ईशु ते यूहन्ना बपतिस्मा देणे आला
(लूका 7.18-3 5)
11
1 जिसे बेह्ले ईशु आपणे ब़ारहा चेला नु हुकम ङिता चुकला, ईशु उठु टुरती पला ते गलील प्रदेश चे नगरा मां उपदेश ङिता घुमता फिरता ।2 यूहन्ना बपतिस्मा ङेणे आला जको जेली मां ईशु चे कामा चा समाचार सुणला ते आपणे चेला नु ओह्चे गोढु हा पुछणे कले भेजले । 3 वाह्णे पूछले, “का आणे आला तू ही छी, या हम्मा अम्ही काये ङुजे चा इन्तजार करु ?”
4 ईशु ने जवाब ङिला, “जको कसा तम्ही सुणा वी ते ङेखा वी, ऊं सारै जती कने यूहन्ना नु केहती ङिहा । 5 कि अंधे ङेखी, ते लंगड़े टुरी-फिरी, ते कोहड़ी आच्छे करले जईa, ते बहेरे सुणी, ते मुर्दे जीते करले जई ते कंगाला नु सुसमाचार सुणाला जई । 6 ते धन्न छी वे, जको माये पे भरोसा करना ना छोड़ी ।”
7 जिसे बेह्ले यूहन्ना बपतिस्मा ङेणे आले चे चेले उठु चाहले गेले, तां ईशु यूहन्ना चे बारे मां बन्दा नु किहुं लागला, “तम्ही बरबरियान मां का ङेखु गेलते ले ? का हवाई लारे हलते हुले काने नु ? 8 बल्ति तम्ही का ङेखु गेलते ले ? का मुलायम ओढणी घाले आले बन्दे नु ? ङेखा, जको मुलायम ओढणी घाली वी, वे राज भवना मां रिही वी । 9 ते बल्ति का गेलते ले ? का कुई भविष्यवक्ता नु ङेखणे वास्ते ? हां मैं तम्हानु किहे पला कि जको तम्ही ङेखला ओ भविष्यवक्ता कनु वी बङा छै । 10 हा ओ ही छे जाये बारे मां लिखले पले, ‘ङेख, मैं आपणे दूता नु दुधे आगु-आगु भेजे पला, जको दुधे आगु दुधा रस्ता तियार करी ।’
11 मैं तम्हानु सच किहे कि जको आस्त्रियां कनु जमले, वांह्चे मु यूहन्ना बपतिस्मा ङेणे आले कनु कुई बङे कोह्नी, पर जको स्वर्ग चे राज्य मां छोटे कनु छोटा छे ओ यहुन्ना बपतिस्मा ङेणे आले कनु बङा छे । 12 यूहन्ना बपतिस्मा ङेणे आले चे ङिहां कनु लाती हमा तक स्वर्ग चे राज्य मां ताकत लारेb प्रवेश हुता रेहला, ते बलवान ओह्नु खोसते रिही । 13 यूहन्ना तक चे सारे भविष्यवक्ता ते मूसा चे नेम चे जाणकार राज्य चे बारे मां ब़ोलते रेहले । 14 ते चावा तां मना कि यूहन्ना हाओ एलिय्याह छै, जको आणे आला छै, जेणे भविष्यवाणी करली हुती । 15 जाये कान छी, ऊं सुणती गिहो ।
16 “मैं ऐ वख्ता चे बन्दा ची तुलना किवें ङिये ? वे वा ब़ाला चे रोक छी जको बजारा मां ब़ेह्ले हेके- ङुजे नु साङ ङिती कने किही, 17 ‘अम्ही तम्चे वास्ते बांसुरी बजाली ते तम्ही कोह्नी नचले, अम्ही रोले, ते तम्ही छाती कोह्नी पिटली ।’ 18 ते यूहन्ना बपतिस्मा ङेणे आला, नेरा रोक ना खाता आला ते ना पीता आला, ते ‘वे किही, कि ओह्चे मां शैतान छे ।’ 19 ‘मैं, बन्दे चा पुत खाता-पीता आला, ते वे किही ‘ङेखा, ढे़डलाली फिरे खाणे पीणे आले बन्दे, मेहसूल गेहणे आला चा ते पापियां चा दोस्त ! पर नरीकारा चा ज्ञान आपणे कामा कनु सच्चा ठेहेराला गेला ।”
अविश्वासिया पे हाय हाय
(लूका 10.13-15)
20 बल्ति ईशु वा नगरा चे बन्दा नु उलाहणा ङियु लागती गेला, वांह्चे मां ओह्णे घणे सारे अचम्भे चे काम करले ते, कांकि वाह्णे आपणे मना नु कोह्नी फिरालते ले । 21 “हाय खुराजीन शहर ! हाय बैतसैदा ! जको अचम्भे चे कामा तम्चे मां करले गेले, अगर वे सूर ते सैदा मां करले जई हा तां, ऊठली बन्दी टाट ओढती ते केरी मां ब़ेहसती कने वे कङकणा चे मन फिराती गिही हा । 22 पर ‘मैं, तम्हानु किहे पला कि न्यां चे ङियो तम्ची दशा कनु सूर ते सैदा ची दशा घणी सेहेणे चे लायक हुवी । 23 ओ कफरनहूम, का तू स्वर्गा कनु ऊंचा करला जाऐ ? तू तां अधोलोक तक तले चाला जाऐ, जको अचम्भे चे काम दुधे मां करले गेले, अगर सदोम मां करले जहिया तां आजतक ओ बणला रिहे हा । 24 पर मैं तम्हानु किहे, कि न्यां चे ङियो दुधी दशा कनु सदोम ची दशा ब़ोहत सहणे चे लायक हुवी ।"
अराम ङेणे चा वादा
(लूका 10.21-22)
25 ओही बेह्ले ईशु ने केहले, “ओ ब़ा स्वर्ग ते धरती चा मालिक, मैं दुधा धन्यवाद करे पला कि ते या बाता नु ज्ञानिया ते समझदारा कनु लुकाती कने राखलिया, ते भोले पे जाहिर करलिया । 26 हां, ओ ब़ा कांकि तनु हाओ आच्छे लागले ।
27 माये ब़ा ने मनु सारे कोच्छ सौंपले, ते कुई पुता नु ना जाणी, हेको ब़ा, ते कुई ब़ा नु ना जाणी हेको पुत, ते वे ही बन्दी जाणी जाये पे पुत जाहिर करने चावे ।