Mariki 15

Pe 'kɛ́ nɛ́ Zezi ní wè Pilati tiʔɛ nī

(Mat 27.1-2, 11-14; Luk 23.1-5; Zan 18.28-38)

1 Bà kpìɛnmɛ pi 'yɛ̀ nɛ̀ tuu ki ní nɛ tíin faʔa pɛ́npɛn wè, a pe 'pìye pínɛ nɛ̀ juu nɛ̀ bìɛ peli nɛ́ ní bèle, nɛ́ ní bèle, nɛ̀ fàri ni mìɛni nɛ̄ lè.

A pe 'Zezi puɔ wè, nɛ́ wi kɔ́ri nɛ̀ kɛ́ nɛ̀ sɛ́nì wi kɛn mɛ́.

2 A Pilati wi sɛ́nì wi yúgo nɛ́ wi yɛ: «Muɔ wī lé Zuufulo kùlofɔli wè ?»

A Zezi wi 'wi yɛ: «Tire muɔ 'juu nɛ̀ kúɔ dè.»

3 A kacuɔnrilɔ kàfɔlilɔ pe 'yɛ̀ nɛ kele sáa nyu nɛ tari wi nɛ̄. 4 A Pilati wi ní nɛ̀ wi yúgo nɛ́ wi yɛ: «Siɛnrɛ wè muɔ mɛ́ʔ bè juu lé ? Ma sí ki wéli, kele gílì ke mìɛni pe nyu nɛ tari muɔ nɛ̄ gèle.»

5 Zezi wiì ní nɛ̀ yakaa juu nɛ́ wi níʔ. A ki tɔ̀ni nɛ̀ Pilati wi fungo wúɔ.

Zuufulo pe 'jo dí Zezi wi 'yɛli bè kpúu wī

(Mat 27.15-26; Luk 23.13-25; Zan 18.39–19.16)

6 A cɛngɛ ki cé gbɛ́nɛ̀ nɔ̀ gè, siɛnnɛ pe nɛ̂ cé kasuulewe wáà tìɛ, wi nɛ̂ wi múgu nɛ̀ wáa.

7 Kasuulewe wáà cé sí puu baa pe wi ye Barabasi. Kàsii wáà cé yɛ̀ siɛnnɛ pálì sunʔɔmɔ nī nɛ́ kùlo ni kàfɔlilɔ ní bèle, a pe 'siɛn kpúu ki kàsii wi nyùgo nī gè; Barabasi wire nɛ́ pàli pe cé puu kàsii wi yiʔɛ mɛ́ gè.

8 A siɛnnɛ pe 'kɛ́ Pilati kúrugu wè nɛ̀ sɛ́nì wi yɛ dí gìi wi sî dàli nɛ kpínʔini gè, wi- ki kpíʔile peli mɛ́. 9 A Pilati wi sí pe yúgo: «Yeli nɛ ki caa mi Zuufulo kùlofɔli yaʔa wè lé ?» 10 Ki 'nyaa Pilati wi cé ki cɛ́n yejaʔa nɛ̄ pe yé Zezi cò wè nɛ̀ kɛ́ wire tiʔɛ nī gè.

11 A kacuɔnrilɔ kàfɔlilɔ pe 'fali nɛ̀ tuu nɛ siɛnnɛ súguru bèle pe- Pilati yɛ wè wi- Barabasi wire yaʔa.

12 A Pilati wi 'koli nɛ̀ pe yɛ: «Gíi ye caa mi- kpíʔile nɛ́ nàguɔ ŋáà wire ní wè, ŋàa ye yeri Zuufulo kùlofɔli wè ?»

13 A pe 'fali nɛ̀ tuu nɛ yékpuʔulo wáari sɛni, nɛ́ jo: «-Wi kóri nɛ̄ !»

14 A Pilati wi 'pe yɛ: «Gáa wi 'kpíʔile sìpiʔi wuʔu gè ?»

A pe ní nɛ̀ kàa fàri pe yékpuʔulo nɛ̄ gèle nɛ́ jo: «-Wi kóri tiiparigɛ nɛ̄ !»

15 Pilati wi 'puu nɛ caa bè siɛnnɛ pe fungo nyígi gè, a wi 'fali nɛ̀ tí a pe Barabasi múgu wè nɛ̀ wáa, nɛ́ Zezi kɛn wè a pe 'wi kpúɔn sápiiye ní, nɛ́ wi kɛn pe sa wi kóri tiiparigɛ nɛ̄.

Kapiɛngbuɔnnɔ pe 'wuʔɔgɔ taʔa Zezi nɛ̄ wè

(Mat 27.27-31; Zan 19.2-3)

16 A kapiɛngbuɔnnɔ pe 'Zezi kɔ́ri wè nɛ̀ jíin fànʔafɔli kpáa dàligɛ nī gè, kire gī kàyuʔujuudiʔɛ gè. A pe 'fali nɛ̀ kapiɛngbuɔn tògo ki mìɛni yeri nɛ̀ gbuʔulo.

17 A pe 'burugbuʔɔ nyìʔɛ le Zezi nɛ̄ wè, nɛ́ wíire ndɔ̀ngɔ tìin nɛ̀ tɔ́n wi nɛ̄ nyùgo nī gè, 18 nɛ́ fali nɛ tòrí nɛ wi síɛri níɛ̀ jo: «We ma síɛri, Zuufulo kùlofɔli !»

19 Pe nɛ̂ kàgbiile tíʔɛ nɛ̀ wi kpúɔn nyùgo nī gè, níɛ̀ sùlugu nɛ̀ wáa wi nɛ̄, náà káguro wáa wi yiʔɛ mɛ́ gè nɛ̀ pìye nyíɛnɛ wi nɛ̄, níɛ̀ jo peli 'wi kpúʔɔ wī bɛ̀. 20 Bà pe kɛ́nì pìye nyíɛnɛ nɛ̀ kúɔ wi nɛ̄ wè, nɛ́ wi tíʔɛ nɛ̀ tín pìye fungo wè, a pe 'burugbuʔɔ nyìʔɛ fòri gè wi nɛ̄, nɛ́ wi wi bururo le dè wi nɛ̄, nɛ́ fali nɛ̀ wi kɔ́ri nɛ̀ yiri kpànʔanɛ bè sa wi kóri nɛ̄.

Pe 'Zezi kóri wè tiiparigɛ nɛ̄

(Mat 27.32-44; Luk 23.26-43; Zan 19.17-27)

21 Nàguɔ wáà cé kɔ́n siʔi mɛ́ nɛ tòrí, pe 'puu nɛ wi ye Siimɔ. Siirɛni kàʔa wuu wi 'puu, Alɛgizandiri nɛ́ Wurufusiyé tuu wire wi 'puu. A pe 'wi cò fànʔa a wi 'Zezi tugo gè. 22 A pe 'Zezi kɔ́ri wè nɛ̀ tánʔa tiʔɛ káà nɛ̄, pe ki ye Gɔligota, kire kɔri wi 'jo: «Ngorilo tiʔɛ»; 23 nɛ̀ sɛ́nì tiibe páà felibe nyaʔami diviɛn nī nɛ̀ kɛn wi mɛ́; piyē nɛ ki tiibe ye bè «», nɛ́ jo wi- ki gbuɔ. A Zezi wi 'cíi, wiì gbuɔ ki nɛ̄ʔ.

24 A pe 'fali nɛ̀ wi kóri nɛ̄ gè, nɛ́ wi bururo liɛlɛ dè pìye nɛ̄. Pe cé kɛnmɛ páà kpíʔile nɛ̀ bìgele wáa bè pe liʔɛlɛ taagɛnmɛ cɛ́n bè.

25 Lɛ̀lɛ níì nī pe yé Zezi kóri wè, cɛngɛ ki yé kò cɛ̀ béri báan dɔngɔnlɛlɛ mɛ́. 26 Kɔri ŋíì nɛ̄ pe yé wi kóri wè, a pe 'ki siɛnrɛ sɛbɛ dè nɛ̀ tárigɛ baa, nɛ́ jo: «Zuufulo kùlofɔli.»

27 Pe cé kàyuulo siin kóri nɛ̀ fàri wi nɛ̄; wàa nigbe 'puu wi kàliige mɛ́, ŋìi ní wè wi kàmɛgɛ mɛ́. 28 [A kire kpíʔile siɛnrɛ díì ti 'juu baa nī dè nɛ́ jo: «Pe 'wi tɔ́ri nɛ̀ le siɛnpiile nī bèle», a ki siɛnrɛ ti 'fori.]

29 A kodorilo pe yé gbɛ́nɛ̀ sɛ́nì wi nyaa wè, pe nàa wi teri, níɛ̀ nɛ nyùgo fíigi náà jo: «ʔɛn, kiī mɛni wī ? Muɔ ŋáà ma jo muɔ bé gbɛ̀ Kulocɛliɛ cáan gè, bé koli ki faan cɛnyɛ taanri larigɛ nī gè, 30 ma sí mìɛ suɔ kìɛ, tìgi tiiparigɛ nɛ̄ gè !»

31 A nɛ́ míɛni ní bèle, a pe 'yɛ̀ nɛ pìye nyíɛnɛ wi nɛ̄, níɛ wáa: «Ye- wi pugo wéli wè wêli díɛ, wi 'pàli suɔ, wire wè wiǐ sí gbɛ̀ wìi suɔʔ. 32  wè, kùlofɔli wè, wi- tìgi píra ŋáà nī wè nɛ̄ gè we- nyaa ! Bɛ̀ weli bé tɛ́ngɛ wi nɛ̄ !» Bìli pe cé pínɛ nɛ̀ kóri nɛ́ wi ní bèle, a peli míɛni 'yɛ̀ nɛ wi teri.

Zezi wi 'kùu tiiparigɛ nɛ̄ gè

(Mat 27.45-56; Luk 23.44-49; Zan 19.28-30)

33 Bà cɛngɛ ki pɛ́nì yéri nyùgo nī lɛ̀lɛ níì nī lè, a yebilige 'jíin dàala tiɛrɛ ti mìɛni nī, fúɔ nɛ̀ pɛ́nì taa a cɛngɛ ki 'cɛ̀li. 34 Bà cɛngɛ ki pɛ́nì cɛ̀li lɛ̀lɛ níì nī lè, a Zezi wi 'kòkuulo wáa kpuʔɔ, nɛ́ jo: «Eloyi, Eloyi, lama sabakitani ?» Kire kɔri wi 'jo: «Mi Kulocɛliɛ, mi Kulocɛliɛ, gáa nɛ̄ muɔ 'mi wáa ?»

35 Siɛnnɛ bílì pe 'puu baa nɛ̀ ki siɛnrɛ lúʔu dè, a peli 'jo: «Ye- nyaa, wiī nɛ Kulocɛliɛ siɛnjuuliɛwɛ yeri.»

36 A wàa 'fɛ̀ nɛ̀ sɛ́nì cècuuro líɛ, nɛ̀ ti mígele kàgbiile nɛ̄, nɛ́ ki nígi diviɛn tanʔaniwɛ nī, nɛ̀ kɛn wi mɛ́, nɛ́ jo wi- ki suɔn. Nɛ́ fali nɛ̀ jo: «Ye- pìiri wéri ki wéli, a ki yē Elii wi bága pa wi tìrige tiiparigɛ gáà nɛ̄ gè.»

37 Kire lɛ̀lɛ nī lè, a Zezi wi 'fali nɛ̀ kòkuugbuɔlɔ wáa sɛni, nɛ̀ kùu.

38 A Kulocɛliɛ gunbɔli fɛ̀ni wi 'ciɛn tiɛyɛ siin, nɛ̀ ki líɛ naamɛ gè nɛ̀ pɛ́nì tìgi táanmɛ gè. 39 Kapiɛngbuɔnnɔ dabataan (100) kàfɔli ŋíì wi 'puu baa yériwe Zezi táanni wè, bà wire 'wi kùugɛnmɛ nyaa bè mmɛ gè, a wi 'jo: «Kányiʔɛ gī, nàguɔ ŋáà wi tɔ̀ni nɛ̀ puu Kulocɛliɛ Jaa !»

40 Cɛlilɛ pálì 'puu baa nɛ̀ pínɛ yérile liʔi nɛ wéli. Maari wi 'puu baa, Magidala kàʔa wuu wè, nɛ̀ fàri Zaki Píle nɛ́ Zozeyé yàa nɛ̄ wè, ŋàa pe ye Maari wè nɛ̀ pínɛ wè, nɛ́ Salomɛ ní. 41 Ki 'nyaa bà Zezi wi 'puu kùlo mɛ́ lè, kire cɛlilɛ bálì pe cé taʔa wi kúrugu nɛ̀ kò wi pìtɛnmɛnɛ pálì, nɛ baara wi mɛ́. Cɛlilɛ pálì sáa 'puu baa nɛ̀ pínɛ, peli cé taʔa wi kúrugu nɛ̀ kɛ́ kàʔa mɛ́ gè.

ZEZI NYƐYIRILE WORI DE

(15.42–16.20)

Pe sɛ́nì Zezi tɔ́n wè

(Mat 27.57-61; Luk 23.50-56; Zan 19.38-42)

42,43 Ki cɛnguʔɔ gè, a Arimate kàʔa nàguɔ wáà 'wìi lìri nɛ́ kɛ́ kúrugu wè, nɛ̀ sɛ́nì wi náari nɛ́ wi yɛ wi- kpúu kɛn wè. Ki 'nyaa ki kpìɛnduu cî puu , pe nɛ̂ jo gbòboriyaʔajɛngɛ. Zuufulo pe wáà wi 'puu ki nàguɔ ŋáà wè, pe 'puu nɛ wi ye Yusufu; wire míɛni puu nɛ sɔ̀ngí nɛ yɛri wori nɛ̄ dè.

44 A ki 'Pilati wi fungo wúɔ, bɛ̀ ki 'nyaa Zezi wi cé kùu nɛ̀ kúɔ wè. A wi 'kapiɛngbuɔnnɔ dabataan (100) kàfɔli yeri wè nɛ̀ pɛ́nì wi yúgo, a ki yē Zezi wi cé kùu a ki 'mɔgɔ. 45 Bà wi 'kapiɛngbuɔn nàguɔ wi nyasiɛnrɛ taa dè, a wi 'kpúu kɛn wè Yusufu mɛ́ wè.

46 A wi sɛ́nì kúutɔnfɛni suɔ, nɛ̀ sɛ́nì Zezi láʔa wè tiiparigɛ nɛ̄ gè, nɛ̀ wi puɔ fɛ̀ni nī wè nɛ̀ sɛ́nì le nyɛgɛ nī. Ki nyɛgɛ ki 'puu gbòboriguʔɔ, a pe 'ki gbógo nɛ̀ kɔ̀n nyagurugo nɛ̄. Bà wi 'Zezi le wè nɛ̀ kúɔ nyɛgɛ nī gè, nɛ́ fali nɛ̀ sìndɛnigbuʔɔ ŋɔrigɔ gè nɛ̀ ki wìile tɔ́n lè. 47 Maari wè, Magidala kàʔa wuu wè, nɛ́ Maari ŋíì ní wè Zozeyé yàa wè, pe 'puu baa nɛ̀ Zezi wi tɔ́ndiʔɛ nyaa gè.