Davidpa p'ek'au k'achia ooda
11
1 K'oijara wãyaap'eda, reyrã jura chõode uchiapataadak'ãri, Davidpa pëiji ichi soldaorã poro waibùa Joab, awaraa poro waibùarã mãik'aapa israelitaarã soldaorã jõmaweda amonitaarã ome chõonadamerã. Mãgá chõonadak'ãri, amonitaarã jõpi wãjida mãik'aapa ãchi p'uuru Rabá wap'ùra atajida nùdait'ee ma p'uurudepemaarã jarra oorutamaa. Mãgá chõo jõnùde David Jerusalende beeji.2 Ewari aba k'ewara David âi bap'eda, ichi camadeepa p'irabaiji mãik'aapa ichi palaciodepema terrazadee wãji. Mama bùde mamãik'aapa unuji wêra k'îra wãree k'uimaa bù. 3 Davidpa iru ak'ù bap'eda, chi mimiapari pëiji iidinamerã k'aita ma wêra. Mãpai chi mimiaparipa jara cheji ma wêra t'âjarapata Betsabé. Iru Elián k'au mãik'aapa hitita Urías wêrada aji. 4 Ma wêra ewaapai bi k'ayaa wãyaap'eda bada perã, k'uimaa baji ooit'ee Tachi Ak'õre ley p'ãdade jara bùk'a. Davidpa ma wêra k'îra wãree unuda perã, atapiji. Aneedak'ãri, iru ome k'ãiji. Maap'eda Betsabé ichi temaa wãji.
5 Ma t'êepai ma wêra biak'oo beeji. Mapa irua Davidmaa mãga jara pëiji. 6 Davidpa made k'îsiap'eda, Joabmaa jara pëiji ma hitita Urías ichimaa pëimerã ãchi chõo p'anadap'edaamãiipa. Mãpai Joabpa mãga ooji. 7 Urías pak'ãri, Davidpa iidiji Joab mãik'aapa soldaorã pari mãik'aapa sãga wãda ãchi chõo p'anadap'edaa ome.
8 T'êepai Davidpa irumaa jaraji:
—Pùchi temaa wåji mãik'aapa bùùrù sùùpáde aji.a
Urías palaciodeepa uchiak'ãri, reypa irumaa chik'o pia tee pëiji. 9 Mamîda Urías ichi temaa wã–e paji. K'ãi beeji palacio t'îupatamãi rey te jâapataarã ome.
10 Aù norema Davidmaa mãga nepùrùdak'ãri, irua Urías t'âpiji mãik'aapa iidiji:
—¿Sãap'eda pùchi temaa wã–e pajima? aji. ¿Chõodeepa chep'eda, sê–e bùk'ã? aji.
11 Uriapa p'anauji:
—Tachi Ak'õre baaltek'a bù, Israeldepema soldaorã mãik'aapa Judadepema soldaorã te pak'uru juadee oodade p'anù. Ma awara mù poro waibùa, Joab awaraa soldaorã poro waibùarã ome p'uuru taawa k'ãi p'anù. Mãga bùde, pia–e bù mù wãmerã mùchi temaa nek'ode, ne–inaa tode mãik'aapa k'ãide mùchi wêra ome. ¡Pù chok'ai bùde mãga oo–eda! aji.
12 Mãpai Davidpa mãgaji:
—Idi at'ãri béeji. Nu pù chõo p'anùmaa pëiit'eeda aji.
Mãgá Urías beeji Jerusalende aù norema paru misa. 13 Ma p'ãrik'ua Davidpa Uriamaa jaraji ichi ome nek'omerã mãik'aapa it'ua to chemerã. Mãgá it'uapa iru piupit'aaji. Mamîda k'ãinak'ãri, ichi temaa wãi k'ãyaara, waya k'ãinaji rey te jâapataarã k'ãipatap'edaamãi.
14 Aù norema Davidpa k'art'a p'ãji Joabmaa mãik'aapa Urías ome tee pëiji. 15 Ma k'art'ade nãga jara baji: “Urías pïiji naapùara chõode uchiapataarã ome. Mãpai audú chõomaa p'aneedak'ãri, ituaba atabaibëidapáde aji, amonitaarãpa peet'aadamerã.”
16 Mãgá Joabpa ichi soldaorã ome amonitaarã p'uuru wap'ùra atarutade, Urías pëiji amonitaarã soldaorã sõcharra p'anadap'edaarãmaa. 17 Mãpai ma p'uurudepemaarã ãra ome chõode uchiadak'ãri, Israeldepema soldaorã poro waibùarã ûk'uru peek'oojida. Ma hitita Urías jida auk'a piuji.
18 Maap'eda Joabpa ma chõodap'edaadé Davidmaa jara pëiji. 19 Nãga jaraji chi chok'a pëiit'ee badamaa:
—Mùa jara pëiru jõmaweda reymaa jarak'ãri, 20 rey k'îraudariit'ee na chõoda atuadap'edaa perã mãik'aapa iidii: ‘‘¿Sãap'eda audú k'ait'a wãjidama ma p'uuru wap'ùra atadak'ãri? ¿K'awada–e p'anùk'ã ãrapa muralladeepa net'aa bat'apata? 21 ¿Mãgá ooji–e pajik'ã ai, Tebes p'uuru t'ùak'au bada muralladeepa wêrapa Yerubaal warra Abimélec k'ûrumapa peek'ãri? ¿Sãap'eda audú k'ait'a wãjidama?’’ ai. Mãga iidiru pùrã, pùa nãga p'anauipia bùda aji. ‘‘Ichiaba piuji pù jua ek'ari mimia bada, ma hitita Urías.’’
22 Mãpai ma chok'a pëida Davidmaa wãji. Panak'ãri, jõma jaraji Joabpa jarapidak'a.
23 Mãpai ma jara chedapa mãgaji:
—Soldaorã chok'ara p'uurudeepa chedap'edaarãpa tai p'oyaa wãjidada aji. Mamîda chõo jõnùpa taipa ãchi wãpijida ãchi p'uuru t'îupatadee. 24 Rey Waibùa, mãga nùde, murallade p'anadap'edaarãpa ematrùma trùmaa p'aneejida pù soldaorãmaa. Mãgá tai poro waibùarã ûk'uru piujida, hitita Urías paara.
25 Davidpa mãga ûrik'ãri, p'anauji:
—Joabmaa jaráji audú k'îsianaamerã ma soldaorã piudap'edaa k'aurepa. Mãga p'asapari jura chõodak'ãri. Ma awara jaráji ma p'uurudepemaarã ome chõodamerã ãra jõrutamaa. Irumaa pedee pia jarapáde aji, t'ãri o–î–îa beemerã.