Zezi wi 'yaanyiɛmɛfɔli puʔɔ
8
1 Bà Zezi wi kɛ́nì juu nɛ̀ kúɔ nɛ́ tìgi nyagurugo nɛ̄ gè,
a siɛnnɛ pe 'taʔa wi kúrugu nìʔɛbɛlɛ.
2 A yaanyiɛmɛfɔli wáà 'pɛn nɛ̀ pɛ́nì káguro wáa wi táanni nɛ́ jo:
«Kàfɔli,
a muɔ 'fɔ̀li ki nɛ̄ wè,
muɔ bé gbɛ̀ mi puʔɔ mi cìile !»
3 A Zezi wi 'kɔli sáʔa gè nɛ̀ ki taʔa wi nɛ̄,
nɛ́ wi yɛ:
«Mi 'fɔ̀li ki nɛ̄,
puʔɔ ma cìile.»
Tiɛnugo nī gè,
a yaanyiɛmɛ pi 'fali nɛ̀ láʔa nàguɔ nɛ̄ wè a wi 'puʔɔ.
4 A Zezi wi 'ki juu wi mɛ́ nɛ́ wi yɛ:
«Lúʔu m'mɛ́,
fǎga tí bé ti juu siɛn mɛ́ʔ;
te waa ma sa mìɛ tìɛ Kulocɛliɛ Gbùʔɔrɔsaʔa kacuɔnriwɔ wire nɛ̄,
má sí yakɔnrɔ kɔ̀n dè,
dàa Misa cé tìɛ dè,
kire ki bé puu fìɛ wè pe mìɛni mɛ́ bèle,
bè ki tìɛ muɔ nyɛ́nì puʔɔ.»
Zezi wi 'nabɔnwɔ wáà baakuɔwɔ puʔɔ
5 Bà Zezi wi sɛ́nì jíin Kapɛrinawu kàʔa nī gè,
a kapiɛngbuɔnnɔ dabataan kàfɔli wáà pɛ́nì yiri wi kúrugu,
nɛ̀ wi fiɛn
6 nɛ́ wi yɛ:
«Kàfɔli,
mi baakuɔwɔ wiī baa mɔ̀nigijaanwa saʔa nī gè;
wi tɔ̀ni yē fùrɔwɔ kpuʔɔ.»
7 A Zezi wi 'wi yɛ:
«Mi wè lé,
mi sa wi puʔɔ léa ?»
8 A kapiɛngbuɔnnɔ dabataan kàfɔli wi ní nɛ̀ wi yɛ:
«Miì nyuɔ nɛ̀ yɛli muɔ jíin mi saʔa nī gèʔ.
Mi sí nyɛ́nì tɛ́ngɛ ki nɛ̄,
a muɔ cɛ́nì siɛnrɛ juu yákuɔ wè,
mi baakuɔwɔ wi bé puʔɔ.
9 Ki 'nyaa mi ŋáà muɔ nɛ nyaʔa wè,
mi yē pàli fànʔa láara wī,
nɛ́ sí ní mi tíimɛ wè kapiɛngbuɔnnɔ pálì kàfɔli.
A mi 'wàa yɛ:
‹Te waa›,
wi nɛ̂ kɛ́.
A mi sí ní nɛ̀ wàa yɛ:
‹Te báan náʔa›,
wi nɛ̂ pɛn.
A mi 'mi baakuɔwɔ wáà yɛ:
‹Te gàa kire kpínʔini›,
kire wi nɛ̂ kpíʔile.»
10 Bà Zezi 'tire lúʔu dè,
a nàguɔ wi kɛnmɛ pi 'wi dɛ́ni kpuʔɔ,
a wi 'ki juu siɛnnɛ mɛ́ bèle bàli pe cé taʔa wi kúrugu bèle,
nɛ́ pe yɛ:
«M'bé ki juu yeli mɛ́ kányiʔɛ nɛ̄,
mi sì fìɛ tɛ́ngɛlɛ náà ni felige nyaa siɛn mɛ́ Isirayɛli kùlo nī lèʔ.
11 M'bé ki juu yeli mɛ́,
siɛnnɛ bága kɔ́n nìʔɛbɛlɛ cɛngɛnyɛnifoligɔli mɛ́ nɛ́ cɛngɛnyɛnijiingɔli mɛ́ gè,
bè pa pínɛ bè tɛ́ni nɛ́ Birayima ní,
wire nɛ́ Siaga nɛ́ Yakuba ní wè lìidiʔɛ nī gè Nyìʔɛnɛ Kùlofɔligɔ nī gè.
12 Nɛ̀ sí ki yaʔa pe bága Kùlofɔligɔ pìile líɛ bèle bè pe wáa yebilige nī kpànʔanɛ,
kire tiʔɛ kire nī kɔnwaara nɛ́ gànʔana cérigige bága puu wè.»
13 A Zezi wi 'ki juu kapiɛngbuɔnnɔ dabataan kàfɔli mɛ́ wè nɛ́ wi yɛ:
«Te waa,
ki bé kpíʔile bè yɛli nɛ́ muɔ tɛ́ngɛlɛ ní lè.»
A ki 'fali nɛ̀ kpíʔile a kapiɛngbuɔnnɔ dabataan kàfɔli baakuɔwɔ wi 'fali nɛ̀ puʔɔ ki lɛ̀nunɔ nī lè.
Zezi wi 'yaala feliye sáa puʔɔ
14 Bà Zezi wi sɛ́nì jíin Piɛri saʔa nī gè,
nɛ̀ Piɛri cuɔ yàa nyaa wè sínɛwɛ,
céri ti yé fúugo wi nɛ̄.
15 A Zezi wi 'wi cò kɔli nɛ̄ gè,
a cefuuro ti 'láʔa wi nɛ̄,
a wi 'fali nɛ̀ yɛ̀ nɛ yagbuɔrɔ kpínʔini wi mɛ́.
16 Cɛnguʔɔ gè a pe 'pɛn nɛ́ gbòdolilofɔlilɔ ní wi kúrugu nìʔɛbɛlɛ;
a wi 'gbòdolilo cìra bèle nɛ̀ yige nɛ́ wi nyasiɛnrɛ ní dè,
nɛ̀ pínɛ a wi 'yaala pe mìɛni puʔɔ.
17 A ki 'kpíʔile nɛ̀ yɛli nɛ́ gàa Kulocɛliɛ siɛnjuuliɛwɛ Ezayi wi cé juu gè,
nɛ́ jo:
Weli kpɔlidiʔɛlɛ keli wi 'láʔa,
nɛ́ sí weli yaama suɔ bè nɛ̀ taab.
A siɛn nɛ ki caa bè taʔa Zezi nɛ̄ wè ki siɛnrɛ ti n'dɛ
18 Bà Zezi kɛ́nì siɛnmɛ nyaa bè pi tíri wi nɛ̄ bè,
a wi 'ki juu wi pìtɛnmɛnɛ mɛ́ bèle nɛ́ pe yɛ pe- cáʔa jeli gè pe- kɛ́ kanyuɔ gíì mɛ́ gè.
19 A Fànʔa Siɛnrɛ sɛbɛcɛ́nwɛ wáà 'sìʔɛrɛ nɛ̀ sɛ́nì kpɔni wi nɛ̄ nɛ́ wi yɛ:
«Tɛnmɛfɔli,
a muɔ nɛ waa tiʔɛ ó tiʔɛ nī,
m'bé taʔa muɔ nɛ̄.»
20 A Zezi wi 'wi yɛ:
«Nyàʔapɔnminɔ bèle kàwiiye yē pe mɛ́,
sínjapigele míɛni gèle,
ke lali nyìʔɛnɛ nī lè,
sìɛrɛ yē ke mɛ́;
Siɛn Pùɔ wire wè,
tiʔɛ cɛ wè wi mɛ́ wi- nyùgo kpɔni gèʔ.»
21 Wi pìtɛnmɛnɛ nī bèle,
a wàa ní nɛ̀ wi yɛ:
«Kàfɔli,
-ki yaʔa mi- koli bè kɛ́ bè sa mi tuu tɔ́n wè gbínʔɛnɛ.»
22 A Zezi wi sí wi yɛ:
«Taʔa mi kúrugu,
má kúbilo yaʔa bèle peri pìye tɔ́ngic.»
Zezi wi 'káfaligbuʔɔ yérige cáʔa nī
23 A wi sɛ́nì jíin kɔ́ri nī gè,
a wi pìtɛnmɛnɛ pe 'jíin nɛ́ wi ní.
24 A ki 'nyaa káfaligbuʔɔ káà sɛ́nì yɛ̀ pe kúrugu baa luʔɔ nī gè,
lakuruyo yi yɛ̀gí,
nɛ caa bè kɔ́ri tɔ́n gè;
Zezi wire sí cé puu nɛ ŋɔ́ni.
25 A pe sɛ́nì wi yɛ̀gɛ,
nɛ́ wi yɛ:
«Kàfɔli -weli suɔ !
Je we bé kùu wī !»
26 A wi 'pe yɛ:
«Gáa fíɛrɛ dī yeli nī mmɛ gè ?
Yeli tɛ́ngɛlɛ ni 'cɛ́ri díɛ !»
Nɛ́ fali nɛ̀ yɛ̀ sɛni,
nɛ̀ jɛnmɛ káfaligɛ nɛ̄ gè nɛ́ luʔɔ ní gè bɛ̀ ki 'puu nɛ wáari nɛ yɛ̀gí gè.
A tiʔɛ ki 'fali nɛ̀ nyígi yólilo sɛni.
27 A siɛnnɛ pe 'yɛ̀ nɛ nyu nɛ cúru,
níɛ wáa:
«Siɛn ŋíì felige wī nàguɔ ŋáà wè,
á káfaligɛ nɛ́ cáʔa ní gè ti mìɛni nɛ lúru wi nɛ̄ wè ?»
Zezi wi 'gbòdolilo yige siɛnnɛ siin nī
28 A pe 'luʔɔ jeli gè nɛ̀ sɛ́nì jíin Gadara tɛ́nimɛd nī bè.
A nàguɔlɔ pálì siin 'yiri baa kpɔ̀ngɔli nī wè nɛ wi kpàlí,
gbòdolilo 'puu pe nī.
Pe cé pii nɛ̀ tóri,
siɛn sì puu nɛ sorigi nɛ ki koligo gáà líi gèʔ.
29 A pe 'fali nɛ̀ pɛ́ni nyu nɛ kpɛ̀ní,
nɛ́ jo:
«Gáa gī muɔ nɛ́ weli sunʔɔmɔ ní bè,
Kulocɛliɛ Jaa ?
Lɛ̀lɛ niì fìɛ nɔ̀ʔ,
á muɔ 'pɛn náʔa gè bè pa weli wuʔɔ lé ?»
30 Ki sí nyaa tatogo káà 'puu baa pe táanni larigɛ nī,
nɛ caa nɛ káa;
tiɛliyɛ yi tɔ̀ni nɛ̀ puu nìʔɛyɛe.
31 A gbòdolilo pe 'tuu nɛ Zezi fiɛn wè,
nɛ́ wi yɛ:
«A muɔ 'weli cìra nɛ̀ yige náʔa gè,
ma weli tórigo weli sa jíin tatogo gáà nī gè.»
32 A wi 'pe yɛ:
«Yeri waa !»
A pe 'yiri nɛ̀ kɛ́ nɛ̀ sɛ́nì jíin tiɛliyɛ nī yè;
a tiɛliyɛ tògo ki mìɛni 'fali nɛ̀ fɛ̀ nɛ̀ tìgi nyagurugo nɛ̄ gè,
nɛ̀ sɛ́nì tuu cáʔa nī gè,
nɛ̀ kùu luʔɔ nī gè.
33 A yajuunaʔana pe 'fɛ̀ nɛ̀ kɛ́ kàʔa mɛ́ gè,
nɛ̀ sɛ́nì ti mìɛni tɔ́ri nɛ̀ tìɛ,
nɛ́ siɛnnɛ bálì wori ní dè,
bìli nī gbòdolilo pe 'puu bèle.
34 A kàʔa wuulo pe mìɛni 'yiri nɛ̀ kɛ́ Zezi wi kpàlidiʔɛ nī gè;
bà sí pe sɛ́nì wi nyaa wè,
a pe 'yɛ̀ nɛ wi fiɛn wi- yiri peli tɛ́nimɛ nī bè.