पूर्वा कनु कई ज्योतिषी
2
1 हेरोदेस राजे चे ङिहा में जिसे बेह्ले यहुदिया चे बेतलहम में ईशु चा जन्म हुला ते पूर्वा कनु कई ज्योतिषी ज्ञानी बन्दी यरुशलेम में आती कने पूछु लागली, 2 यहुदिया चा राजा जाया जन्म हुला किठे छै ? कांकि अम्ही उभरते में ओह्चा तारा ङेखला ते ओह्नु डोक ङिऊ लागले ।3 हा सुणती कने हेरोदेस राजा ते ओह्चे लारे यरुशलेम ची सारी बन्दी घबराती गेली । 4 बल्ति ओह्णे बन्दा चे सारे प्रधान याजका नु ते शास्त्रीया नु भेले करती कने वाकनु पूछले “मसीह चा जन्म किठे होणा चाही छे ? 5 वानु ओह्णे केहले, “यहुदिया चे बेतलहम भविष्यवक्ता ने हा लिखले । 6 aओ बेतलहम तू प्रदेशा में ही, तू कुई वी रीति लारे यहुदा चे अधिकारिया में सारा कनु छोटा कोह्नी, कांकि दुधे महु हेक हाकिम निकली जको माई प्रजा इस्राएल चि रखवाली करी ।”
7 बल्ति हेरोदेस ने ज्योतिषिया नु हकारती कने पुछले कि तारा किसे ब़ेह्ले ङिसला । 8 ओह्णे वानु हा केहती बेतलहम में भेजले जावा ओ ब़ाला चे बारे मां पता करा कि जिसे ब़ेह्ले मिलती जाये तां मनु बावड़जा कि में वी आती कने मैं वी ओह्नु डोक ङिही ।
9 बल्ति वे राजे ची बात सुणती कने चाले गेले, ते तारा वी जको वाह्णे असमाना में ङेखला ओह्चे आगु-आगु जाये पलता ते वाह जग्ह में रुकती गेला जिठे ऊ ब़ाल हुते ते तारा ओह्चे ऊपर रुकती गेला । 10 जिसे ब़ेह्ले वाह्णे हा ङेखले तां वे बहुत खोश हुती गेले 11 बल्ति वे घरा चे भीतर गेले ते वाह्णे ओची आई मरियम लारे ब़ाला चे वी दर्शन करले वाह्णे ओह्नु ङोख ङिली ते नमस्कार करती कने उपासना करली ते किमती चीजा ची सिन्दुक खोड़ली ते सोना, लोबान ते गन्दरस ची भेंट ओह्नु चडाली । 12 पर नरीकारा ने वानु हेक सपने में वानु सावधान करती ङिले, कि तम्ही वापस हेरोदेस चे गोढु ना जजा वे अलग-अलग रस्ते कनु घरे चाहले गेले ।
मिस्त्र नु चाहले गेले
13 ज्योतिषिया चे चाहले जाणे चे बाद, यूसुफ नु खाबा मां प्रभु चा हेक स्वर्गदूत ङिसला ते ओह्णे केहले, “उठती कने ब़ाला नु ते ओची आई नु गेहती कने चोप-चाप करती मिस्त्र नु चाहला जा, ते जब तक में ना किहे, उठी रिहो, कांकि हेरोदेस ऐ ब़ाला नु मरवाणे पर छे । 14 युसूफ खङा हुला ते ब़ाला नु ते ओची आई नु गेहती कने राती नु ही मिस्त्र वास्ते टुरती पला । 15 bहेरोदेस चे मरने तक यूसुफ उठी रेहला । हा ऐ वास्ते हुले कि प्रभु ने भविष्यवक्ता चे जरिये जको केहले ले पुरे हो सगो, में आपणे पुता नु मिस्त्र कनु ब़ाहर आणे वास्ते केहले ।”
ब़ाला नु मारने
16 हेरोदेस ने जिसे ब़ेह्ले हा ङेखले कि ज्योतिषी विव्दाना ने माये लारे धोखा करला, ओह्नु गुस्सा आला, ते बन्दा नु भेजती कने, ज्योतिषिया चे केहले आले वख्ता चे अनुसार, बैहतलम ते ओह्चे आस-पास चे गांवा में ङुहु साला चे ब़ाला नु मरवाती नाखले ।
17 बल्ति भविष्यवक्ता यिर्मयाह चे जरिये केहला आला वचन पुरा हुला । 18 d‘रामाह गांमc में ङोख भरला आला हेक शब्द सुणला गेला, वा रोणे ची आवाज ते ब़ोहत ङुखा ची, राहेल आपेणे ब़ाला चे वास्ते रोऐ पलती, बल्ति वा चोप ना होणे चाहवेली, कांकि वे ब़ाले मरती गेलती ।
मिस्त्र देशा कनु वापस आला
19 बल्ति हेरोदेस ची मोती चे बाद मिस्त्र मां युसूफ चे खाबा में प्रभु चा स्वर्गदूत प्रकट हुला । 20 “ओह्नु केहले, “उठ आपणे ब़ाला नु ते ओची आई नु गेहती कने इस्राएल ची धरती पर चाहला जा कांकि वे सारा ब़ाला नु मारने आले हुते, वे मरती गेले ।” 21 युसुफ खड़ा हुला ते ब़ाला नु ते ओची आई नु गेहती कने इस्राएल देशा मां पुजला ।
22 बल्ति जिसे बेह्ले युसुफा ने हा सुणले कि यहुदिया पे आपने ब़ा हेरोदेस चि जग्हा पे अरखिलाउस राज करु लागला ते ओ ओठे जाणे कनु ङेरु लागती गेला पर, बल्ति खाबा में नरीकारा ची आज्ञा गेहती कने ओ गलील प्रदेश सनु चाहले गेले । 23 eओठे नासरत नावां चे नगरा में घर बणाती कने रिहुं लागला, ताकि भविष्यवक्ता चे जरिये केहला गेला वचन पुरा हुला कि हा ईशु नासरी किहवावे ।