Pe 'kɛ́ nɛ́ Zezi ní wè Pilati tiʔɛ nī
27
1 Sínbiniwuuro nī dè,
a kacuɔnrilɔ kàfɔlilɔ pe mìɛni bèle,
nɛ́ kùlo ni liɛlɛ ní bèle,
a pe sɛ́nì pìye nyaa pe mìɛni bèle Zezi wori nɛ̄ dè,
bè wi kpúu wè.
2 A pe 'wi puɔ nɛ́ wi kɔ́ri nɛ̀ sɛ́nì kɛn Pilati mɛ́,
ki tiʔɛ tɛ́nimɛ fànʔafɔli wè.
Zudasi wi sɛ́nì wìi kpúu
3 Zudasi wè,
bà wire kɛ́nì ki 'nyaa a pe 'Zezi kpúu wori juu dè nɛ̀ cáan nigbe nɛ̄ wè,
a ki 'wi biɛn.
A wi sɛ́nì walifiiwe togo nɛ́ kpɔrigɔ líɛ wè nɛ̀ koli nɛ̀ kɛ́ kacuɔnrilɔ kàfɔlilɔ kúrugu bèle peli nɛ́ liɛlɛ ní bèle,
4 nɛ̀ sɛ́nì jo:
«Mi nyɛ́nì kapiile kpíʔile,
nɛ́ pɛ́nì siɛnpowo kɛn wè,
ŋàa wiì kaala kpíʔile lèʔ.»
A pe sí wi yɛ:
«Kire 'weli líɛ gáa mɛ́ ?
Muɔ wori dī tire dè.»
5 A wi 'fali nɛ̀ wali wáa wè baa Kulocɛliɛ Gbùʔɔrɔsaʔa nī gè nɛ́ yiri,
nɛ̀ kɛ́ nɛ̀ sɛ́nì wìi puɔ nɛ̀ kpúu.
6 A kacuɔnrilɔ kàfɔlilɔ pe 'wali jó wè nɛ́ jo:
«Wali ŋáà felige wiì yɛli bè le baa Kulocɛliɛ Gbùʔɔrɔsaʔa wali yalege nī gèʔ,
bɛ̀ ki 'nyaa sìsiɛn walia wī wè.»
7 A pe sɛ́nì pìye nyaa nɛ̀ juu,
nɛ́ wali ŋáà líɛ wè nɛ̀ sɛ́nì cuufaanwa siʔi suɔ gè,
nɛ̀ kire kpíʔile nabɔnminɔ kúutɔnmɔ.
8 Kire nɛ̄ pe 'siʔi gáà ki míʔɛ le gè nɛ̀ jo «sìsiɛn siʔib»,
kire míʔɛ kire ki tíin baa pàngɛ gè.
9 A kire kpíʔile,
a Kulocɛliɛ siɛnjuuwo wi siɛnrɛ ti 'fori,
Zeremii siɛnrɛ dè;
wi 'jo:
A pe 'walifiiwe togo nɛ́ kpɔrigɔ
suɔ wè,
siɛn ŋáà lɔri Isirayɛli pìile
pe cé juu nɛ̀ bìɛ ti nɛ̄ dè;
10 nɛ́ sí ti líɛ nɛ̀ le cuufaanwa
siʔi nī gè,
majo mɛni Kàfɔli wi cé ti juu
nɛ̀ gbɛ̀ngɛ mi mɛ́ wèc.
Pilati wi 'Zezi yúgo wè
11 A pe sɛ́nì Zezi yérige wè Pilati yiʔɛ mɛ́ gè fànʔafɔli wè.
A wi 'wi yúgo nɛ́ jo:
«Muɔ wī lé Zuufulo kùlofɔli wè ?»
A Zezi wi sí wi yɛ:
«Tire muɔ 'juu nɛ̀ kúɔ dè.»
12 Dìi sí kacuɔnrilɔ kàfɔlilɔ nɛ́ liɛlɛ pe 'puu nɛ nyu nɛ tari wi nɛ̄ wè,
wiì yafiɛn juuʔ.
13 A Pilati kɛ́nì wi yɛ:
«Muɔ wè ti lúru léʔ,
dàa pe nyu nɛ tari muɔ nɛ̄ dè ?»
14 A wi 'píɛ wi nɛ̄,
wiì kɛ́nì nyuɔ kɔ̀n nɛ̀ suʔu wi nɛ̄ʔ,
a ki 'tɔ̀ni nɛ̀ fànʔafɔli wi fungo wúɔ kpuʔɔ.
Pe 'Zezi kpúu wori juu dè nɛ̀ ceri
15 A Torimakiyaʔa cɛngɛ ki cé gbɛ́nɛ̀ nɔ̀ gè,
fànʔafɔli wi nɛ̂ cé kasuulewe wáà nigbe múgu nɛ̀ wáa,
ŋìi siɛnnɛ pe caa wè.
16 Kasuulewe wáà cé sí puu baa siɛnnɛ pe mìɛni cé wire cɛ́n,
pe 'puu nɛ wi ye Barabasid.
17 Bà sí siɛnnɛ pe cé sɛ́nì gbuʔulo bèle,
a Pilati wi 'pe yúgo:
«Ŋíi yeli nɛ caa mi yige kasuu nī wè,
Barabasi lé,
dí Zezi wè ŋàa pe ye Kirisi wè ?»
18 Ki 'nyaa wi cé ki cɛ́n yejaʔa nɛ̄ pe cé Zezi cò wè nɛ̀ kɛ́ wire tiʔɛ nī gè.
19 Bà sí wi 'puu tɛ́niwɛ wi kàyuʔujuulo kácunʔɔ nī gè,
a wi cuɔ wi 'tunduro tórigo wi mɛ́ nɛ́ wi yɛ:
«Fǎga tí bé mìɛ le siɛnsinwɛ ŋáà wi wori nī dèʔ !
Ŋɔ́nigɔ káà 'mi fùrɔ nɛ̀ tóri pìlige gáà ki 'kúɔ gè wi koligo nī gè.»
20 Ki sí nyaa kacuɔnrilɔ kàfɔlilɔ bèle nɛ́ kùlo ni liɛlɛ ní bèle,
a pe 'siɛnnɛ súguru bèle pe- Pilati yɛ wè wi- Barabasi yaʔa wè,
wí sí Zezi wire kpúu.
21 A Pilati wi sí pe yúgo:
«Siɛnnɛ bálì pe siin nī bèle,
ŋíi yeli nɛ caa mi múgu wáa yeli mɛ́ ?»
A pe 'wi yɛ:
«Barabasi !»
22 A Pilati wi sí pe yɛ:
«Mi sí gáa kpíʔile nɛ́ Zezi ní wè,
ŋàa pe ye Kirisi wè ?»
A pe mìɛni 'jo:
«-Wi kóri tiiparigɛ nɛ̄ !»
23 A wi sí pe yɛ:
«Gáa sí wi 'kpíʔile sìpiʔi gè ?»
A pe ní nɛ̀ kàa taʔa pe yékpuʔulo nɛ̄ gèle,
nɛ́ jo:
«-Wi kóri tiiparigɛ nɛ̄ !»
24 Bà Pilati 'ki nyaa wire yirimɛ wè baa wèʔ,
nɛ̀ yiri kàgbaaligɛ ki cî ga yɛ̀ gè,
a wi 'luʔɔ líɛ nɛ̀ kiyɛ jíge yè siɛnnɛ pe yiʔɛ mɛ́ gèe,
nɛ́ jo:
«Mi liɛlɛ wè baa nàguɔ ŋáà wi kpúu wori nī dèʔ,
yeli nyùgo wori dī.»
25 A siɛnnɛ pe mìɛni 'fali nɛ̀ jo:
«ʔaan,
wi kùu leguʔu ki- tuu weli nɛ̄,
nɛ́ weli pìile ní bèle !»
26 Kire tiʔɛ nī gè,
a wi 'Barabasi múgu wè nɛ̀ wáa nɛ̀ pe kɛn,
nɛ́ sí tí a pe 'Zezi wire kpúɔn sápiige nɛ̄,
nɛ́ wi kɛn pe- sa wi kóri tiiparigɛ nɛ̄ gè.
Kapiɛngbuɔnnɔ pe 'pìye nyíɛnɛ Zezi nɛ̄ wè
27 A fànʔafɔli wi kapiɛngbuɔnnɔ pe 'Zezi kɔ́ri wè nɛ̀ jíin kàyuʔujuudiʔɛ saʔa nī gè.
A kapiɛngbuɔn tògo ki mìɛni sɛ́nì kìi pínɛ baa wi táanni.
28 A pe 'wi bururo fòlilo dè wi nɛ̄,
nɛ́ burugbuʔɔ nyìʔɛ le wi nɛ̄,
29 nɛ́ sí kùlofɔli ndɔ̀ngɔ tìin wíire wuʔu,
nɛ̀ tɔ́n wi nɛ̄ nyùgo nɛ̄ gè,
nɛ́ kàgbiile le wi mɛ́ kàliige kɔli nī gè,
nɛ́ tìgi nɛ̀ káguro wáa wi yiʔɛ mɛ́ gè,
nɛ̀ wi kùʔɔ nɛ̀ pìye nyíɛnɛ wi nɛ̄,
níɛ̀ jo:
«We ma síɛri,
Zuufulo kùlofɔli !»
30 Níɛ̀ sùlugu nɛ̀ wáa wi nɛ̄,
níɛ̀ kàgbiile suɔ lè wi mɛ́ nɛ̀ wi kpúɔn nyùgo nī gè.
31 Bà pe kɛ́nì pìye nyíɛnɛ wi nɛ̄ nɛ̀ kúɔ wè,
a pe 'burugbuʔɔ fòri gè wi nɛ̄,
nɛ́ koli nɛ̀ wi bururo le dè wi nɛ̄,
nɛ́ wi kɔ́ri nɛ̀ kɛ́ bàa wi kóri tiiparigɛ nɛ̄ gè.
Pe 'Zezi kóri wè tiiparigɛ nɛ̄ gè
32 Bà pe yigi bèle,
nɛ̀ kpàli nɛ́ Siirɛni kàʔa nàguɔ wáà ní,
pe 'puu nɛ wi ye Siimɔ;
a pe 'wi cò fànʔa wi- Zezi tiiparigɛ tugo gè.
33 A pe sɛ́nì nɔ̀ tiʔɛ nɛ̄ gè,
gàa pe ye Gɔligota wè,
ki kɔri wi 'jo:
«Ngorilo tiʔɛ».
34 A pe 'tiibe sìsoribo páà felibe nyaʔami diviɛn nīf,
nɛ̀ kɛn wi mɛ́ nɛ́ jo wi- ki gbuɔ.
Bɛ̀ ki 'tári wi mɛ́ nyinɛ nɛ̄ lè,
wiì fɔ̀li nɛ̀ ki gbuɔʔ.
35 Bà pe kɛ́nì wi kóri nɛ̀ kúɔ tiiparigɛ nɛ̄ gè,
a pe 'bìgele wáa nɛ̀ wi bururo liɛlɛ dè pìye nɛ̄g.
36 Nɛ́ tɛ́ni baa nɛ wi wéli.
37 Kɔri ŋíì nɛ̄ pe yé wi kóri wè,
a pe 'ki siɛnrɛ sɛbɛ dè nɛ̀ tárigɛ baa,
nɛ́ jo:
«Ŋàa wire wī Zezi wè,
Zuufulo kùlofɔli wè.»
38 Pe cé kàyuulo siin kóri nɛ̀ fàri wi nɛ̄;
wàa nigbe 'puu wi kàliige mɛ́,
ŋìi ní wè wi kàmɛgɛ mɛ́h.
39 Kodorilo pe 'puu nɛ wi sɔ́ninɔ níɛ tòrí,
náà nyùgo fíige gèi,
40 níɛ̀ jo:
«Muɔ ŋáà ma jo muɔ bé gbɛ̀ Kulocɛliɛ Gbùʔɔrɔsaʔa cáan gè,
bé koli ki faan cɛnyɛ taanri larigɛ nī gè,
ma sí mìɛ suɔ kìɛ !
A ki yē muɔ yē Kulocɛliɛ Jaa wè,
ma tìgi tiiparigɛ nɛ̄ gè !»
41 A kacuɔnrilɔ kàfɔlilɔ nɛ́ Fànʔa Siɛnrɛ sɛbɛcɛ́nminɛ míɛni ní bèle,
nɛ́ liɛlɛ ní bèle,
a pe 'yɛ̀ nɛ pìye nyíɛnɛ wi nɛ̄,
níɛ wáa:
42 «Wi 'pàli suɔ;
wire wè,
wiǐ sí gbɛ̀ jáa bè wìi suɔʔ.
Isirayɛli kùlofɔli wire wī,
wi- sí tìgi tiiparigɛ nɛ̄ gè píra ŋáà nī wè,
bà we bé tɛ́ngɛ wi nɛ̄.
43 Wi 'wi sɔ̀ngirɔ taʔa dè Kulocɛliɛ nɛ̄.
Kulocɛliɛ wi- sí wi suɔ píra ŋáà nī wè kìɛ,
a ki yē Kulocɛliɛ wiī wi mɛ́ wèj !
Wiì cé jo lé wire yē Kulocɛliɛ Jaa ?»
44 Kàyuulo bílì pe cé pínɛ nɛ̀ kóri nɛ́ wi ní bèle,
a peli míɛni 'yɛ̀ nɛ wi teri ki kanumɔ nɛ̄ bè.
Zezi wi 'kùu
45 Bà cɛngɛ ki pɛ́nì yéri nyùgo nī lɛ̀lɛ níì nī lè,
a yebilige 'jíin dàala nī lè tiɛrɛ ti mìɛni nī,
fúɔ nɛ̀ pɛ́nì taa a cɛngɛ ki 'cɛ̀li.
46 Bà cɛngɛ ki pɛ́nì cɛ̀li lɛ̀lɛ níì nī lè,
a Zezi wi 'kòkuulo wáa kpuʔɔ,
nɛ́ jo:
«Elii !
Elii !
Lema sabakitani ?»
Ki kɔri wi 'jo:
«Mi Kulocɛliɛ,
mi Kulocɛliɛ,
gáa nɛ̄ muɔ 'mi wáa ?»
47 Siɛnnɛ bílì pe 'puu baa nɛ̀ ki siɛnrɛ lúʔu dè,
a peli 'jo:
«Ye- nyaa,
wiī nɛ Kulocɛliɛ siɛnjuuliɛwɛ Elii yeri.»
48 A wàa 'fali nɛ̀ fɛ̀ nɛ̀ sɛ́nì cècuʔu líɛ nɛ̀ ki mígele kàgbiile nɛ̄,
nɛ́ ki nígi diviɛn tanʔaniwɛ nī,
nɛ̀ kɛn wi mɛ́,
nɛ́ jo wi- ki suɔn.
49 A bìli pe 'jo:
«Yéri wêli,
wéri ki wéli,
a ki yē Elii wi bága pa wi suɔ !»
50 A Zezi wi ní nɛ̀ kòkuugbuɔlɔ wáa,
nɛ́ kùu.
51 Kire lɛ̀lɛ nī lè,
a Kulocɛliɛ Gbùʔɔrɔsaʔa gunbɔli fɛ̀nik wi 'ciɛn nɛ̀ ki líɛ naamɛ gè nɛ̀ pɛ́nì tìgi táanmɛ gè;
a dàala ni 'cúungo cúungo,
a sìndɛnigbaʔala ke 'folilo nɛ̀ jabari.
52 A kpɔ̀ngɔlɔ ke 'folilo nɛ̀ múgolo,
a Kulocɛliɛ wuulo nìʔɛnɛ 'nyɛ́ nɛ̀ yiri pe nyɛyɛ nī yè.
53 Bà Zezi wi 'nyɛ́ nɛ̀ yiri,
á pe 'nyɛ́ nɛ̀ yiri pe nyɛyɛ nī yè,
a pe sɛ́nì jíin Zerizalɛmi kàʔa nī gè,
Kulocɛliɛ kàʔa wàlidɛngɛgɛ gè a siɛnniʔɛnɛ 'pe nyaa.
54 Kapiɛngbuɔnnɔ dabataan kàfɔli ŋíì wi 'puu baa nɛ̀ Zezi wéli wè,
wire nɛ́ wi kapiɛngbuɔnnyɛninɛ ní bèle,
bà wire dàala nyaa lè á ni 'cúungo mmɛ gè,
nɛ́ gàa ki mìɛni nyaa gè,
a fíɛrɛ 'wi cò kpuʔɔ,
a wi 'jo:
«Kányiʔɛ tɔ̀ni gī,
Kulocɛliɛ Jaa wi 'puu ŋàa wè !»
55 Cɛlilɛ 'puu baa nìʔɛnɛ yérile liʔi nɛ wéli.
Peli cé taʔa Zezi kúrugu wè nɛ kele kúu wi mɛ́,
nɛ̀ ki líɛ baa Galile kùlo mɛ́ lè.
56 Maari 'puu baa,
Magidala kàʔa wuu wè,
nɛ̀ fàri Zaki nɛ́ Yusufu yàa nɛ̄ wè Maari wè,
nɛ́ Zebede pìile yàa ní wè nɛ̀ pínɛ.
Pe sɛ́nì Zezi tɔ́n wè
57 Cɛnguʔɔ gè,
a nàguɔ wáà 'kɔ́n Arimate kàʔa mɛ́ nɛ̀ pɛ́nì yiri,
lɔrifɔli wi 'puu,
pe 'puu nɛ wi ye Yusufu.
Wire míɛni 'puu Zezi pìtɛnmɛwɛ wáà nɛ̀ pínɛ.
58 A wire 'kɛ́ Pilati kúrugu wè nɛ̀ sɛ́nì wi náari wi- kpúu kɛn wè wire mɛ́,
Zezi wè.
A Pilati wi 'tunduro tórigo pe- kpúu kɛn wè.
59 A Yusufu wi sɛ́nì wi mígele fɛ̀ni cìiliwe wáà nī,
60 nɛ́ kɛ́ nɛ̀ sɛ́nì wi le wire tíimɛ nyɛgɛ nī gè ki ní nɛ tíin fɔngɔ.
Wi cé ki gbógo nɛ̀ kɔ̀n nyagurugo nɛ̄.
Nɛ́ kàdɛnigbuʔɔ kòligo nɛ̀ tɔ́n nyɛgɛ ki nyuɔ nɛ̄ gè,
nɛ́ láʔa nɛ̀ kɛ́.
61 Maari wè,
Magidala kàʔa wuu wè,
nɛ́ Maari ŋíì ní wè,
peli 'puu baa tɛ́ninɛ nɛ̀ yiʔɛ wáa nyɛgɛ mɛ́ gè.
Pe 'kapiɛngbuɔnnɔ tɛ́ngɛ nyɛgɛ táanni gè
62 Ki kpìɛnduu gè,
cɛndɛnigɛ cɛngɛl gè,
a kacuɔnrilɔ kàfɔlilɔ bèle nɛ́ Fariziɛnnɛ ní bèle,
a pe 'pìye pínɛ Pilati tiʔɛ nī,
63 nɛ́ jo:
«Kàfɔli,
weli 'sɔ̀ngi nɛ̀ taa,
káfinɛgɛfɔli ŋáàm wè,
bà wi 'puu nɛ tíin sìi nɛ̄ wè,
wi cé jo:
‹Cɛndaanriwuʔu nɛ̄ gè,
m'bé koli bè nyɛ́.›
64 Kire nɛ̄ ma tí siɛnnɛ sari nyɛgɛ wéli gè,
bè pa taa cɛnyɛ taanriwuʔu nɛ̄ gè.
Wi pìtɛnmɛnɛ pe fǎa ga sa wi yùu bè yigeʔ,
bé siɛnnɛ yɛ bèle dí wi 'koli nɛ̀ nyɛ́ nɛ̀ yiri kúbilo nī bèleʔ.
Kire káfinɛgɛ ki bé nɛ́ tóri pélige nɛ̄ gè.»
65 A Pilati wi 'pe yɛ:
«Kapiɛngbuɔn tògo káà yē bile,
yeri waa ye sa pe tɛ́ngɛ peri ki sɔ́migi de wéli,
mɛni yeli 'ki nyaa ki bé yɛli gè.»
66 A pe 'láʔa nɛ̀ kɛ́,
nɛ̀ sɛ́nì tí a kapiɛngbuɔnnɔ pe 'yéri nyɛgɛ táanni gè,
nɛ́ fìɛ tɛ́ngɛ sìndɛnigɛ nɛ̄ gè.