Fǎri kàyuʔu cáanri pàli nɛ̄ʔ
(Luk 6.37-38, 41-42)
7
1 «Ye fǎri kàyuʔu nyu siɛn nɛ̄ʔ,
bɛ̀ Kulocɛliɛ míɛni sǐ kàyuʔu juu yeli nɛ̄ʔ.
2 Nɛ̀ taʔa gíi nɛ̄,
felige gíì nɛ̄ yeli nɛ kàyuʔu nyu gè siɛnnɛ nɛ̄ bèle,
kire kanumɔ nɛ̄ pe bága kàyuʔu juu yeli nɛ̄.
Ki 'nyaa yakirile níì ní yeli nɛ bìli wuʔu kíri gè,
lire ní Kulocɛliɛ bága kíri bè le yeli mɛ́.
3 «Mɛni nɛ̀ síɛ muɔ nɛ karigɛ nyaʔa gè muɔ siɛnnyɛni wi nyapile nī lè,
nɛ́ sí kò muɔ wè kàgɛnigɛ nyaʔa gè baa muɔ woli nī lèʔ ?
4 Á kire bɛ̀ʔ,
mɛni nɛ̀ síɛ muɔ bé gbɛ̀ muɔ siɛnnyɛni yɛ wè:
‹tí mi karipile náà fiɛ lè muɔ nyapile nī lè›,
nɛ̀ sí ki taa kàgɛnigɛ yē baa muɔ woli nī lèʔ ?
5 Jànvaafɔli wī muɔ wè,
kíni ma kàgɛnigɛ yige gè muɔ nyapile lire nī,
bɛ̀ muɔ bé nɛ́ péli de sɔ́migi de nyaʔa bè gbɛ̀ karigɛ fiɛ gè muɔ siɛnnyɛni mɛ́ wè.
6 «Yɛgɛ gáà gī wàlidɛngɛgɛ Kulocɛliɛ mɛ́ wè,
ye fǎri ki kanʔa pɔ̀nminɔ mɛ́ʔ,
nɛ̀ pínɛ ye fǎri yeli kofiia wáari wè tiɛliyɛ yiʔɛ mɛ́ʔ,
á kire 'laa yi bága wi tánʔana bè wi fórigo nɛ́ te tɔliyɔ ní yè,
bé ní yiʔɛ bè pa yeli nɔgi bè páʔala.»
Te náari te caa te kɔ̀ri kóli gè
7 «Yeri náari,
yeli bé taa;
yeri caa,
yeli bé nyaa;
yeri kɔ̀ri kóli gè,
pe bé ki múgu yeli mɛ́.
8 Nɛ̀ taʔa gíi nɛ̄,
siɛn ó siɛn wi náari wi nɛ̂ taa,
ŋìi wi caa wi nɛ̂ nyaa,
a ŋìi nɛ kɔ̀ri kóli gè,
pe nɛ̂ ki múgu wi mɛ́.
9 Siɛn ŋíi wī bile yeli nī bèle,
a wi jaa wi 'wi náari búru nɛ̄ wè,
wi nɛ̂ wi kɛn nɛ́ sìndɛnigɛ ní wè ?
10 Nɛ̀ kire liɛlɛ yige baa,
ŋáa wi 'jo a wi pùɔ 'wi náari fúɔ nɛ̄,
wi nɛ̂ wi kɛn nɛ́ wɔ̀bugɔ ní ?
11 A ki yē bɛ̀ gè,
yeli bálì bīɛlɛ sìpiile bèle,
yeli 'jáa bè yacɛ̀nrɛ kɛn macɛ́n yeli pìile mɛ́ bèle,
yeli sì ki cɛ́n lé yeli Tuu ŋáà wī baa nyìʔɛnɛ nī lè,
wi bé yacɛ̀nrɛ kɛn bìli mɛ́ pe wi náari bèle,
bè tóri yeli kɛngɛnmɛ nɛ̄ bè ?
12 «Kire nɛ̄,
gìi ki mìɛni yeli nɛ caa siɛnnɛ peri kpínʔini yeli mɛ́ bèle,
yeli míɛni bèle yeri ki kpínʔini pe mɛ́ de pínɛ;
bɛ̀ Misa Fànʔa Siɛnrɛ ti 'jo ki de kpínʔini,
tire dī nuro nɛ́ Kulocɛliɛ siɛnjuulo pe siɛnrɛ ní dè.»
Koliyo siin yī baa
13 «Yeri jiin wìile níì nī còrilo lè,
á kire 'laa wè wìile náà nī kpuɔlɔ lè á ni koligo ní gè píɛligɛ gè,
lire yē nɛ waa cúʔɔmɔ tiʔɛ nī wī;
siɛnniʔɛnɛ sí yē nɛ jiin ki koligo gáà nī gè.
14 Koligo gíì ki nyɛ́ni waa sìi tiʔɛ nī gè,
ki wìile ni tɔ̀ni yē cíɛlɛ díɛ !
á ki koligo ní gè còrigo.
Siɛnnɛ cɛ̀ri pe nyɛ́ni ki taʔa.»
Kulocɛliɛ siɛnjuulo jànvaafɔlilɔ bèle
15 «Yeri yìye ciʔige Kulocɛliɛ siɛnjuulo jànvaafɔlilɔ nɛ̄ bèle;
ki siɛnnɛ pe nɛ̂ pɛn yeli kúrugu nɛ́ sìnbaala céri ní kpànʔanɛ gè,
nɛ̀ sí ki taa laamɛ nī bè yacoyo yī.
16 Pe yasɛnrɛ tire nɛ̄ yeli bé pe cɛ́n;
yeli 'fìɛ ɛrɛzɛn kàtogo nyaa a pe 'ki cuɔ wíire tiige nī lé ?
A kire 'laa sàanfiige yasɛngɛ nyaa a pe 'ki cuɔ wíifiige tiige nī lé ?
17 Bɛ̀ sí ki yē,
a tiige ó tiige yē cɛ̀ngɛ gè,
ki nìɛ yasɛnrɛ sɛngi cɛ̀nrɛ;
tiige gíì sí gī fúnʔɔgɔ gè,
ki nàa yasɛnrɛ sɛngi dè cúʔɔrɔ.
18 Tiige gáà gī cɛ̀ngɛ gè,
kiǐ gbɛ̀ yasɛnrɛ sɛn cúʔɔrɔʔ,
nɛ̀ pínɛ tiige gáà gī fúnʔɔgɔ gè,
kiǐ gbɛ̀ yasɛnrɛ sɛn ti- puu cɛ̀nrɛʔ.
19 Tiige ó tiige ki sí wè nɛ yasɛnrɛ sɛngiʔ cɛ̀nrɛ dè,
pe nɛ̂ ki ceri nɛ̀ wáa kàsun nī.
20 Bɛ̀ sí gī,
pe yasɛnrɛ tire nɛ̄ yeli bé pe cɛ́n.»
Weri weli Tuu wi nyɛ́ni kele kúu
21 «Siɛnnɛ bálì mìɛni pe mi yeri níɛ waa,
‹Kàfɔli !
Kàfɔli !›
wè,
pe mìɛni bɛ̀ʔ pe bága jíin Nyìʔɛnɛ Kùlofɔligɔ nī gèʔ,
fúɔ macɛn bìli pe nyɛ́ni mi Tuu wi nyɛ́ni kele kpínʔini gèle,
mi Tuu wè,
baa nyìʔɛnɛ nī lè.
22 Ki cɛngɛ gáà gè pàli nìʔɛnɛ bága ki juu m'mɛ́ bé jo:
‹Kàfɔli,
Kàfɔli,
muɔ míʔɛ ní túʔu bɛ̀ʔ weli 'puu nɛ kele nyaʔa gèle nɛ nyu gèle ?
Nɛ̀ pínɛ muɔ míʔɛ kire ní túʔu bɛ̀ʔ weli 'puu nɛ gbòdolilo cìrá bèle nɛ yigi siɛnnɛ nī bèle ?›
Bìli bé jo:
‹Muɔ míʔɛ ní túʔu bɛ̀ʔ weli nyɛ́nì kakpoliyo nìʔɛyɛ kpíʔile nɛ̀ tóri yè ?›
23 Kire cɛngɛ gè,
m'bé ki juu bè yige pe mìɛni pe ki lúʔu bé pe yɛ:
‹Mi sì cɛ́nì yeli cɛ́n nɛ̀ nyaa púloʔ !
Ye- núgo mi táanni;
yeli yē nyɛ́ni síciramɛ kele kúu gèle.› »
Saaya siin faangɛnmɛ kàsiile
24 «Kire nɛ̄,
siɛn ó siɛn wi nyɛ́ni mi siɛnrɛ dáà lúru dè níɛ ti tári dè,
siɛn wi bé gbɛ̀ tɔ́nminɔ nɛ́ siɛnsiciliwe ní,
wire nyɛ́nì wi saʔa faan gè sìndɛnigɛ nɛ̄.
25 A kàsaʔa ki 'tuu,
a luɔyɔ yi 'fúu nɛ̀ pɛn,
a káfaligɛ ki 'wáa,
a ti pɛ́nì tìi pínɛ saʔa gáà nɛ̄ gè;
kire nɛ́ ki míɛni kiì tuuʔ,
bɛ̀ ki 'nyaa pe yé saʔa ki kàkpuɔn túgu wè sìndɛnigɛ nɛ̄ gè.
26 A siɛn ó siɛn sí mi siɛnrɛ dáà lúʔu dè,
nɛ́ kò wi wè ti tári dèʔ,
siɛn wi bé gbɛ̀ tɔ́nminɔ nɛ́ ledogo ní,
wi 'wi saʔa faan gè dàrimiʔɛ nɛ̄ gè.
27 Bà kàsaʔa ki 'tuu gè,
á luɔyɔ yi 'fúu nɛ̀ pɛn yè,
á káfaligɛ ki wáa gè,
á ti pɛ́nì tìi pínɛ saʔa gáà nɛ̄ gè,
a ki 'láʔa nɛ̀ tuu a ki tuugɛnmɛ pi 'pii.»
Zezi tɛnmɛnɛ niī nɛ́ fànʔa ní