Zezi wi 'tɛnmɛnɛ kɛn a muɔ je kpuʔɔrɔ kpíʔile wè
6
1 «Ye- tíi díɛ !
Ye fǎri yeli sínmɛ tári bè siɛnnɛ nyapigele nɛ̄ peri yeli wéliʔ.
A kire 'laa wè,
yeli sǐ ga tíi bé tɔ̀ni taa yeli Tuu mɛ́ wèʔ,
ŋàa wī baa nyìʔɛnɛ nī lè.
2 Kire nɛ̄ a muɔ je muɔ kɔliyɛgɛ kɛn fuunmɔfɔli mɛ́ wè,
ma fǎga kàkpanʔa líɛ de kire wíiʔ majo mɛni míɛcaarafɔlilɔ pe cî nɛ ki kpínʔini tɛnmɛzaaya nī yè nɛ́ koliyo nī yè,
dí siɛnnɛ péri peli míɛtanʔa yeri gè.
M'bé ki juu yeli mɛ́ kányiʔɛ nɛ̄,
pe nyɛ́nì pe sàri taa wè nɛ̀ kúɔ.
3 Muɔ wè,
a muɔ je kpuʔɔrɔ kpíʔile fuunmɔfɔli mɛ́ wè,
ma fǎga tí muɔ kàmɛgɛ ki- ki cɛ́n gàa muɔ kàliige ki nyɛ́ni kpínʔini gèʔ;
4 bɛ̀ ki bé kpíʔile muɔ kpuʔɔrɔ ti bé kò làrimɛ nī,
dí muɔ Tuu ŋáà wi nyɛ́ni wéli nɛ nyaʔa baa làrimɛ nī bè,
wi sí ki sàri kɛn wè muɔ mɛ́.»
Zezi wi 'wi pìtɛnmɛnɛ tìɛ bèle náarigɛnmɛ nɛ̄ bè
5 «Gìi ki 'Kulocɛliɛ náarigɛ kɛnmɛ kúɔ bè,
a yeli je wi náari wè,
ye fǎga puu bɛ̀ míɛcaarafɔlilɔ tíɛlɛ bèleʔ,
tɛnmɛzaaya tiɛyɛ yi 'pe dɛ́ni nɛ́ bèri yèrí de mári kojaaya nɛ̄ yè de Kulocɛliɛ náari wè siɛnnɛ peri peli nyaʔa wè.
M'bé ki juu yeli mɛ́ kányiʔɛ nɛ̄,
pe nyɛ́nì pe sàri taa wè nɛ̀ kúɔ.
6 Muɔ wè,
a muɔ je Kulocɛliɛ náari wè,
ma jíin muɔ saʔa laamɛ nī bè,
má kɔ̀ri tɔ́n gè mári muɔ Tuu náari wè;
wiī baa làrimɛ nī bè.
Bɛ̀ muɔ Tuu wè,
wi nyɛ́ni wéli nɛ nyaʔa baa làrimɛ nī bè,
wi bé ki tɔ̀ni kɛn wè muɔ mɛ́.
7 «A yeli ne Kulocɛliɛ náari wè,
ye fǎri siɛnnuro kànʔá dè de nyuʔ,
majo sìndɛngɛlɛ bīɛlɛʔ;
ki 'nyaa peli nàa ki sɔ̀ngí nɛ̀ jo dùʔɔ peli juuniʔɛgɛ kire ki bé ki kɛn Kulocɛliɛ wi- peli náarigɛ lúʔu gè.
8 Ye fǎga puu bɛ̀ pe tíɛlɛ púloʔ,
nɛ̀ taʔa gíi nɛ̄,
yeli Tuu wi 'ki cɛ́n nɛ̀ yaʔa gìi nɛ̄ yeli màakuu wi yē wè,
sɛ́ni nɛ́ yeli ki náari wi mɛ́ gè.
9 «Yeli bèle a yeli je Kulocɛliɛ náari wè,
ye jo:
‹Weli Tuu ŋáà wī baa nyìʔɛnɛ nī lè,
siɛn ó siɛn 'yɛli bèri muɔ míʔɛ kpóri gè,
muɔ wī Kulocɛliɛ wè.
10 Muɔ Kùlofɔligɔ ki de báan,
muɔ nyɛ́ni kaala ni de kpínʔini náʔa dàala nɛ̄ lè,
majo mɛni niī nɛ kpínʔini baa nyìʔɛnɛ nī lè.
11 Pàngɛ gè weli siliire kɛn dè weli mɛ́ dìi ti bé weli yɛli dè.
12 Weli kapiʔile yaʔa gèle weli nɛ̄,
majo bɛ̀ weli nɛ bìli pe kapiʔile yɛri gèle pe nɛ̄ bèle.
13 Fǎga ki yaʔa weli tuu puuwelige nīʔ,
ma sí weli suɔ Sìpiiwe mɛ́ wè.
[Nɛ̀ taʔa gíi nɛ̄,
kùlofɔligɔ gè nɛ́ fànʔa ní gè,
nɛ́ kpuɔmɔ ní bè,
tiī muɔ wori súuri.
Ki- taa ki puu bɛ̀a.]›
14 «Ki 'nyaa a yeli nɛ ki yɛri siɛnnɛ nɛ̄ bèle pe kakolido dáà pe kpínʔini dè,
yeli Tuu ŋáà wī baa nyìʔɛnɛ nī lè,
wi bé yeli tuudiʔɛlɛ wuʔu yaʔa gè yeli nɛ̄ bè pínɛ.
15 A yeli sí wè nɛ ki yɛri siɛnnɛ nɛ̄ bèleʔ,
yeli Tuu wiǐ ki yaʔa yeli nɛ̄ʔ,
yeli kakolido dáà yeli nɛ kpínʔini dèʔ.»
Zezi wi 'tɛnmɛnɛ kɛn súnlere wori nɛ̄ dè
16 «A ki sí yē sún yeli 'le wè,
ye fǎga puu bɛ̀ jànvaafɔlilɔ yiɛpiɛnrɛfɔlilɔ tíɛlɛ bèleʔ,
pe nìɛ ki kpínʔini siɛnnɛ pe- ki cɛ́n peli yē sún nɛ̄.
M'bé ki juu yeli mɛ́ kányiʔɛ nɛ̄,
pe nyɛ́nì pe sàri taa wè nɛ̀ kúɔ.
17 Muɔ wè a muɔ 'sún le wè,
ma muɔ yiʔɛ jíge gè má mìɛ gbòbori cɛ̀ngɛ
18 siɛnnɛ pe fǎga ki cɛ́n muɔ 'sún leʔ;
muɔ Tuu ŋáà sí wī baa làrimɛ nī bè níɛ nyaʔa wè,
wi bé ki sàri kɛn wè muɔ mɛ́.»
Yeri yeli lɔri fàá dè yeri tɛ́ngi nyìʔɛnɛ nī
19 «Ye fǎri lɔri fàá de tɛ́ngi bile yìye wori duniya nī wèʔ;
dɔnwɔ nɛ́ kpɛ̀nimɛ yē bile ti nìɛ yɛrɛ córi,
kàyuulo yē bile nɛ̀ pínɛ,
pe nìɛ saaya kabari yè nɛ jiin nɛ yɛrɛ yúu dè.
20 Gìi ki 'pɔ́ri gè,
yeri lɔri fàá dè yeri gbunʔuni yìye wori nyìʔɛnɛ nī lè;
kire tiʔɛ nī gè dɔnwɔ wè baaʔ,
kpɛ̀nimɛ míɛni wè baaʔ bàga yɛrɛ cúʔɔʔ,
kàyuulo míɛni wè baaʔ bàga saʔa kaaʔ bé nɛ́ ga jo bè yùuʔ.
21 Ki 'nyaa a muɔ lɔri tiī tiʔɛ gíì nī gè,
baa muɔ fungo ki nɛ̂ puu kire tiʔɛ nī.»
Zezi wi 'cetinnɛ kpìɛnmɛ wori juu dè
22 «Nyapigele keli gīɛlɛ siɛn cetinnɛ ni fètinnɛ lè.
A muɔ nyapigele kiyē wiʔile gèle,
muɔ cetinnɛ ni mìɛni bé puu kpìɛnmɛ nī.
23 A ki sí yē nyapigele kiyē muɔ nɛ̄ cúʔɔgɔlɔ gèle,
muɔ cetinnɛ ni mìɛni bé puu yebilige nī wī.
Kpìɛnmɛ bíì sí bī muɔ nī bè a pire 'yiʔɛ nɛ̀ kò yebilige gè,
cí,
je yebilige ki bé sí puu yebiliwuɔlɔ wī !»
Kulocɛliɛ caʔa ki 'yɛli bè kpúʔɔ siɛn mɛ́
24 «Siɛn sǐ gbɛ̀ri baara kàfɔlilɔ siin mɛ́ʔ,
fúɔ macɛn wàa nigbe bé wi biɛn,
dí wàa sí wi dɛ́ni;
á kire bɛ̀ʔ wi bé wàa nigbe cò kpuʔɔ,
dí ŋìi wi sí wi biɛn.
Yeli sǐ gbɛ̀ puu Kulocɛliɛ sùkuloloʔ,
bé ní puu lɔri sùkuloloʔ.»
Ye fǎga yeli sɔ̀ngirɔ yaʔa dè ti de curuguʔ
25 «Kire kɛnmɛ nɛ̄ m'bé ki juu yeli mɛ́:
Ye fǎri sɔ̀ngí yeli sìi wori nɛ̄ dèʔ bé jo:
‹Gáa weli bága káa ?›,
á kire 'laa ‹Gáa weli bága taa bè gbuɔ ?›
Nɛ̀ pínɛ ye fǎri yeli cetinnɛ wori sɔ̀ngí dèʔ,
bé jo:
‹Gáa weli bága leʔ ?›
Siɛn sìi wiì tóri léʔ yaliire nɛ̄ dè ?
A cetinnɛ míɛni ni 'tóri fɛ̀nilewe nɛ̄ wè lé ?
26 Ye- sínjinʔɛnɛ wéli gèle baa naamɛ gè:
ke wè nɛ yatanʔara táriʔ,
ke wè nɛ yaliire líi nɛ tɛ́ngiʔ,
síkaanya wè ti mɛ́ʔ.
Nɛ̀ sí ki taa yeli Tuu ŋáà wī baa nyìʔɛnɛ nī lè,
wiī nɛ ke kanʔa ke líi.
Yeli sì dúʔu pɔ́ri sínjinʔɛnɛ nɛ̄ gèle nɛ̀ fáala ?
27 «Ŋáasiɛn wī yeli nī bèle wi 'jo wire nɛ́ wire sɔ̀ngirɔ ti mìɛni ní dè,
wire bé gbɛ̀ jáa bè kàa taʔa wire sìi yiʔɛlɛ nɛ̄ gèle ?
28 «A gáa sí nɛ̄ yeli bururo lege ki sɔ̀ngirɔ ti 'kpúʔɔ yeli nɛ̄ ?
Ye- nyàʔa fiɛnrɛ ti yɛ̀rigɛnmɛ wéli bè nyàʔa nī gè.
Nɛ̀ sí ki taa ti wè baara kúuʔ,
ti wè kɔ̀rirɔ càannáʔ.
29 M'bé sí ki juu yeli mɛ́,
kùlofɔli Sulomani tíimɛ wè nɛ́ wi nàbuɔrɔ ti mìɛni ní dè,
wiì kɛ́nì bururo le a ti 'nyuɔ nɛ̀ nyàʔa fiɛnrɛ dáà ti làa nigbe kúɔʔ.
30 A Kulocɛliɛ wi sí nɛ sìnbirige nyàʔa fèrí gè kire kɛnmɛ nɛ̄ bè,
gàa we nyaʔa pàngɛ gè,
nɛ̀ sí ki taa mbànʔa kàsun bága ki sórigo gè,
wiǐ ga yeli nàbuɔrɔ yaʔa dè ti- nyuɔ bè tóri nyàʔa wori nɛ̄ dè lé ?
Yeli tɛ́ngɛlɛ ni 'cɛ́ri díɛ !
31 «Kire nɛ̄ ye fǎga yeli sɔ̀ngirɔ yaʔa dè ti de nyaʔamiʔ bé jo:
‹Gáa we bága káa ?
Gáa we bága taa bè gbuɔ ?
We bága yɛrɛ taa sé bè le ?›
32 Tire dáà ti mìɛni dè,
siɛnnɛ bílì piyè Kulocɛliɛ cɛ́n wèʔ,
peli bīɛlɛ pe fé ti kúrugu.
Á kire 'laa wè yeli Tuu ŋáà wī baa nyìʔɛnɛ nī lè,
wi 'ki cɛ́n yeli màakuu yē ti nɛ̄.
33 «Kire kɛnmɛ nɛ̄,
ye- kíni yeri Kulocɛliɛ Kùlofɔligɔ nɛ́ wi sínmɛ pire caa gbínʔɛnɛ,
bɛ̀ Kulocɛliɛ wi bé tire dáà ti mìɛni fàri dè baa yeli mɛ́.
34 Nɛ̀ pínɛ ye fǎri sɔ̀ngíʔ,
bè yeli funyɔ yaʔa yè yiri curugu mbànʔa ŋáà wi báan nɛ̄ wèʔ.
Nɛ̀ taʔa gíi nɛ̄,
mbànʔa wi bága de cáan nɛ́ wìi ní.
Cɛngɛ ó cɛngɛ nɛ́ ki fùrɔgɔ.»