मत्ती
मत्ती ची लिखली आली खोश खबरी
ईशु ची वंशावली
(लूका 3:23-38)
1
1 अब्राहमa कनु दाऊद, दाऊद कनुb, ईशु मसीहc ची वंशावली ची किताब ।2 अब्राहम कनु इसहाक पैदा हुला; इसहाक कनु याकूब पैदा हुला; ते याकूब कनु यहूदा ते औचे भऊ पैदा हुले । 3 यहूदा चे पुत फिरिस ते जोरह हुते । वाचीं आई चे ना तमार हुते । फिरिस, हिस्रोन चा ब़ा हुता। हिस्रोन एराम चा ब़ा हुता । 4 ते एराम कनु अम्मीनादाब पैदा हुला; ते अम्मीनादाब कनु नहशोन ते नहशोन कनु सलमोन पैदा हुला । 5 dते सलमोन ते राहब कनु बोअज पैदा हुला । ते बोअज ते रूत नु ओबेद पैदा हुला; ते ओबेद कनु यिशै पैदा हुला ।
6 eते यिशै कनु दाऊद राजा पैदा हुला । 7 ते दाऊद कनु सुलेमान ओस अस्त्री कनु पैदा हुला जको पहिले उरिय्याह ची रांङ हुती । 8 ते सुलेमान कनु रहबाम पैदा हुला; ते रहबाम कनु अबिय्याह पैदा हुला; ते अबिय्याह कनु आसा पैदा हुला; ते आसा कनु यहोशाफात पैदा हुला; ते यहोशाफात कनु योराम पैदा हुला, ते योराम कनु उज्जियाह पैदा हुला । 9 ते उज्जियाह कनु योताम पैदा हुला; ते योताम कनु आहाज पैदा हुला; ते आहाज कनु हिजकिय्याह पैदा हुला । 10 ते हिजकिय्याह कनु मनश्शिह पैदा हुला । ते मनश्शिह कनु आमोन पैदा हुला; ते आमोन कनु योशिय्याह पैदा हुला । 11 ते बल्ति इस्राएल चे बन्दा नु बन्दी बणाती बेबिलोन जाणे चे वख्ता पे योशिय्याह कनु यकुन्याह, ते ओची भावे पैदा हुली ।
12 बन्दी यानिकि गुलाम हुतिकर बेबिलोन पुजाले जाणे चे बाद यकुन्याह कनु शालतिएल पैदा हुला; ते शालतिएल कनु जरूब्बाबिल पैदा हुला । 13 ते जरूब्बाबिल कनु अबीहूद पैदा हुला, ते अबीहूद कनु इल्याकीम पैदा हुला; ते इल्याकीम कनु अजोर पैदा हुला । 14 ते अजोर कनु सदोक पैदा हुला; ते सदोक कनु अखीम पैदा हुला; ते अखीम कनु इलीहूद पैदा हुला । 15 ते इलीहूद कनु इलियाजार पैदा हुला; ते इलियाजार कनु मत्तान पैदा हुला; ते मत्तान कनु याकूब पैदा हुला । 16 ते याकूब नु यूसुफ पैदा हुला; जको मरियम चा मोंड़स जाह्कनु ईशु जको मसीह किह्वावे पैदा हुला ।
17 जुही अब्राहम कनु दाऊद तक चौङा पीड़िया हुलिया । ते दाऊद कनु लाती कने बन्दी यानिकी गुलाम बणाती कने बेबीलोन पुचाणे तक चौङा पीड़िया हुलिया, बल्ति बन्दी यानिकी गुलाम बणाती कने बेबीलोन पुचाणे चे वख्ता कनु लाती कने, मसीह चे पैदा होणे तक चौङा पीड़िया हुलिया ।
ईशु चा जन्म
(लूका: 2.1-7)
18 f हमा ईशु मसीह चा जन्म ऐ तरीके लारे हुला, कि जिसे बेह्ले ओची आई मरियम ची सगाई यूसुफ चे लारे हुली पलती, ते वांह्चे भेले होणे कनु पेहले वा पवित्र आत्मा ची ओर कनु ढ़िढ़ा लारे लाभली गेली ! 19 बल्ति विचा घरा आला यूसुफ ने जको धर्मी हुता ते विनु बदनाम ना करने चाहवे ला, विनु चोपचाप करती कने छोड़ने ची सोचली । 20 जिसे बेह्ले ओ या बाता ची सोच मां हुता, ते प्रभु चा स्वर्गदूत ओह्नु खाबा मां ङिसला ते केहले; “ओ यूसुफ दाऊद ची ऊलाद तु आपणी घरा आली मरियम नु आपणे इठे आणने कनु ना ङर; कांकि जको विचे ढ़िढ़ा मां छै, ऊं पवित्र आत्मा ची ओर कनु छै । 21 g “वा पूत जणी ते तु ओह्चे ना ईशु राखियो; कांकि ऊ आपणे लौका चा वांह्चे पापा कनु उध्दार करी ।”
22 ईं सारे कोच्छ ऐ वास्ते हुले कि जको वचन प्रभु ने भविष्यवक्ता चे जरिये केहलता ; पूरा हो । 23 h “ङेखा, “हेक कुवांरी ढ़िडा लारे हुवी ते हेक पुत पैदा करी, ते ओह्चे ना इम्मानुएल राखले जही ।” ‘जेचा मतलब, “नरीकार अम्चे लारे छै:।”