ईशु चे ब़ारहा चेले
(मर. 3.13-19; लूका6.12-16)
10
1 बल्ति ईशु ने आपणे ब़ारहा चेला नु गोढु हकारती कने, वानु ब़लाया पे हक्क ङिला, कि वानु काढ़ो ते सारे तरीके ची बीमारिया ते हर तरीके ची कमजोरिया नु दूर करो ॥2 ते ब़ारहा प्रेरिता चे नाम ये छी : पहला शमौन, जको पतरस किहवावे, ते ओह्चा भऊ अन्र्दियास; जब्दी चा पुत याकूब, ते ओह्चा भऊ यूहन्ना; 3 फिलिप्पुस, ते बरतुल्मै, थोमा, ते चुंगी गेहणे आला मत्ती, हलफई चा पुत याकूब ते तददै । 4 शमौन देशभक्तॅ, ते यहूदा इस्करियोती, जेह्णे ओह्नु पकड़वाती वी ङिले ॥
ब़ारहा प्रेरिता चे सेवा - काम
(मर. 6.7-13; लूका 9.1-6)
5 या ब़ारहा नु ईशु ने हा आज्ञा ङिती कने भेजले, “कि गैर कोमा सनु ना जजा, ते सामरिया चे कुई नगरा मां ना घिरजा । 6 पर इस्राएल चे घराणे सनु ही जजा जको गार हुलिया आलिया भेङा चे रोक छी । 7 ते टुरते - टुरते प्रचार करते जजा कि 'स्वर्ग चा राज्य गोढु आती गेला । 8 बीमारा नु ठीक करा: मेला आला नु जिते करा: कोढ़िया नु आच्छे करा: ब़लाया नु काढ़ा । तम्ही मुफ्त मां गेला, ते मुफ्त मां ङिहां । 9 ते आपणे ब़टुवा मां ना ते सोना, ते ना रुपिये, ओर ना ता तांबा राखजा । 10 मार्गा टुरते बेह्ले ना ते झोली राखजा, जको तम्ही घाली फिरा यांचे अलावा कुई नेरा कुड़ता चजा, ना ते ब़ुट ते ना ते ङांग चजा, कांकि मजदुरा नु ओची रोटी मिलणी चाहीछे ।
11 जिसे कुई नगर या गांवा मां जावा ते पता काढ़ा कि ओठे भरोसे चे लायक कूण छै, “कि जब तक उठु कनु ना निकला, उठी ही रहेजा । 12 ते घरा मां घिरते बेह्ले ओह्नु आशीष ङिजा । 13 अगर ओ घरा ची बन्दी भरोसे चे लायक हुवे तां, ते तम्ची आशीष वांह्चे पे पुजीही, अगर वे लायक नी हुवे तां ते तम्ची आशीष पुठी आती जही । 14 ते जको कुई तम्हानु ग्रहण ना करी, ते तम्चीया बाता ना सुणी, ओ घरा मु या नगरा मु निकलते बेह्ले आपणे पगा ची माटी तक झाड़ती नाखा, कि हा वांह्चे वास्ते चेतावनी छै, कि अन्त चे ङिया मां नरीकार वानु ङन्ड ङिही । 15 मैं तम्हानु सच किहे पला, कि न्यां चे ङियो ओ नगर ची दशा कनु सदोम ते अमोरा चे देश ची दशा घणी सहणे चे लायक हुवी ॥
आणे आली मुसीबत
(मर. 13.9-13; लूका 21.12-17)
16 ङेखा, “मैं तम्हानु भेङा रोक भेड़िया चे बीच मां भेजे पला, ते नागा रोक हुशियार ते कबुतरा रोक भोले बणा । 17 पर लोका कनु सावधान रिहा, कांकि वे तम्हानु पंचेयता मां गेहती जाऐ, ते आपणिया प्राथना घरा मां तम्हानु कोड़े मरवावे । 18 तम्ही माये चेले होणे ची वजह कनु हाकिमा ते राजा चे सामणे पेश करले जवा, वांह्चे पे, ते नेरीया कोमा पे गवाह बणा । 19 जिसे बेह्ले वे तम्हानु पकड़वावे तां ये बाता ची चिन्ता ना करजा, कि अम्ही किसी रिति लारे; या ते बल्ति का किहुं । कांकि जको कोच्छ तम्हानु कहणे हुवी, ऊ ओही बेह्ले तम्हानु बावड़ती ङिले जही । 20 कांकि ब़ोलणे आले तम्ही नी हुवा पर तम्चे ब़ा नरीकार चा आत्मा तम्चे मां ब़ोली ।”
21 “भऊ, भावा नु, ते ब़ा पुता नु, धोके लारे मारने चे वास्ते सोंपी, ‘ते ब़ाल आई-ब़ा चे खिलाफ विरोधा मां खड़े हुती कने मरवाती नाखे । 22 माये नावां चे कारण सारी बन्दी तम्हा कनु बैर राखे, पर जको अन्त तक सब्र राखी ओह्चा ही उध्दार हुवी । 23 जिसे बेह्ले वे तम्हानु ऐ नगरा मां सतावी, ते ङुजा नगरा सनु नासती जजा । मैं तम्हानु सच सच किहे पला, तम्ही इस्राएल चे सारे नगरा मां फिरती चुका कि, ‘मैं, बन्दे चा पुत आती जही ॥
24 चेला आपणे गुरुवा कनु बङा कोह्नी; ते ना दास आपणे मालिका कनु । 25 चेले आपणे गुरुवा जिसड़े, ते दास आपणे मालिका चे बराबर होणे में ही तसल्ली करनी चाही छै । अगर घरा चे मालिका नु शैतान किहे, तां घरा चे नेरा बन्दा नु जाणे का का किहे ।!
काकनु ङरु ?
(लूका12.2-7)
26 “तां बन्दा कनु ना ङरजा, कांकि कसा ढ़कले कोह्नी पले, जको खोड़ले कोह्नी जही, ते ना कसा लुकले आले छै, जको जाणले कोह्नी जही । 27 जको मैं तम्हानु अन्धारे मां किहे, ओह्नु सोजले मां किहा । जको काना लारे सुणा, ओह्नु ब़न्हआ पे चड़ती कने प्रचार करा । 28 जको शरीरा नु घात करी, पर आत्मा नु घात ना कर सगी, वाकनु ना ङरजा, पर नरीकारा कनु ही ङरजा, जको आत्मा ते शरीर ङुहु नु नरक मां नाश कर सगे । 29 का पैसे मां ङोन चिड़िया ना बिकी ? तांवी तम्चे ब़ा ची इच्छा चे बिना वाह्चे मु हेक वी धरती पर ना ढे़ सग़ी । 30 तम्चे ठोङा चे माल वी सारे गिणले आले छी । 31 ऐ वास्ते ङरा ना, तम्ही ज्यादा चिड़िया कनु कीमती छिवा ।
ईशु कि वजह कनु शर्माणे कोह्नी
(लूका 12.8,9)
32 “जको कुई बन्दा चे साह्म्णे मनु मनती गिही, ओह्नु मैं वी आपणे स्वर्गीय ब़ा चे साह्म्णे मनती गिही । 33 पर जको कुई बन्दा चे साह्म्णे माया इन्कार करी, ओह्नु मैं वी आपणे स्वर्गीय ब़ा चे साह्म्णे इन्कार करही ।
शान्ती कोह्नी पर लड़ाई करवाणे वास्ते आला
(लूका 12.51-53; 14.26,27)
34 ईं ना समझा कि मैं धरती पर मिलाप कराऊ आला; मैं मिलाप कराणे वास्ते कोह्नी, पर सारा बन्दा मां फूट ते लड़ाई करवाणे वास्ते आला । 35 मैं तां आला कि : ‘छोरा नु ओह्चे ब़ा कनु, ते धुवे नु विची आई कनु, ते बहुवे नु विची सासवे कनु अलग करती ङियें; 36 बन्दा चे दुशमन ओह्चे घरा चे लौक ही हुवे ।
37 “जको आई जा ब़ा नु माये कनु ज्यादा प्यारे जाणे, ओ माये काबिल कोह्नी । ओ जको पूत जा धूवे नु माये कनु ज्यादा प्यारे जाणे, ओ माये लायक कोह्नी । 38 ते जको कुई माये वास्ते मरने कले ते ङोख चवणे कले तैयार कोह्नी, ओ माये लायक कोह्नी । 39 जको आपणी जेन्द बचाणा चाहवे, ओ विनु गूतीं ब़ेसी, ते जको माई वजह कनु आपणी जेन्द गुह्वीं, ओ विनु गिही ।
40 “जको तम्हानु मनी ऊ मनु मनी, ते जको मनु मनी, ऊ माये भेजणे आले नरीकारा नु मनी । 41 जको भविष्यवक्ता नु भविष्यवक्ता जाणतीकर मनी, ओह्नु भविष्यवक्ता चा फल मिली । ते जको धर्मी नु धर्मी जाणतीकर मनी, ओह्नु धर्मी चा फल मिली । 42 जको कुई यां छोटा मुं हेके नु माया चेला जाणती कर सेर्फ हेक गिलास पाणी पिलावी, मैं तम्हानु सच्च किहे पला, ऊ किवें वी आपणा फल नी गुहुवी ।”