David warra Amnonpa k'achia ooda
13
1 David warra Absalonpa âpewêra k'îra wãree iru baji. Mãgà awêra t'âjarapachida Tamar. David warra naapema Amnón ãchi âpema paji ãchi ak'õre David eereepa. Ma Amnonpa Tamar k'inia baji. 2 Mamîda Tamar waide ùmùk'îra ome k'ãi–e bada perã, iru pia ak'ùpachida. Maperã Amnonpa iru p'oyaa ata–e paji mãik'aapa irude audú k'îsia nâbùpa Amnón k'ayaadachi. 3 Maapai Amnonpa k'õp'ãyo aba iru baji; t'âjarapatap'edaa Jonadab. Mãgà David âpema Simá warra paji. Jonadab ik'awaa baji.4 Ewari aba Jonadabpa Amnonmaa iidiji:
—Rey warra, ¿sãga nâbùma? aji. ¿Sãap'eda ewari chaa pù k'îra pia–eera baparima? ¿Mùmaa jara–ek'ã? aji.
Amnonpa p'anauji:
—Mù âpema Absalón âpewêra Tamar mùchi–it'ee k'inia bùda aji.
5 Mãpai Jonadabpa nãga ûraaji:
—Camade k'ayaa pùk'a beepáde aji. Mãpai pù ak'õrepa pù ak'ù chek'ãri, chupùria iidíji pù âpewêra Tamar pëimerã pù k'aripade. Ma awara jaráji chi awêrapa chik'o pia chuumerã pù k'îrapite mãik'aapa pùmaa tawamerã. “Irua mùmaa chik'o teeruta k'oit'eeda” apáde aji.
6 Mãgá Amnón ichi camade k'ayaa pùk'a jêra beeji.
Mãpai reypa ak'ùnak'ãri, Amnonpa mãgaji:
—Mù chupùria k'awaapáde aji. Mùa k'inia bù mù âpewêra Tamar chemerã mù k'îrapite pan omé oode mãik'aapa iruata ma pan mùmaa teemerã.
7 Mãpai Davidpa Tamarmaa jara pëiji ichi k'îrapite chemerã. Pak'ãri, mãgaji:
—Chupùria k'awáaji mãik'aapa wãpáde aji, pù âpema Amnón temaa nejoode iru–it'ee.
8 Aramãgá Tamar chi âpema Amnón temaa wãji. Ará panak'ãri, ununaji Amnón ichi camade jêra bù. Mãpai Tamarpa iru k'îrapite pan masa oop'eda, pan âpùmaa beeji. 9 Chi pan aupak'ãri, Tamarpa p'arat'ude p'e atap'eda, Amnonmaa teeji. Mamîda irua k'o k'inia–e paji. Mãpai Amnonpa jaraji mimiapataarã arii p'anadap'edaa jõmaweda taawaa wãdamerã.
10 Ituaba p'aneedak'ãri, irua Tamarmaa mãgaji:
—Ma pan mù jêra bùmaa aneepáde aji, mãik'aapa pùchi juapa mùmaa k'opi chepáde aji.
Aramãgá Tamarpa ma pan ateeji Amnón badamaa.
11 Mamîda iru k'ait'a pak'ãri ma pan k'opiit'ee, Amnonpa iru jita ataji mãik'aapa mãgaji:
—Âpewêra, mù ome k'ãipáde aji.
12 Tamarpa p'anauji:
—¡Mùchi âpema, mùa mãga oo–epù! Mù k'îra nejasiapináaji. Israel eujãde mãgá oodak'aapù. ¡Mãgee ne–inaa k'achia oonaapáde! aji. 13 Pùa mãga ooru pùrã, ¿mùa sãgá k'îra nejasia chooyama? aji. Ma awara jõmaarãpa pù ãpùte k'achia pedeedayada aji, k'îsia k'awa–ee bù ãpùte pedeepatak'a. Mùa chupùria iidi bù pù rey ome pedeemerã. Irua tachi miak'ãipiyada aji.
14 Mamîda Amnonpa ûri k'inia–e paji. Iru Tamar k'ãyaara juataura bada perã, iru jita atap'eda, k'iniaamaa bùde iru ome k'ãiji. 15 Mamîda mãga ooda t'êepai, Amnonpa Tamar k'îra unuamaa iru beeji. Audupùara k'îra unuamaa iru baji naawedapema k'inia iru bada k'ãyaara. Mapa mãgaji:
—P'irabáiji mãik'aapa wãpáde aji.
16 Mamîda Tamarpa p'anauji:
—¡Mùchi âpema, namãik'aapa mù jërenaapáde! aji. ¡Mãga ooru pùrã, audupùara k'achia ooit'eeda aji, pùa mù ome ooda k'ãyaara!
—¡Na wêra namãik'aapa taawaa jëret'áaji! ¡Maap'eda puerta pia jâa bùpáde! aji.
18 Aramãgá ma mimiaparipa tedeepa taawaa jëret'aaji. Maap'eda chi puerta pia jâa bùji. Tamar p'aru teesoo pia jâ baji, rey k'aurã miak'ãida–e p'anùùrãpa ichita mãgee p'aru jâpatap'edaa perã. 19 Tamar ma tedeepa uchiak'ãri, it'abarre p'ora ùt'aa p'oji ichi poro ârù mãik'aapa ma p'aru pia jâ bada jêt'aaji, ma awara ichi jua poro ârù atap'eda, ode jêe wãji.
20 Chi âpema Absalonpa iru mãgá unuk'ãri, iidiji:
—¿Pù âpema Amnónpata pù nãga oojik'ã? aji. Mùchi âpewêra, maarepida jaranáaji, iru pù âpema perã. Audú k'îsianaapáde aji, ma p'asadade.
Mãgá Tamar chi âpema Absalón tede beeji, Amnonpa iru k'inia–e pada perã.
21 Rey Davidpa ma p'asada k'awaa atak'ãri, audú k'îraudachi. Mamîda Amnón miapi–e paji, chi warra naapema pada perã mãik'aapa iru audú k'inia iru bada perã. 22 Amnonpa mãga ooji mîda, Absalonpa irumaa maarepida jara–e paji. Mamîda ichi t'ãridepai Amnón k'îra unuamaa iru beeji chi âpewêra ome mãga ooda perã.
Absalón k'îra jõ–ee bada Amnón ome
23 Año omé wãyaap'eda, Absalón mimiapataarãpa ichi ovejaarã k'ara t'ùùmaa p'anajida Baal Jazorde, Efraindeepa uchiadap'edaarã eujã k'ait'a. Mama p'anùde Absalonpa fiesta ooji. Mapa rey warrarã jõmaweda t'â pëiji.
24 Ma awara ichi ak'õre, rey Davidmaa wãji mãik'aapa mãgaji:
—Mùchi Rey Waibùa, mù pù mimiapari. Mù mimiapataarãpa mù ovejaarã k'ara t'ùùmaa p'anùda aji. Fiesta oodait'ee. Mapa Mùchi Rey Waibùa, mùa k'inia bù pù, poro waibùarã pù jua ek'ari beerã ome chedamerã.
25 Mamîda Davidpa p'anauji;
—Warra, tai jõmaweda p'oyaa wãda–eda aji, pù–it'ee audú âpùa bait'ee perã jõmaweda wãruta pùrã.
Absalonpa audú edek'aji mîda, rey wã k'inia–e paji. Jîp'a Absalonmaa pedee pia jaraji.
26 Mãpai Absalonpa mãgaji:
—Mùchi Rey Waibùa, pù wã–e perã, ¿sãap'eda mù âpema Amnón pëi–ema? aji.
Mãpai reypa iidiji:
—¿Sãap'eda k'inia bùma aji, Amnón pù ome wãmerã?
27 Mamîda Absalonpa audú mãga jara nâbùpa, reypa pëiji Amnón, chi warrarã awaraarã paara Absalón ome.
Aù naaweda Absalonpa chik'o pia joopiji rey mesade iru p'anapatak'a. 28 Mãga nùde ichi mimiapataarãmaa jaraji:
—Amnón pia ak'ùdapáde aji. Vinopa piu wãk'ãri, mùa jarait'ee peedamerã. Waawee–ee mãga óotù, mùata mãga oopi bairã. Sõcharra p'anadapáde aji.
29 Absalonpa jaradak'a chi mimiapataarãpa Amnón peet'aajida. Mãpai apemaarã rey warrarã ãchi mulade bataudap'eda, jîchoodachida.
30 Ãra at'ãri ode wãdade eperãarãpa Davidmaa pariatua nepùrùnajida Absalonpa iru warrarã jõmaweda peek'ooda. 31 Davidpa mãga ûrik'ãri, chi p'aru jêt'aaji mãik'aapa t'ãri p'uapa te jãde jêra beeji. Ichi ak'ùpataarã arii p'anadap'edaarãpa ichiaba ãchi p'aru jêt'aajida.
32 Mamîda David âpema Simá warra Jonadabpa Davidmaa mãgaji:
—Rey Waibùa, k'îsianáaji pù warrarã jõmaweda peedap'edaa. Amnón aupai peejida. Absalonpa iru mãgá peet'aait'ee k'îsia iru baji, chi âpewêra Tamarmaa k'achia oodak'ãriipa. 33 Maperã Rey Waibùa, ijãanáaji pù warrarã jõmaweda piujida. Amnón aupaita piujida aji.
34 Absalón jirabodoru misa ma fiesta oo p'anadap'edaamãiipa, k'ûtrãa rey jâa badapa unuji eperãarã cheruta Joronayin ode; ma o ee bide bù. Mãga unuk'ãri, ma jâaparipa reymaa jaranaji.
35 Mãpai Jonadabpa reymaa mãgaji:
—Rey Waibùa, pù warrarã cherutada aji, mù, pù mimiaparipa jaradak'a.
36 Jonadab pedee aupak'ãri, rey warrarã pachejida. Jêe chejida ãchi âpema piuda–it'ee. Rey chi ak'ùpataarã ome auk'a audú jêejida.