Nyakungɛngɛ Fɔngɔ gè
Siɛnrɛ ti tìɛdiʔɛ gè
Nyakungɛngɛ Fɔngɔ gáà Kulocɛliɛ wi 'kpíʔile nɛ́ siɛnnɛ ní bèle, ki siɛnrɛ tire dī náʔa sɛbɛlɛ bálì nī bèle Kulocɛliɛ siɛnrɛ dè. Kulocɛliɛ wi 'kire kpíʔile nɛ́ Zezi Kirisi ní wè, wi Jaa wè. Ki siɛnrɛ tiī náʔa sɛbɛlɛ togo nɛ́ kɔlisiin nī Nyakungɛngɛ Fɔngɔ wuulo bèle. Sɛbɛlɛ sicɛri pélile bèle (Matiye, Mariki, Luku, Zan), peli nɛ nyu Zezi Kirisi Kataanna ni wori nɛ̄ dè, nɛ ki tìí dí Zezi wire wī Suɔfɔli wè. Ki sɛbɛlɛ bálì piyē nɛ nyu Zezi wi siigɛnmɛ nɛ̄ bè, nɛ́ mɛni wi 'pɛn duniya nī wè, nɛ́ gìi wi pɛ́nì kpíʔile duniya nī wè, wi kùugɛnmɛ bè nɛ́ bɛ̀ wi 'koli nɛ̀ nyɛ́ nɛ̀ yiri wè, nɛ́ yɛ̀ nɛ̀ kɛ́ nyìʔɛnɛ nī lè. Kataanna Siɛnrɛ sɛbɛlɛ bálì pe sicɛri bèle, pe mìɛni nigbe nigbe pe 'siɛnnuro juu dè, wàa ó wàa nɛ́ wi siɛnrɛ ti juugɛnmɛ. Sɛbɛlɛ taanri pélile bèle, peli siɛnrɛ tiī nɛ waa nuro. Nɛ̀ sí ki taa Zan wori tire yē tìiyɛ. Dùʔɔ muɔ bé gbɛ̀ ki sɛbɛlɛ sicɛri pe siɛnrɛ wéli dè, bé sí ki wéli ŋíi wī pe sicɛri nī bèle ŋìi wori ti 'muɔ cò fungo nī gè.
Zezi Kirisi tundunminɔ pe kakpiʔiligele sɛbɛ wè, sɛbɛ kogunɔwuu wè, wire nɛ ki nyu mɛni Kulocɛliɛ Pìle ni cé pɛn Zezi pìtɛnmɛnɛ mɛ́ bèle, nɛ́ ki kpíʔile a pe 'cɛrigɛ nɛ̀ màʔa nɛ̀ kɛ́ nɛ̀ sɛ́ni Zezi Kataanna Siɛnrɛ jáari dè tiɛrɛ ti mìɛni nī dè. Kire ki 'tí a Kulocɛliɛ siɛnrɛ ti 'jáari nɛ̀ sɛ́nì nɔ̀ kùlogolo kálì siɛnnɛ nɛ̄ bèle, nɛ̀ weli míɛni pínɛ bèle. Siɛnnɛ bílì pe mìɛni pe 'tɛ́ngɛ Zezi Kataanna siɛnrɛ nɛ̄ dè, peli pe mìɛni bìnɛ wire wī tɛ́ngɛfɔlilɔ gboli lè.
Sɛbɛlɛ togo nɛ́ nigbe yē baa nɛ̀ taʔa Kakpiʔiligele sɛbɛ nɛ̄ wè. Zezi Kirisi pìtɛnmɛnɛ pálì pe 'pe sɛbɛ nɛ̀ tórigo tɛ́ngɛfɔlilɔ gbuʔulo kálì mɛ́, á kire laa nɛ̀ pe tórigo siɛnnɛ pálì mɛ́ nigbe nigbe. Zezi tundunwɔ wáà cé sɛbɛlɛ pálì míɛni sɛbɛ, pe puu nɛ wi ye Pɔli. Kire sɛbɛlɛ bálì piyē nɛ nyu siɛntiɛyɛ yáà nɛ̄, níɛ nyu nɛ tìí kpuʔɔ tɛ́ngɛfɔlilɔ nɛ̄ bèle.
Nyakungɛngɛ Fɔngɔ sɛbɛ sɛnwɛ wè, wire wī Tìɛlɛ sɛbɛ wè. Zezi Kirisi wire tíimɛ wi 'wìi tìɛ wi tundunwɔ Zan nɛ̄ wè, nɛ́ sí ki siɛnrɛ juu dè wi mɛ́ a wi 'ti sɛbɛ. Sɛbɛ sɛnwɛ ŋáà wè, wiī nɛ nyu bè nàzɔn lìri tɛ́ngɛfɔlilɔ nī bèle. Wi 'siɛnrɛ juu nɛ̀ tórigo tɛ́ngɛfɔlilɔ gbuʔulo kálì mɛ́ nɛ̀ pínɛ, nɛ̀ ke yeri míɛyɛ nɛ̄. A wi ń'nɛ̀ Zan yiʔɛ múgu gè a wi 'kele kálì nyaa nɛ̀ ke juu, siɛnnɛ pe- ke lúʔu, dí Zezi wi bé sí koli bè pɛn yo.
Nyakungɛngɛ Fɔngɔ siɛnrɛ ti láʔagɛlɛ tiɛkpoliyo yè
Kataanna Siɛnrɛ sɛbɛlɛ sicɛri bèle: Matiye, Mariki, Luku, Zan
Zezi tundunminɔ pe kakpiʔiligele sɛbɛ wè
Sɛbɛlɛ togo nɛ́ nigbe bálì pe 'tórigo siɛnnɛ pálì mɛ́ bèle
Tìɛlɛ sɛbɛ wè