बीज राह्णे आले ची मिसाल
(मरकुस 4:1-9, लूका 8:4-8)
13
1 ओही ङियो ईशु ओ घरा नु छोड़ती कने झीली चे किनारे उपदेश ङियु ब़ेहसती रेहेला । 2 ब़ोहत बन्दी ओह्चे चारो तरफा भेली हुती गेली । ओ हेकी ब़ेड़ी पे जती कने बे़हसती रेहेला । ते भीड़ किनारे लारे भीली रेहली । 3 ओह्णे वानु मिसाला मां केहेती कने घणिया सारियां बाता बावड़लिया ।ओह्णे केहले कि, "हेक किसान बीज राहणे वास्ते गेला । 4 जिसे बेह्ले ओ राहवे पलता ला । ते कोच्छ बीज रास्ते चे किनारे जती कने ढे़ले, चिड़िया आलीया ओह्नु चुगती गेलिया । 5 थोड़े जा बीज पथरीली भोये पे जती कने ढे़ले, ओठे वानु घणी माटी कोह्नी मिड़ली, ते गहरी माटी ना मिलड़े चे कारण ऊ जल्दी उगती आले । 6 पर सूरज निकलणे पे ऊ बल्ति गेले ते जड़ा ने पकड़ने चे कारण सूखती गेले । 7 ते कोच्छ बीज झाड़ियां मां ढे़ले ते झाड़ियां ब़ङियां हुति कने ओह्नु दब़ाती नाखले । 8 ते कोच्छ आच्छी भोंये पे ढे़ले ते फल आला किठी ते साओ गुणा किठी ते साठ गुणा ते किठी ते तीस गुणा
9 जाये कान छी ऊ सुणती गियो ।
मिसाल चा मकसद
(मरकुस 4:10-12, लूका 8:9-10)
10 तां चेला ने गोढु आती कने ईशु नु केहले, “तू वांह्चे लारे मिसाला मां बाता कां करी वी ?”
11 ईशु ने जवाब ङिला, “तम्हानु तां वरदान ङिला गेला स्वर्ग चे भेता नु जाणने कले, पर वाहनु कोहनी ङिला गेला । 12 कांकि जाकनु छे ओह्नु होर वी ङिले जही; ओकनु घणे सारे हुती जही । पर जाकनु कोच्छ कोह्नी, ओकनु जको छे ऊं वी गेहती गेले जही । 13 ‘मैं, वांह्चे लारे मिसाली मां ऐ वास्ते बाता करें वे, कि ङेखते हुले वी ना ङेख सगो ते सुणते हुले वी ना सोण सगो । 14 तां वांह्चे बारे मां यशायाह ची हा भविष्यवाणी पूरी हुली, ‘पर तम्ही काना लारे तां सुणा, पर समझा ना; ते आंखी लारे तां ङेखा, पर तम्हानु कसा सूझी ना ।’ 15 ‘कांकि या बन्दा चे मन मोटे हुती गेले, ते काना लारे उंचे सुणी ते आपणियां आंखिया बन्द करती गेलिया; कङी इसड़े ना हो कि वे आंखिया लारे ङेखी, ते काना लारे सुणी, ते मना लारे समझी ते फिरती जई मैं वांह्चा उध्दार करी ।’
16 “पर धन्न छी तम्चीया आंखिया जको ङेखी, ते तम्चे कान जको सुणी । 17 कांकि ‘मैं, तम्हानु सच किहे पला, कि घणे सारे भविष्यवक्ता ने ते धर्मीया ने जिसिया बाता नु ङेखणे चाहले, पर वानु कोह्नी ङेख सगले । वानु तम्ही ङेखा पले । ते जिसिया बाता नु वे सुणने चाहवे ले, पर वे वानु कोह्नी सोण सगले । वानु तम्ही सुणा पले ।”
बीज राहणे ची मिसाल चा अर्थ
(मरकुस 4:13-20, लूका 8:11-15)
18 “पर तम्ही बीज राहाणे आले ची मिसाल सुणा । 19 जको कुई राज्य चा वचन सुणती कने नी समझी ओह्चे मना जको कोच्छ राहले गेलेते, ओह्नु दोष्ट आती कने खोसती कने चाहला जाऐ, ई ऊंही बीज छे, जको रस्ते चे किनारे राहले गेहले ले । 20 ते जको पथरीली भोये पे राहले गेलते ले, ई ऊंही बीज छे, जको वचन सुणती कने खुशी लारे मनती गिहे । 21 पर आपणे भीतर जड़ ना राखणे चे कारण ऊ थोड़े ही ङिहां चे छे । ते जिसे बेह्ले वचना चे कारण क्लेस या परेशानी आवे, ते तुरन्त ठोकर खाती जाऐ । 22 जको झाड़ियां मां राहाले गेले, ई ऊंही बीज छे, जको वचना नु सुणे, पर ऐ संसारा ची चिन्ता ते धना ची लालच वचना नु दबाती नाखे, ते ऊं फल ना आण सगी । 23 जको आच्छी भोये मां राहले गेले, ईं ऊंही बीज छे, जको वचना नु सुणती कने समझे, ते फल आणे; कुई तां साओ गुणा, कुई साठ गुणा ते कुई तां तीस गुणा "।
जंगली बीजा ची मिसाल
24 ईशु ने वानु हेक ङूजी मिसाल ङिली; “स्वर्गा चा राज्य ओ बन्दे चे रोक छे जेह्णे आपणे खेता मां आच्छे बीज राहाले । 25 जिसे बेह्ले बन्दी नूहली ही पलती ली ते ओह्चा दुशमन आती कने कणकी चे बीज मां जंगली बीज राहाली कने चाहला गेला । 26 जिसे बेह्ले कणकी ची सीटी लागली ते जंगली खड़ा ची ब़ूटी वी ङिसली । 27 ऐचे पे घरा चे दासा ने आती कने मालिका नु केहले, ‘ओ स्वामी, का तें आपणा खेता मां आच्छे बीज कोह्नी राहाले ते ? बल्ति जंगली खड़ा ची ब़ूटी ओह्चे मां किठु आली ?’ 28 ते ओह्णे वानु केहले, ‘ईं कुई दुशमना चे काम छे’ । दासा ने ओह्नु केहले, दुधी का इच्छा छे, कि अम्ही जती कने वानु भेली करती गिहुं ?’ 29 ओह्णे केहले, 'ना' इसड़े ना हो कि जंगली ब़ूटा नु भेले करते वख्ता पे तम्ही कणकी चे ब़ूटा नु वी पटती नाखा । 30 फसल बाढ़णे चे वख्ता तक ङूहू नु हेकी लारे बधु ङिहां, ते बाढ़णे चे वख्ता पे में बाढ़णे आला नु किही, ‘कि पेहले तां जंगली खड़ा चे ब़ूटा नु चुणती कने ब़ालणे वास्ते वांह्चे गन्ढे़हे ब़ाह्ती गेहजा, ते कणकी नु माये पीड़ा भेले करती नाखा ।’ ”
राई चे ङाणा ची मिसाल
(मरकुस 4:30-32, लूका 13:18-19)
31 ईशु ने हेक नेरी मिसाल ङिली, “स्वर्ग चा राज्य राई चे ङाणे रोक छे, कुई बन्दे ने आपणे खेता मां जती कने बीज राहाती नाखले । 32 ऊं सारे बीजा मू छोटे रिहे पर जिसे बेह्ले ब़ङे हुती जाऐ, ते खेता चे सारे ब़ूटा कनु ब़ङे हुती जाऐ; ते इसड़े ब़ुटे हुती जाऐ कि आसमाना चे पखीये आती कने ओचिया लड़िया पे बसेरा करी ।”
खमीरा ची मिसाल
( लूका 13:20-21)
33 ईशु ने वानु हेक नेरी मिसाल सुणाली, “स्वर्गा चा राज्य खमीरा रोक छे जेनु कुई अस्त्री ने चती कने तीं पंसेरी आटे में मिलाती ङिले ते ऊ हुते-हुते सारे खमीर बणती गेले ।”
मिसाल चा इस्तेमाल
(मरकुस 4:33-34)
34 ये सारियां बातां ईशु ने मिसाला मां बन्दा नु केहलियां, ते बिना मिसाल चे ओ वानु कहीं ना केहता । 35 कि जको वचन भविष्यवक्ता चे द्वारा केहेला गेलता ला, ओ पूरा हो, “मैं मिसाल कहणे कले आपणे मूंह खोली मैं वा बातां नु जको सृष्टि ची शुरुआत कनु लुकलिया पलतीया मैं वानु किही ।”
जंगली खड़ा ची मिशाल
36 बल्ति ओ भीड़ी नु छोड़ती कने घरे आला, ते ओह्चे चेला ने ओह्चे गोढु आती कने केहले, “खेता चे जंगली खड़ा ची मिसाल अम्हानु समझाती ङे ।’
37 ईशु ने वानु जवाब ङिला, ‘आच्छे ङाणा नु राहणे आला ‘मैं, बन्दे चा पूत छै । 38 खेता संसार छे, आच्छे ङाणे राज्य उलाद छे, ते जंगली ङाणे दोष्ट ची उलाद छे । 39 जिसे दुशमना ने ओह्नु राहले ओ शैतान छे, फसल बाढ़णे ऐ जगत चा अन्त छे, ते फसल बाढ़णे आले स्वर्गदूत छी । 40 ‘तां जिसे बेह्ले जंगली खड़ भेले करले जही ते ब़ाढ़ले जही, ते इसड़े ही जगत चे अन्त मां हुवी । 41 ‘मैं, बन्दे चा पुत आपणे स्वर्गदूता नु भेजी, ते वे ओह्चे राज्य कनु सारे पापिया नु, ते वानु जको बन्दा नु पाप करवाणे वास्ते भेल करी वी । 42 ते वानु जाखते चे भटटी मां नाखे जिठे रोणे ते ङांत पीसणे रिही । 43 ओ वख्ता पे धर्मी आपणे ब़ा चे राज्य मां सूरजा रोक चमके । जाऐ कान छी ऊ सुणती गिहो ।”
लुकले आले खजाने ची मिसाल
44 “स्वर्गा चा राज्य खेता मां लुकले आले धन रोक छे, कुई बन्दे ने ओह्नु सोले ते बल्ति लुकाती नाखले, ते खुशी लारे जती कने आपणे सारे कोच्छ बेचती नाखले ते ओ खेत मोल गेहती गेला ।”
अनमोल मोतिया ची मिसाल
45 “बल्ति स्वर्गा चा राज्य हेक व्यापारिया चे रोक छे, जको आच्छे मोतिया ची खोज मां हुता । 46 जिसे बेह्ले हेक किमती मोती मिड़ला ते ओह्णे जती कने आपणे सारे कोच्छ बेचती नाखले ते ओह्नु मोल गेहती गेले ।
जाल ची मिसाल
47 “बल्ति स्वर्गा चा राज्य ओ बङे जाल चे रोक छे जको समुद्रा मां नाखती ङिला जाऐ, ते हर-प्रकार चिया माछलीया नु समेटती आवे । 48 ते जिसे बेह्ले जाल भरिती जाऐ, ते मछुवारे ओह्नु किनारे पे छिकती आवी ते ब़ेहसती कने आच्छियां - आच्छियां माछलीया नु ठांवा मां भेलिया करी, ते निकम्मियां - निकम्मियां नु भूकाती नाखी । 49 ऐ जगत चे अन्त मां इसड़े ही हुवी । स्वर्गदूत आती कने दुष्टा नु धर्मीया कनु अलग करे । 50 ते दुष्टा नु जाखते ची भटटी मां नाखती ङिये । ते जिठे रोणे ते ङांत पिसणे हुवी ।
पुराणी ते नवीं शिक्षा चा मतलब
51 ईशु ने आपणे चेला नु केहले, “का तम्ही ये सारियां बाता समझलियां ?” वाह्णे केहले, ‘हवे’ ।
52 ईशु ने वानु केहले, “ऐ वास्ते हर-हेक शास्त्री जको स्वर्गा चे राज्य ची शिक्षा पाती चुकला, ओ घरा रोक छे, जको आपणे भीतरु नवियां ते पुराणीया चीजा नु काढ़ी ।”
नासरत मां ईशु चा आदर कोह्नी करला
( लूका 13:20-21)
53 जिसे बेह्ले ईशु ये सारियां मिशाला केहती चुकला, ते ऊठु चाहला गेला । 54 ते आपणे नासरत नगरा मां आती कने वांह्चे आराधनालय मां वानु इसड़ा उपदेश ङियु लागला वे चकित हुती कने किहे लागले, “ऐनू हां ज्ञान ते सामर्थ चे काम किठु मिड़ले ? 55 का हां बढ़ई (खाती) चा पूत कोह्नी ? ते का ऐची आई चे ना मरियम कोह्नी ते ऐचे भावा चे ना याकूब , यूसुफ , शिमौन ते यहूदा कोह्नी ? 56 ते का ऐचियां सारियां ब़हणियां आपणे बीच मां कोह्नी रिही ? बल्ति ऐनू हां सारा ज्ञान किठु मिड़ळा ?” 57 ते ओह्चे कारण लौका ने ठोकर खाली ।