Mariki 1

Zezi Kirisi Kataanna Siɛnrɛ dè Mariki juumɔ nɛ̄ bè

Mariki

ZAN BATIISI WI 'ZEZI KOLIGO GBOBORI GE

(1.1-12)

Zan Batiisi siɛnjaarirɛ

(Mat 3.1-12; Luk 3.1-18; Zan 1.19-28)

1 Kulocɛliɛ Jaa wè Zezi wè, wi ti sélidiʔɛ n'gɛ. 2 Faʔa faʔa gè Kulocɛliɛ wi cé Zezi wori juu dè sɛbɛ nī wè nɛ́ jo:

Nyaa, m'bé mi tundunwɔ tórigo wè muɔ yiʔɛ mɛ́,

wi sa muɔ koligo gbòbori gè.

3 Siɛn wáà yē nɛ yékpoli wáari

baa waama kùlo nī lè,

nɛ́ jo:

«Ye- Kàfɔli wi koligo gbòbori gè,

ye- wi kobigele kpíʔile gèle

ke- sìɛn.»

4 A kɛ́nì pɛn, Zan ŋáà wi 'puu nɛ bèle waama kùlo nī lè. Wi 'puu nɛ ki jàarí yékpogbuɔlɔ nī pe mɛ́ nɛ́ jo pe- pe funyɔ yiʔɛ yè, pé sí de báan pe pa wè, dí Kulocɛliɛ wí sí pe kapiʔile kàsulugo suɔ gè.

5 A tɛ́nimɛ siɛnnɛ nɛ́ ní bèle, a pe mìɛni 'fali nɛ̀ kò nɛ yɛ̀gí pe tiɛyɛ nī yè nɛ báan Zan kúrugu wè, nɛ̀ pɛ́ni ki nyu nɛ́ jo peli nyɛ́nì yéri peli kapiʔile nɛ̄ gèle; Zan wi nɛ̂ sí pe batiize cáʔa nī gè. 6 Nyuʔɔmɔ síire burugbuʔɔ wi cé le, nɛ́ ki puɔ nɛ̀ cò nɛ́ sɛ̀ngɛ màʔana ní sɛ̀nnɛ nī gèle. Kàbarirɛ nɛ́ sárigɛ ti 'puu wi yaliire dè.

7 Wi 'puu nɛ ki jáari níɛ wáa: «Wàa bága pɛn mi kàduʔumɛ gè, wi fànʔa ki 'tóri mi wuʔu nɛ̄ gè nɛ̀ fáala, mi sì cɛ́nì nyuɔ nɛ̀ yɛliʔ bè gbɔbi bè wi tɔriyɔ màʔagɛlɛ sáʔala gèleʔ. 8 Mi wè, mi nɛ yeli batɛmi kpínʔini wè nɛ́ luʔɔ ní; wire wè, wi bága pa yeli batɛmi kpíʔile wè nɛ́ ní.»

Zezi batɛmi wè nɛ́ Setɛni puuweligele gèle

(Mat 3.13-17; Luk 3.21-22)

9 Ki cɛnyɛ nī yè, a Zezi kɛ́nì kɔ́n mɛ́, kàpile láà nī, nɛ̀ pɛn kúrugu wè, a Zan wi 'wi cáʔa nī gè.

10 Bà wi kɛ́nì je yiri luʔɔ nī gè, nɛ̀ fali nɛ̀ nyìʔɛnɛ nyaa lè a ni 'múgu, nɛ́ nyaa lè ni tíri nɛ báan wi kúrugu bɛ̀ gòtolo tíɛlɛ, 11 á siɛnnɛ pe 'fali nɛ̀ yékpoli láà lúʔu baa nyìʔɛnɛ nī lè a ni 'jo: «Muɔ wī mi Jaa ŋáà wi 'mi dɛ́ni wè. Mi nɛ fundaanra kpínʔini kpuʔɔ muɔ kɛnmɛ nɛ̄ bè.»

12 Bà tire 'tóri dè, a Kulocɛliɛ Pìle ni 'fali nɛ̀ wi kɔ́ri nɛ̀ tórigo waama kùlo nī. 13 A wi sɛ́nì cɛnyɛ togosiin kúɔ baa nyàʔayɛrɛ sunʔɔmɔ nī bè. Setɛni 'puu nɛ wi pun nɛ wéli; pe ní nɛ kele kúu wi mɛ́.

ZEZI BAARA DE GALILE TƐNIMƐ NI BE

(1.14–9.50)

Zezi wi 'wi baara séli dè

(Mat 4.12-25; Luk 4.14-15; 5.1-11)

14 Bà pe yé kɛ́nì cò nɛ̀ tɔ́n kasuu nī wè, a Zezi wi 'kɛ́ tɛ́nimɛ mɛ́ bè, nɛ̀ sɛ́ni Kulocɛliɛ jáari dè. 15 Wi 'puu nɛ ki nyu nɛ́ jo: «Lɛ̀lɛ ni 'nɔ̀, nàa Kulocɛliɛ cé tìɛ nɛ́ jo wi bága wi kùlofɔligɔ tɛ́ngɛ gè yeli sunʔɔmɔ nī bè. Ye- yeli funyɔ yiʔɛ yè, yé sí tɛ́ngɛ Kataanna Siɛnrɛ nɛ̄ dè.»

16 Bà wi 'puu nɛ tári nɛ tòrí kuʔɔjii nyuɔ nɛ̄ gè, a wi sɛ́nì nɛ́ wi cɔni Andire nyaa, pe jùɔlɔ wáari luʔɔ nī gè. Ki 'nyaa fúɔcobilo bīɛlɛ pe 'puu. 17 A Zezi wi 'pe yɛ: «Ye- taʔa mi nɛ̄, m'bé yeli kpíʔile yeli de siɛnnɛ caa de báan mi mɛ́ majo kɛnmɛ bíì nɛ̄ yeli nɛ fúɔlɔ cògí bèle.» 18 A pe 'fali nɛ̀ pe jùɔlɔ cáan bèle, nɛ́ líɛ nɛ̀ taʔa wi nɛ̄.

19 Bà pe 'sìʔɛrɛ cɛ̀ri wè, nɛ̀ Zebede jaala nyaa, Zaki nɛ́ wi cɔni ; pe 'puu tɛ́ninɛ pe kɔ́ri nī gè nɛ pe jùɔlɔ yori bèle. 20 A Zezi 'fali nɛ̀ pe yɛ: «Ye- taʔa mi nɛ̄.» A pe 'yiri nɛ̀ taʔa wi nɛ̄, nɛ́ pe tuu Zebede yaʔa wè baa kɔ́ri nī gè nɛ́ baakuɔlɔ ní bèle.

Zezi wi 'gbòdoli cìra nɛ̀ yige nàguɔ wáà nī

(Luk 4.31-37)

21 A pe sɛ́nì jíin Kapɛrinawu kàʔa nī. cɛngɛ kɛ́nì nɔ̀ gè, a Zezi wi 'kɛ́ nɛ̀ sɛ́ni siɛnnɛ tɛnmɛ bèle mɛ́ gè. 22 Wi tɛnmɛnɛ ni cé pe fungo wúɔ nɛ́ ki cɛ́n ni 'puu nɛ́ fànʔa ní; niì puu bɛ̀ woli tíɛlɛ lèʔ.

23 Gbòdolifɔli wáà 'puu baa tɛnmɛzaʔa nī gè. A wire 'fali nɛ̀ kɛ́nì kòkuulo wáa nɛ́ jo: 24 «Kaala yē we sunʔɔmɔ nī lé, muɔ nɛ́ weli ní bèle, kàʔa Zezi ? Muɔ 'pɛn bè pa weli cúʔɔ wī lé ? Mi 'ki cɛ́n siɛn ŋíì muɔ yē wè, muɔ wī Kulocɛliɛ Siɛn wè Tiɛlɛ Fùn wè.»

25 A Zezi wi 'juu nɛ̀ jɛnmɛ wi nɛ̄, nɛ́ wi yɛ: «-Nyuɔ tɔ́n gè, má yiri nàguɔ ŋáà nī wè !» 26 A gbòdoli wi 'fali nɛ̀ nàguɔ nyɛri wè nɛ̀ cáan sɛni, a wi 'tuu nɛ figiri, á wi 'fali nɛ̀ kòkuugbuɔlɔ wáa sɛni, nɛ́ yiri wi nī.

27 A ki 'siɛnnɛ pe fungo wúɔ kátii, a pe 'fali nɛ pìye yúgo nɛ mári sɛni nɛ́ jo: «Cí, weli wuulo, tɛnmɛnɛ náà lire 'pɛn fɔnnɔ, ni siɛnrɛ ti sí tɔ̀ni yē kàfɔli siɛnrɛ ! Wi 'gbòdolilo jáa bèle pe lúru wi nɛ̄ !» 28 A Zezi míʔɛ ki 'fali nɛ̀ yiri tɛ́nimɛ pi mìɛni nī sɛni.

Zezi wi 'yaama jáa bè nɛ́ gbòdolilo ní bèle

(Mat 8.14-17; Luk 4.38-41)

29 Bà pe kɛ́nì yiri nī gè, a Zaki nɛ́ pe 'kɛ́ nɛ́ Zezi ní wè nɛ́ Andireyé kpáa mɛ́. 30 Siimɔ cuɔ yàa wiì puu gbɛ̀nwɛʔ, céri ti yé fúugo wi nɛ̄, a wi 'sínɛ. A pe 'fali nɛ̀ wi wori juu dè Zezi mɛ́ wè. 31 A wi sɛ́nì wi cò kɔli nɛ̄ gè nɛ̀ yɛ̀gɛ, a wi 'yɛ̀ nɛ̀ tɛ́ni. A cefuuro ti 'láʔa wi nɛ̄. A wi 'yɛ̀ nɛ yagbuɔrɔ kpínʔini pe mɛ́.

32 Ki cɛnguʔɔ gè, bà cɛngɛnyɛni ni kɛ́nì jíin lɛ̀lɛ níì nī lè, a siɛnnɛ pe 'pɛn nɛ́ pe yaala pe mìɛni ní Zezi kúrugu wè, nɛ̀ gbòdolilofɔlilɔ pínɛ bèle. 33 A siɛnnɛ pe sɛ́nì gbuʔulo nɛ̀ tɔ́n wìile nɛ̄ lè. 34 A Zezi wi 'yaala feliye sáa puʔɔ, nɛ̀ gbòdolilo sáa cìra nɛ̀ yige siɛnnɛ nī bèle. Wiì puu nɛ yèrí ki nɛ̄ gbòdolilo peri nyuʔ. Ki 'nyaa peli yé wi cɛ́n siɛn ŋíì wī wè.

Zezi wi 'kɛ́ Galile kàaya yáà mɛ́ nɛ̀ sɛ́ni Kulocɛliɛ siɛnrɛ jáari dè

(Luk 4.42-44)

35 Ki kpìɛnduu sínbinimɛ nī bè, ki ní nɛ tíin wuɔmɔ nī dè, a Zezi wi 'yiri nɛ̀ kɛ́ tiʔɛ káà nī, baa siɛnnɛ sì puu bèleʔ, nɛ̀ sɛ́ni Kulocɛliɛ náari. 36 A kɛ́nì yiri nɛ wi tiʔɛ caa nɛ mári, wire nɛ́ wi pínɛnyɛninɛ ní bèle. 37 Bà pe kɛ́nì sɛ́nì wi nyaa wè, a Siimɔ wi 'wi yɛ: «Je siɛnnɛ pe mìɛni yē baa nɛ muɔ tiʔɛ caa nɛ mári.»

38 A wi 'pe yɛ: «Ye- puu we- kɛ́ kayɔbigɔ káà kiiyɛ mɛ́, kàʔa táanni vòbigele mɛ́ gèle, mi- sa Kulocɛliɛ siɛnrɛ jáari dè baa kire tiɛyɛ míɛni nī yè, kire kɛnmɛ nɛ̄ mi 'pɛn.» 39 A pe 'kɛ́. A wi 'kɛ́ tɛ́nimɛ tiɛrɛ pi mìɛni nī; wi 'puu nɛ Kulocɛliɛ siɛnrɛ nyu dè pe nī yè, níɛ gbòdolilo cìrá bèle nɛ yigi siɛnnɛ nī bèle.

Zezi wi 'yaanyiɛmɛfɔli wáà puʔɔ

(Mat 8.1-4; Luk 5.12-16)

40 A yaanyiɛmɛfɔli wáà kɛ́nì pɛn nɛ̀ pɛ́nì káguro wáa Zezi táanni wè, nɛ̀ wi fiɛn nɛ́ wi yɛ: «A muɔ 'fɔ̀li ki nɛ̄ wè, muɔ bé gbɛ̀ mi puʔɔ mi cìile !»

41 A wi nyinimɛ 'jíin Zezi nī wè kpuʔɔ. A wi 'kɔli taʔa wi nɛ̄ nɛ́ wi yɛ: «Mi 'fɔ̀li ki nɛ̄, puʔɔ ma cìile.» 42 Tiɛnugo nī gè, a yaanyiɛmɛ pi 'fali nɛ̀ yiri nàguɔ wi céri nī dè, a wi 'puʔɔ.

43 A Zezi 'fali nɛ̀ ki juu nɛ̀ gbɛ̀ngɛ wi nɛ̄ sɛni, nɛ́ wi yɛ: «Lúʔu m'mɛ́, fǎga tí bé ti juu siɛn mɛ́ʔ. 44 Te waa ma sa mìɛ tìɛ Kulocɛliɛ Gbùʔɔrɔsaʔa kacuɔnriwɔ wire nɛ̄, má sí cìilimɛ yakɔnrɔ kɔ̀n dè, dàa cé tìɛ dè; kire ki bé puu fìɛ wè pe mìɛni mɛ́ bèle, bè ki tìɛ muɔ nyɛ́nì puʔɔ.»

45 Nɛ̀ ki yaʔa bà nàguɔ wi 'kɛ́ wè, a wi 'fali nɛ̀ sɛ́ni ki jáari nɛ mári siɛnnɛ mɛ́ bèle tiɛrɛ ti mìɛni nī, a kire ki 'kɛn Zezi sì ní nɛ̀ gbɛ̀ nɛ̀ jíin kàʔa káà nīʔ, siɛnnɛ sunʔɔmɔ nīʔ, fúɔ macɛn a wi 'kɛ́ nɛ̀ sɛ́nì kò kpànʔanɛ, baa siɛnnɛ sì puu bèleʔ. A siɛnnɛ pe 'kò nɛ yɛ̀gí pe tiɛyɛ nī yè nɛ waa wi kúrugu.