यूहन्ना बपतिस्मा ङेणे आले ची हत्या
( मरकुस 6:14-21,लूका 9:7-9)
14
1 ओ वख्ता पे चौथाई देश चा राजा हेरोदेसा ने ईशु ची चर्चा सुणली; 2 ते आपणे सेवका नु केहले, “हा यूहन्ना बपतिस्मा ङेणे आला छे, ओ मरला आला मु जीता हुती गेला, ऐ वास्ते ओह्चे कनु सामर्थ चे काम प्रगट हुवी पले ।”3 कांकि हेरोदेसा ने आपणे भऊ फिलिप्पुस चे जिते रहते ओची घराआली हेरोदियास चे कारण यूहन्ना नु पकड़ती ब़ाथी ते जेली मां नाखती ङिले, 4 कांकि यूहन्ना ने ओह्नु केहलेते, कि हेरोदियास राणी नु राखणे दुधे वास्ते व्यवस्था चे अनुसार ठीक कोह्नी ।” 5 ऐ वास्ते हेरोदेस ओह्नु मारवाणे चावे ला, पर बन्दा कनु ङरता कांकि बन्दी ओह्नु भविष्यवक्ता मनती ।
6 जिसे बेह्ले हेरोदियास चा जन्मदिन आला, ते हेरोदियास ची धू राजकुमारी खुशी लारे मेहमाना चे सामणे नचती कने हेरोदेस नु खौश करले । 7 “ऐचे पे ओह्णे कसम खाती कने वचन ङिला, जको कौछ तू मांगे ‘मैं तनु ङिही ।”
8 वा आपणी आई चे बेह्काणे पे ब़ोली, “यूहन्ना बपतिस्मा ङेणे आले चे ठोङ थाली मां इठी ही मंगवाती ङे ।”
9 राजा ङुखी हुला पर आपणी कसमी ते मेहमाना चे कारण, यीची मांग पूरी करली जाओ, हुकम ङिती ङिला । 10 ते ओह्णे जेली मां कानु भेजती कने यूहन्ना चे ठोङ बढ़वाती नाखले । 11 ते ओह्चे ठोङ थाला मां चवीती आले ते छूवेरी राजकुमारी नु ङिले ओह्नु वा आपणी आई कनु चती गेली । 12 बल्ति यूहन्ना चे चेले आले ते ओह्चे शरीरा नु चती कने गाड़ती ङिले । ते जती कने ईशु नु हाल सुणाला ।
पांच हजार नु खुलाले
( मर 6: 30-44,लूका 9:10-17,यू 6:1-14)
13 जिसे बेह्ले ईशु ने हां सुणले, ते ओ ब़ेड़ी पे चढ़ती कने बरबरियान जग्हा सनु, एकान्त मां चाहला गेला । बन्दी हां सुणती कने नगर-नगर कनु पैदल ही ओह्चे भांसु टुरती पली । 14 ओह्णे निकलती कने हेक ब़ङी भीड़ ङेखली ते वांह्चे पे तरस खाला, ते वांह्चे बिमारा नु चंगे करले ।
15 जिसे बेह्ले ङियो थोला ते ओह्चे चेले ओह्चे गोढु आती कने किहुं लागले, “हा हेक बरबरियान जग्हा छे, ते देर हुवे पली बन्दा नु विदा करले जाओ, कांकि ये आस-पास चे गांवा मां जती कने आपणे वास्ते खाणे मोल गिहो ।”
16 बल्ति ईशु ने वानु केहले, “यांचे जाणे ठीक कोह्नी ! तम्ही यानु खाणे वास्ते ङिहां ।”
17 वाह्णे ओह्नु केहले, “इठे अम्चे कनु पांच रोटियां ते ङोन माछलीया नु छोड़ती कने कसा वी कोह्नी ।”
18 ईशु ने केहले, “वानु माये गोढु चती आवा ।” 19 बल्ति ओह्णे बन्दा नु तले खड़ा पे ब़ेहेसणे वास्ते केहले, ते वां पांच रोटियां ते ङु माछलीया नु चती कने, स्वर्गा चे सनु ङेखती कने नरीकारा नु धन्यवाद ङिला, ते रोटियां भान्ती-भान्ती कने चेला नु ङिलिया ते चेला ने बन्दा नु ङिलिया । 20 जिसे बेह्ले सारे खाती कने रजती गेले । ते चेला ने बचले आले टुकड़ा चा ब़ारहा ठोकरियां भरलिया आलिया चलियां । 21 अस्त्रीया ते ब़ाला नु छोड़ती कने ओठे खाणे आले लगभग पांच हजार मर्द हुते ।
ईशु चे पाणीयां पे टुरने
( मर. 6:45-52, यू. 6:15-21 )
22 बल्ति ईशु ने तुरन्त आपणे चेला नु ब़ेड़ी पे चड़णे वास्ते केहले, कि वे ओकनु पेहले गलील झील चे पार चाहले जाओ, कि जब तक ओ बन्दा नु बिदा करे । 23 ओ बन्दा नु बिदा करती कने प्राथना करने चे वास्ते पाहाड़ा पे चाहला गेला । ते ङियो थोले तक ओ ओठे हेकला हुता । 24 ओबेले ब़ेड़ी झील चे करीबन कई मीटर दुर लहरा लारे डगमगाऐ पलती, कांकि हवा सामणे ची हुती ।
25 ते ईशु ब़ङे बेह्ले झीली पे टुरती कने वांह्चे गोढु आला । 26 चेला ने ओह्नु झीली पे टुरती आते ङेखले ते घबराती गेले, ते आपस मां किहुं लागले, “हा ते कुई भूत छे ! ” ते ङरा कनु रोल मचाऊ लागले ।
27 बल्ति ईशु ने तुरन्त वांह्चे लारे ब़ोला ते केहले, “हिम्मत राखा । ! ‘मैं, छे,। ङरा ना । !”
28 पतरस ने ओह्नु उत्तर ङिला, “ओ प्रभु, अगर तू छी तां, ते मनु आपणे गोढु पाणीयां पे टुरने ची आज्ञा ङे ।”
29 ईशु ने केहले, “आ” ! बल्ति पतरस ब़ेडी कनु उतरती कने ईशु चे गोढु आती कने पाणीयां पे टुरु लागला । 30 ते तेज हवाई नु ङेखती कने फतरस ङरु लागला, ते जिसे बेह्ले ङुब़ू लागला, “हे प्रभु मनु बचा !”
31 ईशु ने तुरन्त आपणा हाथ आगु करती कने पतरसा नु पकड़ती गेले ते ओह्नु केहले, “ओ कमविश्वासी तें का शक करला ?
32 जिसे बेह्ले वे ब़ेड़ी पे चड़ती गेले ते हवा रुकती गेली । 33 ते जको लौक ब़ेड़ी पे हुते वाह्णे ओह्नु प्रणाम करले ते केहले, “तू सच्च मां नरीकारा चा पूत छी !”
गन्नेसरत मां रोगियां नु चंगे करले
( मर 6: 53:56)
34 वे झीली नु पार करती कने वे गन्नेसरत प्रदेश मां पुजले । 35 ऊठला बन्दा ने ईशु नु पिछाड़ती गेले ते आस-पास चे सारे देशा मां ओह्चे आणे चा समाचार भेजला, ते बन्दा ने सारे बिमारा नु ओह्चे गोढु आणले । 36 ते ओकनु बिनती करु लागले कि, ओ वा बीमार बन्दा नु आपणे ओढणा चा पला ही छू ङियो, ते जितना ने ओह्नु छूले, वे सारे चंगे हुती गेले ।