27 Absalonpa iru baji warrarã õpee mãik'aapa k'au aba, t'âjarapatap'edaa Tamar. Ma k'au k'îra wãree baji.
28 Absalón año omé Jerusalende baji, rey k'îrapite maarepida wã–ee. 29 Maperã Absalonpa Joabmaa jara pëida omé jara pëiji ichimaa wãmerã pedeede, reymaa pëi k'inia bada perã ichi pari. Mamîda Joab wãk'aa paji.
30 Maperã Absalonpa chi mimiapataarãmaa nãga jaraji:
—Joabpa ichi eujã mù eujã ik'aawa bùde cebada uu iru bùda aji. ¡Mamaa wåtù mãik'aapa chi cebada paat'aadapáde! aji.
Chi mimiapataarã wãdap'eda, mãga oojida.
31 Joabpa k'awaa atak'ãri, aramata wãji Absalón temaa mãik'aapa iidiji:
—¿Sãap'eda pù mimiapataarãpa mù ne–uu paat'aajidama? aji.
32 Absalonpa p'anauji:
—Mùa jara pëijida aji, pù chemerã. Mùa pù pëiit'ee paji reymaa mù pari pedeede. K'inia baji pùa irumaa nãga jaranamerã: “Pari mù cheji Guesur eujãdeepa. Piara bak'aji mù mama beeda paara.” Ârá mùa rey unu k'inia bù. Irua k'îsia bù pùrã mùa ne–inaa k'achia ooji, mãgara irua mù peeipia bùda aji.
33 Mãpai Joabpa reymaa mãga jaranaji. Reypa mãga ûrik'ãri, Absalón t'â pëiji. Absalón rey k'îrapite pak'ãri, bedabaidachi tau bùùrù te jãde t'õbairumaa. Mãpai rey Davidpa chi warra k'îra ât'aaji.