Zezi wi 'nyɛ́ nɛ̀ yiri
28
1 Bà cɛndɛnigɛ ki 'tóri gè,
ki kpìɛnduu sínbinimɛ táanni bè cégboli ni cɛnbelige gè,
ki ní nɛ tíin faʔa wè,
a Maari wè Magidala kàʔa wuu wè,
nɛ́ Maari ŋíì ní wè,
a peli 'kɛ́ bè sa nyaa baa kpɔ̀nnɔ mɛ́ lè.
2 A ki 'nyaa a dàala ni 'cúungo cúungo kpuʔɔ,
a Kàfɔli wi nyìʔɛnɛ tundunwɔ wáà 'tìgi nyìʔɛnɛ nī lè,
nɛ̀ pɛ́nì sìndɛnigɛ ŋɔrigɔ gè nɛ̀ láʔa nɛ́ tɛ́ni ki nɛ̄.
3 Wi 'puu nɛ nyíʔɛnɛ nyíʔɛnɛgɛnmɛ páà nɛ̄ majo bɛ̀ nyìʔɛnɛ ni sî kɛ́nì fuu nɛ̀ nyíʔɛnɛ lè,
á wi bururo ní dè fìire péreperea.
4 Fíɛrɛ kɛnmɛ nɛ̄ bè,
siɛnnɛ bálì pe cé tɛ́ngɛ kpɔ̀nnɔ táanni lè pe ni wéli lè,
a pe 'tuu nɛ̀ kò kúbilo tíɛlɛ.
5 A nyìʔɛnɛ tundunwɔ wi 'juu nɛ́ cɛlilɛ bálì ní bèle nɛ́ pe yɛ:
«Yeli bèle ye fǎri fìʔɛ́ʔ,
mi nyɛ́nì ki cɛ́n Zezi ŋáà pe 'kóri tiiparigɛ nɛ̄ gè,
wire yeli nɛ caa.
6 Wi wè náʔa gèʔ.
Wi 'nyɛ́ nɛ̀ yiri majo bɛ̀ wi cé ki juu gè.
Yeri báan ye pa nyaa tiʔɛ gíì nī pe cé wi le wè.
7 Yeri waa píra ŋáà nī wè,
ye sa ti juu wi pìtɛnmɛnɛ mɛ́ bèle dí wi nyɛ́nì nyɛ́ nɛ̀ yiri kúbilo sunʔɔmɔ nī bè.
Wi 'kíni yeli yiʔɛ nɛ̄ baa Galile kùlo mɛ́ lè.
Baa yeli báa wi nyaa kire tiʔɛ nī.
Dàa tire mi yé je juu yeli mɛ́.»
8 A cɛlilɛ bálì pe 'láʔa nyɛgɛ táanni gè,
fíɛrɛ nɛ́ fundaanwiɛrɛ kiyɛ nī yè,
nɛ̀ fɛ̀ nɛ̀ kɛ́ bàa ti juu Zezi wi pìtɛnmɛnɛ mɛ́ bèle.
9 Kire lɛ̀lɛ nī lè a Zezi wi sɛ́nì yiri pe nɛ̄,
nɛ̀ pe yɛ:
«Mi ye síɛri !»
A pe sɛ́nì wi fǎa nɛ̀ mígi tɔliyɔ nɛ̄ yè,
nɛ̀ kpuʔɔrɔ taʔa wi nɛ̄.
10 A Zezi wi sí pe yɛ:
«Ye fǎri fìʔɛ́ʔ.
Yeri waa ye sa ki juu mi siinyɛninɛ mɛ́ bèle,
peri waa Galile tɛ́nimɛ mɛ́,
pe báa mi nyaa kire tiʔɛ nī.»
Yiɛgininɛ pe 'jànvaa juu Zezi wori nɛ̄ dè
11 Bà cɛlilɛ bálì pe waa nɛ tíin bèle,
a ki 'nyaa kire lɛ̀lɛ nī lè,
kapiɛngbuɔnnɔ bílì pe cé tɛ́ngɛ pe kpɔ̀nnɔ wéli lè,
pe pàli cé kɛ́ nɛ̀ kúɔ kàʔa mɛ́ gè,
nɛ̀ sɛ́nì ti mìɛni juu nɛ̀ tìɛ kacuɔnrilɔ kàfɔlilɔ nɛ̄ bèle,
gàa ki 'tóri gè.
12 A peli sɛ́nì pínɛ nɛ́ liɛlɛ ní bèle a pe 'pìye nyaa nɛ̀ juu.
A pe 'wali kɛn nìʔɛwɛ kapiɛngbuɔnnɔ mɛ́ bèle,
13 nɛ́ pe yɛ:
«Ye- ki juu ye jo,
‹Wi pìtɛnmɛnɛ pe 'weli yaʔa weli nɛ ŋɔ́ni,
nɛ́ sɛ́nì wi yùu nɛ̀ líɛ pìlige nī gè.›
14 A fànʔafɔli wi 'tire dáà lúʔu dè,
weli bé juu bè wi fungo nyígi gè;
kire kɛnmɛ báà nɛ̄ bè,
bà piyè yeli yiɛyɛ gbɛ̀n yèʔ.»
15 A pe sí wali suɔ wè,
nɛ́ kele kpíʔile gèle mɛni pe cé ki juu pe mɛ́ bèle.
A kire siɛnrɛ dáà ti 'cɛ̀ri Zuufulo pe mìɛni sunʔɔmɔ nī bè nɛ̀ pɛ́nì nɔ̀ pàngɛ gè.
Zezi wi 'tunduro kɛn wi pìtɛnmɛnɛ mɛ́ bèle
16 A pìtɛnmɛnɛ kiɛ nɛ́ nigbeb peli sí kɛ́ Galile tɛ́nimɛ nī bè,
baa nyagurugo gíì mɛ́ Zezi wi cé tìɛ pe nɛ̄ gè.
17 Bà pe sɛ́nì wi nyaa wè,
a pe 'kpuʔɔrɔ taʔa wi nɛ̄,
nɛ̀ sí ki yaʔa pàli 'puu nɛ káala.
18 A Zezi wi 'sìʔɛrɛ nɛ̀ kpɔni pe nɛ̄,
nɛ̀ ki juu pe mɛ́ nɛ́ pe yɛ:
«Fànʔa ki mìɛni yē mi mɛ́ nyìʔɛnɛ nī lè,
nɛ́ dàala ní lè.
19 Kire nɛ̄,
yeri waa ye sa kùlogolo siɛnfeliye yi mìɛni caa,
ye- pe kpíʔile mi pìtɛnmɛnɛ,
yéri pe batiize Tuufɔli,
nɛ́ Jaafɔli,
nɛ́ Kulocɛliɛ Pìle,
peli míʔɛ nɛ̄.
20 Yéri pe tìí pe- mi kele ke mìɛni cò,
gàli mi 'tìɛ yeli nɛ̄ gèle.
Mi wè,
mi yē nɛ́ yeli ní cɛnyɛ yi mìɛni,
fúɔ bè pa nɔ̀ duniya kúɔmɔ nɛ̄ bè.»