परम्परा पालन चा सवाल
( मरकुस 7:1-13)
15
1 बल्ति यरुशलेम कनु कोच्छ फरीसी ते यहुदी धर्मशास्त्री ईशु चे गोढु आती कने किहुं लागले । 2 दुधे चेले पितृआ ची परम्परा का टाली ? बिना हाथ धोले आले रोटी का खई ? 3 ईशु ने वानु उत्तर ङिला, “तम्ही वी आपणी परम्परा चे अनुसार का नरीकारा ची आज्ञा नु टाला वी ? 4 कांकि नरीकारा ने केहले, ‘तम्ही आपणे ब़ा ते आपणी आई चा आदर करा, ‘जको कुई ब़ा या आई नु बुरे किहे ऊ मारती नाखले जही ।’ 5 पर तम्ही किहा कि अगर कुई आपणे ब़ा या आई नु किहे, ‘जको कोच्छ माये कनु तम्हानु फेदा हो सगेला, ऊ नरीकारा चे वादे चे अनुसार भेंट चड़ाहती चुकले ।’ 6 ते ओ आपणे आई ब़ा ।a चा आदर ना करे , ऐ ही कारण तम्ही आपणी परम्परा चे कारण नरीकारा चा वचन टालती ङिला । 7 हे कपटियो! याशायाह भविष्यवक्ता ने तम्चे बारे मां भविष्यवाणी ठीक करली । 8 ‘ये बन्दी तां होठा लारे माया आदर करी, पर यांचे मन माये कनु सदा दूर रिहे । 9 ते यह बेकार मां माई उपासना करी, कांकि वांह्ची शिक्षा हेको बन्दा चे जरिये बणलै आले नियम छिते !’ ”अशुध्द करने आलिया बातां
( मरकुस 7:14-23)
10 बल्ति ईशु ने बन्दा नु आपणे गोढु हकारती कने केहले, “सुणा ते समझा । 11 जको मुंहा मां जाऐ, ऊ बन्दे नु अशुध्द ना करी वी, पर जको मुंहा महू नुकले ऊ बन्दे नु अशुध्द करे” । 12 बल्ति चेला ने आती कने ओह्नु केहले, “का जाणी वी कि फरीसिया ने हां वचन सुणती कने कितनी ठोकर खाली ?” 13 ईशु ने उत्तर ङिला, हर पौधे जको माये स्वर्गीय ब़ा ने कोह्नी लाले, ऊ उखाड़ले जहि” । 14 वानु तम्ही छोड़ा । वे अन्धा चे अन्धे नेता छी, अगर अन्धा, अन्धे नु ही रास्ता ङिखाणे तां वे ङोनी ही खङे मां ढेहती पड़े ।”
15 हां सुणती कने पतरसा ने ओह्नु केहले “हां मिसाल अम्हानु समझाती ङे” ।
16 ईशु ने केहले, “का तम्ही हमा तक नासमझ छिवा ? 17 का तम्ही ना जाणा ? की जको कौछ मुंहा मां जाऐ ऊ ढ़िढ़ा मां जाऐ, ते संडास चे जरिये कनु निकलती जाए । 18 पर जको कौछ मुंहा कनु नुकले, ऊ मना कनु निकले ते ऊंही बन्दे नु अशुध्द करे । 19 कांकि मना कनु बुरे विचार, हत्या, परस्त्रीगमन, व्यभिचार, चोरी, झूठी गवाही ते निन्दा मना कनु ही निकले । 20 ये ही बाता छी जको बन्दे नु अशुध्द करी वी, बिना हाथ धोले रोटी खाणे बन्दे नु अशुध्द ना करी वी ।
कनानी अस्त्री चा विश्वास
( मरकुस 7:24-30)
21 ईशु ऊठु निकलती कने, सूर ते सैदा चे प्रदेशा सनु चाहला गेला । 22 ओ प्रदेशा मूं हेक कनानी अस्त्री निकड़ली, ते रोल मचाती कने किहे लागली, “ओ प्रभु ! दाऊद ची सन्तान, माये पे दया कर । माई छूवेरी नु ब़ला ब़ोहत सताऐ पली ।”
23 पर ईशु ने विनु कसा वी जवाब कोह्नी ङिला । बल्ति ओह्चे चेला ने आती कने ओकनु बिनती करली, “विनु विदा कर, कांकि वा आपणे भांसु रोल मचाती आवे पली ।”
24 ईशु ने जवाब ङिला, “इस्राएल चे घराणे चिया गार हुलियां आलिया भेङा नु छोड़ती कने मैं काये कनु वी कोह्नी भेजला गेला ।”
25 पर वा आली, ते ईशु नु प्रणाम करती कने किहुं लागली, “हे प्रभु माई मदद कर ।”
26 ईशु ने उत्तर ङिला, “ब़ाला ची रोटी चती कने कुते आगु नाखणी ठीक कोह्नी ।”
27 विने केहले, “सच्चे प्रभु, पर कुते वी ओ बचला-सचला केरा खई वी, जको वांह्चे स्वामियां चे मजी कनु तले ढ़ेहती पड़े वे ।
28 ऐचे पे ईशु ने विनु उत्तर ङिला, “ओ अस्त्री, दुधा विश्वास ब़ङा छे जिसड़े तू चावी, दुधे वास्ते उसड़े ही हुती जाओ ।” ते विची छूवेर ओही बेह्ले ही ठीक हुती गेली ।
घणा बन्दा नु चंगे करने
29 ईशु ऊठु कनु गलील ची झील चे गोढु आला, ते पाहाड़ा पे चढ़ती कने ब़ेहसती रेहेला । 30 बल्ति हेक ब़ङी भीड़ ओकनु आली, वे आपणे लारे, लंगड़ा नु, अन्धा नु, गुंगा नु, टुन्डा नु ते घणा सारा नु ओह्चे गोढु आणले, ते वानु ओह्चे पगा पे नाखती ङिले, ते ओह्णे वानु ठीक करले । 31 जिसे बेह्ले बन्दा ने ङेखले कि गुंगे ब़ोल सगी, ते टुन्डे ठीक हुती जई, ते लंगड़े टुरु पड़ती जई, ते अन्धे ङेख सगी ते अचम्भा करती कने इस्राएल चे नरीकारा ची बड़ाई करली ।
चार हजार बन्दा नु खिलाणे
( मरकुस 8:1-10)
32 ईशु ने आपणे चेला नु हकारले ते केहले, “मनु ऐ भीड़ी पे तरस आऐ पला, कांकि तीन ङिहां तक ये माऐ लारे छी ते यांचे कनु कसा खाणे वास्ते कोह्नी, ‘मैं, वानु भूखे विदा करने ना चाहवी, कङी इसड़े ना हो कि वे रस्ते मां थाकती कने ढ़हेती ना पड़ो ।”
33 चेला ने ओह्नु केहले, “अम्हा कनु ऐ बरबरियान जग्हा मां किठु इतनिया रोटियां मिले जको इतनी ब़ङी भीड़ी नु रजा सगु ?”
34 ईशु ने वाकनु पूछले, “तम्हा कनु कितनिया रोटियां छी ?” वाह्णे केहले,
“सात, ते कौछ छोटियां माछलीया ।”
35 बल्ति ईशु ने बन्दा नु भोये पे ब़ेसणे ची आज्ञा ङिली । 36 ते वां सात रोटियां ते वा छोटिया माछलीया नु चले, नरीकारा चा धन्यवाद करती कने, भांले ते आपणा चेला नु ङिता गेला, ते चेले बन्दा नु 37 सारे खाती कने रजती गेले, ते चेला ने बचले आला टुकड़ा चे सात टोकरे भरिले आले चले । 38 खाणे आलिया अस्त्रीया ते ब़ाला नु छोड़ती कने चार हजार मर्द हुते ।
39 बल्ति ओ भीड़ी नु विदा करती कने ब़ेड़ी पे चड़ती गेला, ते मगदन देशा ची सीमा मां आला ।