Tachi Ak'õre pedee jarapari Natanpa Davidmaa jarada
12
1 Tachi Ak'õre David ome k'îrau bada perã, ichi pedee jarapari Natán pëiji Davidmaa.Natán David k'îrapite panak'ãri, nãga nepùrùji:
—P'uuru abaade eperã omé p'anapachida. Aba p'arat'ara bapachi; jõdee chi apema chupùria bapachi. 2 Ma p'arat'ara bùpa oveja mãik'aapa p'ak'a chok'ara iru baji. 3 Mamîda ma chupùria chùpa oveja wêra chak'e a–pai iru baji. Ma oveja chak'e neto atap'eda, auk'a wari wãji ichi warrarã ome. Ichi chik'o k'orudepema k'opipachi mãik'aapa ichi vasode topipachi. Ma awara ma oveja chak'e ichi ik'aawa k'ãipipachi. K'inia iru bapachi ichi k'auk'a. 4 Ewari aba awaraa eperã p'asia cheji ma p'arat'ara bùmaa. Mamîda ma p'arat'ara badapa ichi ne–animal pee k'inia–e paji k'opiit'ee ma p'asia chedamaa. Ma k'ãyaara ma chupùria chù oveja wêra chak'e jãri atap'eda, peeji k'opiit'ee ma p'asia chedamaa.
5 Davidpa mãga ûrik'ãri, audú k'îraudachi ma p'arat'ara bùpa mãga ooda perã mãik'aapa Natanmaa mãgaji:
—Tachi Ak'õre k'îrapite mùa juraa bù: ¡Chi mãga ooda piuipia bùda! aji. 6 ¡Ma awara ma oveja peeda pari waa k'îmari teeipia bùda aji, chiparimaa, iru chupùria k'awa–e pada perã!
7 Mãpai Natanpa Davidmaa mãgaji:
—¡Pùda aji, ma p'arat'ara bù! Israelitaarã Ak'õre Waibùapa pùmaa nãga jara bù: ‘‘Mùa pù jùrùt'eraji israelitaarã rey pamerã mãik'aapa pù Saúl juadeepa uchiapipachi. 8 Iru pù poro waibùa paji mîda, mùa pùmaa iru palacio mãik'aapa iru wêraarã teeji. Ma awara mùa israelitaarã mãik'aapa Judá ëreerãdepemaarã pù jua ek'ari bùji. Pù–it'ee at'ãri faltada paara, mùa pùmaa net'aa chok'araara teek'aji. 9 ¿Sãap'eda oojima ne–inaa audú k'achia bù, pùa hitita Urías amonitaarãmaa peepik'ãri iru wêra pùchi–it'ee atait'ee? ¿Sãap'eda mù ley mãgá yiaraa iru bajima? aji. 10 Mãgá pùa mù yiaraa iru bada perã ma hitita Urías wêra atak'ãri pùchi wêra papiit'ee, pùchideerã ûk'uru ichita piu k'achia piudait'ee. 11 Mù, Jõmaarã Ak'õre Waibùapa nãga jara bù: ‘Pùchideerãpa pùmaa ne–inaa k'achia oodait'ee, mùa ãramaa mãga oopiit'ee perã. Pù k'îrapite mùa pùchi wêraarã jãri atait'ee mãik'aapa teeit'ee awaraa israelitamaa. Ãstaawa, awaraarã taide mãgà pù wêraarã ome k'ãiit'ee. 12 Pùa ma k'achia ook'ãri, merã ooji. Mamîda mùa pùmaa ma k'achia ooit'eeda aji, ãstaawa, israelitaarã taide.’ ”
13 Davidpa mãga ûrik'ãri, Natanmaa nãga jaraji:
—¡Tachi Ak'õre k'îrapite mùa p'ek'au k'achia oojida! aji.
Natanpa p'anauji:
—Tachi Ak'õrepa pùa p'ek'au k'achia ooda ãyaa bùji. Ma k'aurepa pù piu–eda aji. 14 Mamîda pù warra ewaa t'oda jai–idaait'eeda aji, pùa mãgá Tachi Ak'õre k'îrapite ma k'achia ooda perã.
15 Natanpa mãga jarap'eda, ichi temaa wãji. Ma t'êepai Tachi Ak'õrepa k'ayaapiji ma warra chai Davidpa ooda Urías wêra ome. Mãgá ma warra chai juak'aya nâbeeji. 16 Mãga bùde Davidpa Tachi Ak'õremaa chupùria iidipachi chi warra chai pari. Nek'ok'aa paji mãik'aapa t'ãri p'uapa p'ãrik'ua te jãde jêra beepachi. 17 Iru mimiapataarã poro waibùarãpa enenee jõnajida iru p'irabaimerã. Mamîda irua mãga oo k'iniak'aa paji. Ichiaba ãra ome nek'ok'aa paji.
18 K'ãima siete wãyaap'eda, chi warra chai jai–idaaji. David mimiapataarã poro waibùarãpa waawee p'anajida irumaa jaradait'ee, audú t'ãri p'ua nâbeei jîak'aapa. K'îsiajida: “Chi warra at'ãri chok'ai bùde, irua tachi pedee ûri k'iniak'aa paji pùrã, ârá ¿sãgá jaradaima chi warra jai–idaada? ¡K'awada–e k'ãare ne–inaa irua pariatua ooi!”
19 Mamîda Davidpa unuk'ãri ãchi o sausauwaa pedeemaa p'anù, k'awaaji chi warra chai jai–idaada. Mapa ãchimaa iidiji:
—¿Warra chai jai–idaajik'ã? aji.
Ãchia p'anaujida:
—Jai–idaajida ajida.
20 Mãpai David te jãdeepa p'irabaidachi. K'uip'eda, k'era p'uruji, p'aru pia jâ beeji mãik'aapa t'îuji Tachi Ak'õre ome unupata tede ùt'aa t'âit'ee. T'êepai, ichi temaa wãji mãik'aapa chik'o iidiji. Mãpai nek'oji.
21 Iru ek'ari beerãpa mãga unudak'ãri, irumaa iidijida:
—Rey Waibùa, ¿pùa k'ãata oomaa bùma? ajida. Pù warra chai at'ãri chok'ai bak'ãri, pù nek'ok'aa paji mãik'aapa iru–it'ee jêepachi. Mamîda ârá iru jai–idaak'ãri, ¡pù p'irabaiji mãik'aapa nek'oji!
22 Davidpa p'anauji:
—Mù warra chok'ai bak'ãri, mù nek'ok'aa paji mãik'aapa jêepachi, k'îsia bada perã Tachi Ak'õrepa mù chupùria k'awaai mãik'aapa mù warra chok'ai bùi. 23 Mamîda ârá iru jai–idaa bairã, ¿k'ãare–it'ee mù nek'o–ee baima? Mãga oo bùpa mùa iru p'oyaa chok'aipi–e. Mù iru bùmaa wãit'ee. Mamîda iru waa che–eda aji, mù ome bade.
Salomón t'oda
24 Chi warra jai–idaada t'êepai, Davidpa chi wêra Betsabé t'ãri o–î–îapiji. Ma t'êepai iru ome k'ãiji. Maap'eda irua ùmùk'îra warra t'oji. Davidpa t'â bùji Salomón.a Tachi Ak'õrepa ma warra k'inia iru baji. 25 Mãga jara pëiji Davidmaa iru pedee jarapari, Natán k'ap'ùa. Mãpai Davidpa ma warra chai ichiaba t'â bùji Jedidías. b
Davidpa amonitaarã p'uuru waibùa Rabá p'oyaada
(1 Crónicas 20.1-3)
26 Maapai Joab chõomaa baji amonitaarã p'uuru waibùa Rabade. Mãpema rey baparimãi murallapa t'ùak'au bada p'oyaak'ãri, 27 Joabpa ichia chok'apariirã Davidmaa pëiji nãga jaradamerã: “Mù Rabá p'uurudepemaarã ome chõomaa bùde ãchi rey baparimãi mãik'aapa ãchi pania t'ùpatamãi jãri atajida aji. 28 Maperã Mùchi Rey Waibùa, soldaorã awaraarã chip'e atap'eda, na p'uurudepemaarã ome chõo chétù mãik'aapa ãchi p'uuru jãri atátù. Maa–e pùrã mùata na p'uuru p'oyaait'ee mãik'aapa mùchi t'âta na p'uurude bùyada” aji.
29 Aramãgá Davidpa ichi soldaorã chip'e ataji mãik'aapa Rabá p'uurudee wãji. Ma p'uurudepemaarã ome chõonadap'eda, p'oyaajida. 30 Mãpai ma p'uurudepema rey poro jâra jãri atadap'eda, David porode jâ bùjida. Ma poro jâra nêedee ooda paji. Mãu pi–ia iru baji mãik'aapa chi chùk'ùa treinta y tres kilo baji. Ma awara Davidpa p'e ataji ne–inaa pia chok'ara ma p'uurude unudap'edaa. 31 Eperãarã at'ãri ma p'uurude p'aneedap'edaarã mamãik'aapa ãyaa ateedap'eda, mimiapijida serruchopa, jãit'epa mãik'aapa chaarapa. Ichiaba mãùrãmaa ladrillo oopijida. Mãga oojida amonitaarã p'uuru p'oyaadap'edaa chaa. Amonitaarã p'oyaadap'eda, David ichi soldaorã ome waya Jerusalendee wãji.