सब्त चे बारे मां सवाल
(मरकुस 2:23-28, लूका 6:1-5)
12
1 ओही बेह्ले ईशु सब्ताa चे ङियो कणकी चे खेता महु जाये पलता ला, ओह्चे चेला नु भोख लागली ते वे कणकी ची सीटी पटती मरोड़ती खऊ लागले । 2 पर जिसे बेह्ले फरीसिया ने हा ङेखती कने केहले, "दुधे चेले ऊं काम करी पले जको सब्ता चे ङियो करने ठीक कोह्नी ।”3 ऐचे पे ईशु ने वाकनु पुछले, “का तम्ही कोह्नी पढ़ले कि दाऊद राजा ते ओह्चे साथिया ने, जिसे बेह्ले वानु भोख लागली तां वाह्णे का करले हुते ? 4 वाह्णे तां नरीकारा चे मन्दरा मां घिरती कने नरीकारा नु चढ़ावा आलीया पवित्र रोटिया खालिया जाहनु खाणे ना ता ओह्चे कले ठीक हुते ना, ओह्चे साथिया कले ठीख हुते ,पर सेर्फ याजका कले ठीक हुते । 5 का तम्ही मूसा चा नेम कोह्नी पढ़ला कि मंदरा चे याजक सब्त चे ङियो कामा करने चे अनुसार नेमा नु तरोड़ती नाखी बल्ति वी वे बेकसूर रीही ? 6 पर मैं तम्हानु किहे पला, की इठे ‘मैं, छै जको मंदरा कनु वी बढ़ती कने छी । 7 अगर तम्ही पवित्र शास्त्र चा मतलब जाणा हा तां, ‘मैं, दया चाहवे, बलिदान ना, तां तम्ही बेकसूर चेला नु दोषी ना बणावा हा ।’ 8 कांकि ‘मैं, बन्दे चा पुत सब्त चे ङियो चा वी प्रभु छै ।’ ”
ईशु ने सूखले हाथा आले बन्दे नु ठीक करले
(मरकुस 3:1-6, लूका 6:6-11)
9 ऊठु निकलती कने ईशु वांह्चे आराधनालय मां गेला । 10 ‘ङेखा, ओठे हेक सूखले आले हाथा चे बन्दे हुते । तां फरीसिया ने ईशु पे दोष लाणे वास्ते हेके मकसद लारे ओकनु हेक सवाल पुछला, “का सब्त चे ङियो कनु चंगे करने ठीक छे ?”
11 ओह्णे वानु केहले, “तम्चे मुं इसड़े कूण छे, जाई हेक भेङ हो ते वा सब्त चे ङियो खङे मां ढे़हेती पड़ो, ते का ओ वीनु पकड़ती कने विनु ब़ाहरु नी काढ़ी ? 12 ते हेक बन्दे चा मोल, भेङी कनु बढ़ती कने कितना छे ! ऐ वास्ते सब्त चे ङियो चंगे करने ठीक छे ।” 13 बल्ति ओह्णे ओ बन्दे नु केहले, “आपणा हाथ आगु कर ।”
ओह्णे करला, ते ओ ङुजे हाथा चे रोक ठीक हुती गेला । 14 बल्ति फरीसी ऊठु चाहले गेले ते ईशु नु मारने वास्ते कुई रस्ता सोधणे ची तरकीब सोचु लागले ।
ईशु ऊंही करता जेचे वास्ते नरीकार ने ओह्नु चुणले हुते
(मरकुस 3:1-6, लूका 6:6-11)
15 पर ईशु ईं जाणती गेला ते ऊठु चाहला गेला । ब़ङी भीड़ ओह्चे भांसु टुरती पली, ते ओह्णे वानु घणिया सारिया बिमारीया कनु ठीक करले । 16 “ईशु ने वानु चेतावनी ङिली कि माये बारे मां बन्दा नु कसा वी ना बावड़जा ।” 17 हां ऐ वास्ते हुले कि भविष्यवक्ता यशायाह चे द्वारा नरीकारा ने जको कहेलते ले ऊ पूरे हो ।
18 “ङेखा, हां माया सेवक छे
जेनु मैं चुणले,
हा माया प्यारा छे
मैं एकनु खौश छे ।
मैं आपणी आत्मा ओह्चे मां नाखी
ते हा सारिया कौमा चा
सही न्यां ची घोषणा करी ।
19 हा कङी वी नी चीखी
ते नाही झगड़ा करी,
ते ना कुई ओची आवाज गलिया मां सुणी ।
20 ते ओ झुकले आले काने नु नी पटी,
ओ ब़ुझते हुले ङिवे नु नी ब़िझावी,
ओ भीला रिही, ओबेले तक
जबतक न्यां ची जीत ना हुती जाओ ।
21 ते सेर्फ ओह्चे नावां लारे ही
सारी बन्दी ओह्चे पे आस राखे ।”
ईशु ते बालजबुल
(मरकुस 3:20-30, लूका 11:14-23)
22 बल्ति ईशु चे गोढु बन्दी इसड़े अन्धे नु गेहती आले जको गुंगा हुता कांकि ओह्चे मां बुरी ब़ला हुती । ईशु ने ओह्नु ठीक करती ङिले ते ओ गुंगा अन्धा ब़ोलु ते ङेखु लागला । 23 ऐचे पर पूरी भीड़ ब़ोहत अचम्भा करती किहुं लागले, “का ईं बन्दे दाऊद चा पुत हो सगे ?”
24 जिसे बेह्ले फरीसिया ने ईं सुणले ते वे ब़ोले, “हां ब़लाया चे सरदार बालजबुल ची सहायता लारे शैताना नु ब़ाहरु काढ़े ।”
25 ईशु ने वांह्चे विचारा चा पता लागली गेला । ओ वानु किहुं लागला, जिसे राज्ये मां फुट पड़ती जाऐ ते औ नाश हुती जाये, ते जिसे शहर जा घरा फूट पड़ती जाये ऊं बणले ना रिही । 26 ते अगर शैतान ही शैताना नु काढ़े तां ओ खौद चा ही विरोधी हुती जई, बल्ति ते ओह्चा राज्य किवें भीला रहे सगी ? 27 अगर ‘मैं, बालजबुल ची सहायता लारे ब़लाया नु काढ़े, तां तम्चे चेले काई सहायता लारे काढ़ी । ऐ वास्ते तम्चे चेले ही तम्चा न्यां करे । 28 पर अगर ‘मैं, नरीकारा ची आत्मा चे द्वारा ब़लाया नु काढ़े, ते नरीकारा चा राज्य तम्चे गोढु आती गेला ।
29 “कुई ताकतवार बन्दे चे घरा नु किवें लुट सगे ? जबतक की ओ ताकतवार बन्दे ब़ाधी ना नाखो ऐचे बाद ओह्चे घरा नु लूट सगे ।
30 “जिसे माये लारे कोह्नी, ओ माया विरोधी छे ; ते जको माये लारे खिन्डरले आले बन्दा नु भेले करवाणे मां माई मदत ना करी, ओ वानु खन्डेरे पला । 31 ऐ वास्ते ‘मैं, तम्हानु सच किहे पला, कि सारा ची हर-तरीके चा अपमानb ते पाप क्षमा करती ङिले जाऐ, पर पवित्रआत्मा चा अपमान करने आला नु क्षमा नी करले जही । 32 ते जको कुई ‘मैं, बन्दे चे पुता चे विरोध मां कुई बात किही ओह्नु क्षमा करले जही, पर जको कुई पवित्रआत्मा चे विरोध मां कुई कसा वी किही, ओह्चा हा कसूर ना ते ऐ युगा में, ना ते आणे आले युगा मां क्षमा करला जही ।
ब़ूटे आपणे फला कनु पिछाणले जाये
( लूका 6:43-45)
33 “तम्ही जाणा कि ब़ूटे आच्छे छै, ते ओह्चे फल वी आच्छे छै, अगर तम्ही ब़ूटे नु निक्कमे किहा, ते ओह्चे फल वी निक्कमे छै, कांकि ब़ूटे आपणे फल कनु ही जाणले जाये । 34 “हे ओ नागा ची ब़ाले ! जिसे बेह्ले तम्ही बुरे छिवा ता तम्ही आच्छीया बाता किवें कर सगा ? कांकि जको मना मां भरीले पले ऊंही मुंहा पे आवे । 35 भले बन्दे आपणे भले मुंहा कनु, भलिया बाता काढे़ । ते बुरे बन्दे आपणे बुरे मुंहा कनु, बूरीया बाता काढे़ ।
36 कांकि मैं तम्हानु बावड़े पला, कि न्यां चे ङियो हर हेक बन्दे नु जको ओह्णे आपणे मुंहा लारे बुराई बाता केहलिया, वांह्चिया सारिया चा हिसाब ङेणा पड़ी । 37 कांकि तू आपणियां बाता चे लारे ही बेकसुर, ते आपणिया बांता चे लारे ही कसुरवार ठहराला जाऐ ।”
स्वर्गीय निशानी
(मरकुस 8:11-12, लूका 11:29-32)
38 बल्ति कोच्छ शास्त्री ते फरीसिया ने ईशु नु केहले, “गुरु, अम्ही तोकनु स्वर्ग ची कुई निशानी ङेखणे चांहु ।”
39 बल्ति ओह्णे उत्तर ङिला, “ऐ युगा चे बुरे ते गलत विचारा ची बन्दी अचम्भे ची निशानी ङेखणे चाहवी । भविष्यवक्ता योना चे अचम्भे चे चिन्ह ना छोड़ती कने, वानु होर कुई अचम्भे चा चिन्ह नी ङिला जही । 40 कांकि जिंवे योना तीन ङियो ते तीन राती ब़ङी माछली चे ढ़िढा में रहेला, ते जुही ‘मैं, बन्दे चा पुत वी तीन ङिये ते तीन राती धरती चे ढ़िढ़ा मां रिही । 41 न्यां चा ङियो नीनवे नगर ची बन्दी ऐ पीढ़ी चे बन्दा लारे ओठ खड़ी हुंवे ते वानु दोषी ठहरावे, कांकि ने योना चा प्रचार सुणती कने पश्चाताप करला; ते ‘ङेखा, इठे ‘मैं, छे जको योना कनु वी बढ़ती कने छे । 42 न्यां चे ङियो दक्षिण ची राणी ऐ पीढ़ी चे बन्दा लारे खड़ी हुवी, ते तम्हानु अपराधी ठेहरावी, कांकि वा धरती चे ङुजे छोर कनु सुलेमान चा उपदेश सुणु आलती ली, ते ‘ङेखा, इठे ता मैं छै जको सुलेमान कनु वी बङा छे ।
बन्दा मां शैतान
( लूका 11:24-26)
43 “जिसे बेह्ले, बूरी ब़ला कुई बन्दे महु निकलती जाये, तां वा आरामा वास्ते सूखी भोये पे इंगे-उंगे भटकती फिरती रिहे, पर विनु आराम ना मिली । 44 बल्ति वा किहे, ‘की जिसे घरा नु मैं छोड़ती आली, मैं बल्ति उठी चाहलीस जही, बल्ति वा वापस आवे, ते विनु ऊ घर साफ सुथरे ते संजले सवरले आले लाभे । 45 बल्ति वा वापस आवे ते आपणे लारे सात नेरीया ब़लाया नु गेहेली आवे, ते जको विकनु वी घणिया बुरिया रिही । बल्ति वे सारिया आती कने ओठे रिहुं पड़ती जई ते ओ बन्दे ची दशा पेहले कनु वी ब़ोहत भयानक हुती जाऐ । आज़ ची ऐ बुरी पीढ़ी चे बन्दा ची दशा वी इसड़ी हुवी ।”
ईशु चे ब़ेहणी ते भावे ते ओची आई
(मरकुस 3:31-35, लूका 8:19-21)
46 ओ हली भीड़ी चे बन्दा लारे बाता करे ही पलताला, कि ओची आई ते भऊ ओठे आती कने ब़ाहरु भीली रहेती गेली । वे ईशु लारे बाता करने चे वास्ते इंतजार करी पलती ली । 47 कने ईशु वानु केहले, “सोण दुधी आई ते दुधे भऊ ब़ाहरु भीली ली, ते दुधे लारे बात करने चाहवी ।”c