Davidpa amonitaarã mãik'aapa siriorã p'oyaada
(1 Crónicas 19.1-19)
10
1 Ma t'êepai amonitaarã rey Najás jai–idaaji. Iru pari chi warra Janún rey beeji. 2 Davidpa k'îsiaji ma rey Janunpa ichi pia auk'a ak'ùit'ee iru ak'õre Najapa pia ak'ùdak'a. Mapa Davidpa poro waibùarã ichi jua ek'ari p'anadap'edaa Janunmaa pëiji jaranadamerã ichi t'ãri p'ua nâbù iru ak'õre jai–idaada k'aurepa.Mamîda ma eperãarã amonitaarã eujãde panadak'ãri, 3 amonitaarã poro waibùarãpa ãchi rey Janunmaa mãgajida:
—Rey Waibùa, ¿pùa ijãa bùk'ã ajida, Davidpa wãara ichi jua ek'ari p'anùùrã pëiji jara chedamerã ichi t'ãri p'ua nâbù pù ak'õre jai–idaada k'aurepa, irua pù ak'õre pia ak'ùpachi perã? ¡Mãga–epù! ¿Ãra pëiji–ek'ã ajida, tachi p'uuru ak'ùdamerã mãik'aapa t'êepai tachi jõt'aa chedamerã?
4 Janunpa ãchi pedee ijãaji. Mapa jaraji ma poro waibùarãmaa Davidpa eperãarã pëida jita atadamerã mãik'aapa mãùrã idak'ara t'ooma aba wêt'aadamerã k'îra nejasiapidait'ee. Ma awara mãùrã p'aru jâ p'anadap'edaa jêk'oojida, ãtau taawa p'aneedamerã. T'êepai mãgá ãpùtee pëijida.
5 Davidpa mãga k'awaa atak'ãri, ichia chok'apariirã pëiji ma eperãarã k'îra chuunadamerã, ãra audú k'îra nejasia p'anadap'edaa perã. Jara pëiji Jericó p'uurude p'aneedamerã ãchi idak'ara wariruta misa, maap'eda ichimaa chedamerã.
6 Amonitaarãpa k'awaadak'ãri David ãchi ome k'îrau bù, siriorã soldaorã chip'e wãjida chõodamerã ãchi eere: Rejob p'uurudepema mãik'aapa Sobá p'uurudepema veinte mil soldaorã jîte chõo nipapataarã, Macá p'uurudepema rey mil soldaorã ome mãik'aapa Tob p'uurudepema doce mil soldaorã. 7 Davidpa mãga k'awaa atak'ãri, Joab israelitaarã soldaorã jõmaarã ome pëiji chõode wãdamerã. 8 Ma amonitaarã ãchi p'uuru t'îupatade chip'edachida. Jõdee ma siriorã Sobá p'uurudepema, Rejob p'uurudepema mãik'aapa Tob p'uurudepema soldaorã Macadepema soldaorã ome p'uuru taawa p'aneejida.
9 Joabpa unuk'ãri soldaorã erk'a para bee ichi k'îrapite mãik'aapa ichi ãpùte, israelitaarã soldaorã pipùara bee jùrùt'eraji chõonadamerã ma siriorã ome. 10 Maap'eda apema soldaorã bùji ichi âpema Abisay jua ek'ari, ãchi chõonadamerã ma amonitaarã ome. 11 Mãga bùde Joabpa Abisaymaa mãgaji:
—Jã siriorãpa tai p'oyaa wãruta pùrã, mù k'aripanáji. Jõdee jã amonitaarãpa parã p'oyaa wãruta pùrã, mùa pù k'aripanait'ee. 12 K'îsianaapáde aji. Sõcharra chõonadáma tachi p'uuru pidaarã pari mãik'aapa awaraa p'uuru Tachi Ak'õre jua ek'ari p'anapataarã pari. ¡Tachi Ak'õrepa ooipia bùda aji, ichia k'îsia iru bùk'a!
13 Joab wãji ichi eere p'anadap'edaarã ome ma siriorã p'anadap'edaamaa chõode. Mamîda mãùrã iru naa jîchoodachida. 14 Ma amonitaarãpa mãga unudak'ãri, ãchi ichiaba jîchook'oodachida Abisay eere p'anadap'edaarã naa mãik'aapa t'îuk'oodachida ãchi p'uurude. Maperã Joab israelitaarã soldaorã ome ãpùtee wãjida Jerusalendee.
15 Siriorãpa k'awaadak'ãri israelitaarãpa ãchi p'oyaadap'edaa, waya chip'edachida. 16 Rey Hadad Ezerpa jara pëiji siriorã Éufrates to k'îraik'a eere p'anapatap'edaarãpa k'aripa chedamerã. Mãgá mãùrã Jelandee chejida. Ãchi poro waibùa Sobac paji. Iru rey Hadad Ezer soldaorã jõmaweda poro waibùa paji.
17 Davidpa mãùrã chip'edap'edaa k'awaa atak'ãri, ichia israelitaarã soldaorã jõmaweda chip'e ataji mãik'aapa Jordán to sîadap'eda, panajida Jelande. Mama ma siriorã ome chõomaa p'aneejida. 18 Mamîda chõo p'anadap'eda, ma siriorã jîchoodachida israelitaarã naa, David eere p'anadap'edaarãpa peedap'edaa perã ãchi eerepema soldaorã cuarenta mil caballode wãdap'edaarã mãik'aapa setecientos carretade wãdap'edaarã. Ma awara siriorã soldaorã poro waibùa Sobac sudap'eda, mama piuji. 19 Rey Hadad Ezer eerepema reyrã chip'edap'edaarãpa mãga k'awaa atadak'ãri, israelitaarã ome waa chõo k'iniada–e paji mãik'aapa ãra ome pedeejida chõoda–ee p'anapataadait'ee. Mãgá David jua ek'ari p'aneejida.
Maadak'ãriipa siriorãpa amonitaarã waa k'aripada–e paji.