ईशु ची परीक्षा
(मरकुस:1.12-13; लूका 4.1-13)
4
1 a नरीकारा चा आत्मा ईशु नु बरबरियान मां गेहती गेला, कि शैतान ईशु ची परीक्षा गिहो । 2 ईशु चाहलीस ङियो, ते चाहलीस राता, उपवास करला, आखिर मां ओह्नु भोख लागली । 3 बल्ति परखणे आले शैताना ने गोढु आती कने केहले, “अगर तु नरीकारा चा पुत छी तां, ते केहती ङे, ये पत्थर रोटिया बणती जाओ ।”4 पर ईशु ने ओह्नु जवाब ङिला, “कि लिखले आले छै कि, ‘बन्दे हेको रोटी लारे ही कोह्नी, पर नरीकारा चे मुंहा कनु निकड़ले आले हर - हेक वचन लारे जीते रीहीb ।’ ”
5 बल्ति इबलीस ओह्नु पवित्र नगर यरुशलेम मां गेहती गेला ते मन्दरा ची तुरबती पे खड़े करले,। 6 ते शैतान ने ओह्नु केहले, “कि अगर तु नरीकारा चा पुत छी तां, ते आपणे आप नु तले ढ़ाती नाख; कांकि लिखले आले छै, कि ओ दुधे वास्ते आपणे स्वर्गदूता नु हा आज्ञा ङिही; ते वे तनु हाथो हाथ चती गिहे; कङी इसड़े ना हो कि दुधे पगा नु पत्थरा लारे चोट लागो ।” c 7 d ईशु ने जबाब ङिला, “कि ईं वी शास्त्र किहे, तुं आपणे प्रभु नरीकारा ची परीक्षा ना कर ।”
8 बल्ति शैतान ईशु नु ब़ोहत ब़ङे पहाड़ा पे गेहती गेला, ते जगा चे सारे राज़ ते शोहर ङिखाड़ती कर । 9 ओह्णे ओह्नु केहले, “ये सारिया चिजा में तनु ङिही अगर माये आगु झुकी ते माई उपासना करी ।
10 बल्ति ईशु ने केहले, “शैतान, दुर हुती जा, कांकि शास्त्र किहे, तूं आपणे नरीकारा ची उपासना कर ते हको ओची ही सेवा कर ।’ ”
11 बल्ति शैतान ओह्नु छोड़ती कने चाहला गेला, ते स्वर्गदूत आती कने ओची सेवा करु लागले।
ईशु चे उपदेश ची शुरुआत
(मरकुस:1.14-15; लूका 4.14-15)
12 e ईशु ने जिसे बेह्ले सुणले कि यहोन्ना पकड़ीती चुकला ते ओ गलील प्रदेशा सनु पुठा चाहला गेला । 13 f पर ओ नासरत में कोह्नी रुकला ते जती कने कफरनहूम मां, जको जबलुन ते नपताली क्षेत्र मां गलील ची झील चे गोढु हुता, रिहुं लागला । 14 ईं ऐ वास्ते हुले कि नरीकारा ने भविष्यवक्ता यशायाह चे द्धारा जको केहलेते ले, ऊ पुरे हो । 15 g कि “जबूलुन ते नपताली चे देश, सागर चे रस्ते पे, यरदन नदी चे पशिचम में, गैर यहुदिया चे देश गलील मां । 16 जको बन्दी अंधारे मां जी पलती वाह्णे हेक बङे सोजले ङेखले । ते जको बन्दी मौती कनु ङरती कने जी पलती, वांह्चे पे, बङे सोजले पड़ले ।”
17 h ओ वख्ता पे ईशु ने खोश खबरी चा प्रचार शुरु करती ङिला, “आपणे पापा कनु मन फिरावा; कांकि स्वर्ग चा राज्य गोढु छै: ।”
मछवारा चे हकारले जाणे
(मरकुस:1.16-20; लूका 5.1-11)
18 जिसे बेह्ले ईशु गलील ची झील चे गोढु जाये पलता ओह्णे ङुहु भावा नु ङेखले शमौन जको पतरस किवालता ला ते ओह्चा भऊ अंद्रियास । वे झील मां आपणी जाल नाखी पलते ले । कांकि वे मछुआरे हुते । 19 ईशु ने वानु केहले, “माये भांसु चाहले आवा ।” में तम्हानु, “नरीकारा चे राज्य मां बन्दा नु गेहती आणने आली बन्दी बणावी ।” 20 वाह्णे तुरन्त आपणे आपणे जाला नु छोड़ती ङिलै ते ओह्चे भांसु टुरती पले ।
21 बल्ति ओ उठुु उगते टुरती पला, ते ओह्णे ङेखले कि जब्दी चा पुत याकूब ते ओह्चा भऊ यहोन्ना आपणे ब़ा चे लारे ब़ेड़ी मां ब़ेहेसती कने वे आपणियां जाला नु ठीक करी पलते ले । ईशु ने वानु हकारले । 22 ते वे हेकदम ब़ेड़ी ते आपणे ब़ा नु छोड़ती कने ओह्चे भांसु टुरती पले ।
ईशु ने लौका नु ठीक करले
(लूका 6.17-19)
23 i ईशु सारै गलील क्षेत्र मां यहुदी प्राथनाघर मां स्वर्ग चे राज्य चा सुसमाचारा चा उपदेश ङिता ते हर प्रकारा चे रोगा नु ते कमजोरिया नु दुर करता घुमु लागला । 24 सारै सीरिया देशा मां ओह्चा समाचार फैलती गेला ते बन्दी सारा बिमारा नु, जको हर तरह चिया बीमारियां मां ते ङुखा मां जकड़ले आले हुते, ते जांचे मां ब़लाया हुतिया, ते मिर्गी आले, ते लकवे चे मारले आले हुते, ओह्चे गोढु गेहती आले, ते ओह्णे वानु ठीक करले । 25 ऐ वास्ते गलील प्रदेश, ङस नगर, यरुशलेम नगर, यहुदिया ते यरदन नदी चे पार ची बन्दी ब़ङी भीड़ ओह्चे भांसु टुरती पली ।