स्वर्गीय निशानी ची मांग
( मर 8:11-13, लूका 12:54-56)
16
1 फरीसिया ने ते सदूकियां ने गोढु आती कने ईशु नु परखणे वास्ते ओह्नु केहले, “अम्हानु स्वर्गा चा कुई चिन्ह ङिखाण ।” 2 ईशु ने वानु उत्तर ङिला, ‘शामी चे तम्ही किहा वी, ‘कि मौसम आच्छा रिही, कांकि आसमान लाल छे, 3 ते सवेले किहा कि, ‘आज़ अंधारी आवी, कांकि आसमान लाल ते धूंधला छे । ‘तम्ही आसमान चे चिन्हा ङेखती कने ओह्चा भेद बाड़ सगा, पर वख्ता चे चिन्हा चा भेद का ना बाड़ सगा ? !a 4 ऐ युगा ची बुरी ते व्यभिचारी बन्दी चिन्ह सोधी, पर योना भविष्यवक्ता चे चिन्हा नु छोड़ती कने वानु नेरा कुई चिन्ह नी ङिला जही ।” ते ईशु वानु छोड़ती कने चाहला गेला ।फरीसिया ते सदूकिया ची शिक्षा चा खमीर
( मरकुस 8:14-21)
5 ईशु चे चेले झील चे ओ पासु पुजले, ते वे रोटी आणने भुलती गेलते । 6 ईशु ने वानु केहले, “ङेखा फरीसिया ते सदूकिया चे खमीरा कनु सावधान रेहेजा ।” 7 वे आपस मां विचार करू लागले, “आपु रोटी कोह्नी आणली ऐ वास्ते ओ इसड़े किहे ।”
8 हां जाणती कने, ईशु ने वानु केहले, “ओ कमविश्वासी बन्दी, तम्ही आपस मां का विचार करा, वी कि अम्चे कनु रोटी कोह्नी ? 9 का तम्ही हमा तक कोह्नी समझले ? का तम्हानु वां पांचा हजारा चा पांच रोटियां याद कोह्नी, ते ना, हां कि तम्ही कितनिया टोकरियां चलतियां लियां ? 10 ते ना, वा चऊ हजारा चे वास्ते सात रोटिया, ते बल्ति तम्ही कितनिया टोकरियां चलतियां लियां ? 11 तम्ही के वास्ते ना समझा कि, “मैं, तम्हानु रोटियां चे बारे मां कोह्नी केहले ? पर हां केहले कि तम्ही फरीसिया ते सदूकियां चे खमीरा कनु सावधान रिहा ।”
12 बल्ति वांह्ची समझी मां आती गेले कि ओह्णे रोटी चे खमीर वास्ते कोह्नी केहले, पर ऐचा मतलब हा छै कि अम्हानु फरीसिया ते सदूकियां ची शिक्षा कनु सावधान रेहणे वास्ते केहले ।
पतरसा चे ईशु नु मसीह स्वीकार करने
( मरकुस 8:27-30, लूका 9:18-21)
13 जिसे बेह्ले ईशु कैसरिया फिलिप्पी चे प्रदेशा गोढु आला, ते आपणे चेला कनु पूछू लागला, ‘मैं, बन्दे चा पुत कुण छे, बन्दी मनु का किही ?
14 14 वाह्णे केहले, “कौछ तां यूहन्ना बपतिस्मा ङेणे आला किही । ते कौछ एलिय्याह ते कौछ यिर्मयाह या भविष्यवक्ता मू कुई हेक किही ।”
15 ईशु ने चेला कनु पुछले, पर तम्ही का किहा कि, मैं कूण छै ?”
16 शिमौन पतरसा ने उत्तर ङिला, “तू जीते नरीकारा चा पुत मसीह छी ।”
17 ईशु ने ओह्नु उत्तर ङिला, “ओ शिमौन, योना चा पुत तू धन्न छी, तनु हा बात कुई बन्दे ने कोह्नी केहली, पर जको माया ब़ा नरीकार स्वर्गा मां छे ओह्णे हां बात दुधे पे जाहिर करली । 18 ते मैं वी तनु किहे कि तू पतरस छी, ऐचा मतलब हा छै कि तु पत्थर छी, ते मैं ऐ पत्थरा पे आपणी कलीसिया बणावी, ते मौत ची सामर्थ ओह्चे पे हावी नी हुवी । 19 ‘मैं, तनु स्वर्गा चे राज्य चिया कूंजियां ङिही, “ते जको कसा तू धरती पे ब़ान्धे ऊ स्वर्गा मां ब़न्धिजी, ते जको कसा तू धरती पे खोले, ऊ स्वर्गा मां नरीकारा चे जरिये खुली ।”
20 बल्ति ओह्णे चेला नु चिताले, “कि कानु वी ना बावड़जा कि ‘मैं, मसीह छे ।’ ”
आपणी मोती चे बारे मां ईशु ची भविष्यवाणी
( मरकुस 8:31-33, 9:1; लूका 9:22-27)
21 ओही बेह्ले कनु ही ईशु आपणे चेला नु बावड़ु लागला, “जरुरी छे कि ‘मैं, यरुशलेमा सनु जाऐ ते बङके ते प्रधान याजक ते शास्त्रियां चे हाथा कनु ब़ोहत ङोख चवे ते मरीला जाऐ, ते तींजे ङियो जीता हुती जाऐ ।”
22 ऐ बाती पे पतरस ओह्नु अलग गेहती कने झिड़कू लागती गेला, “ओ प्रभु, नरीकार इसड़े ना करो ! दुधे लारे इसड़े कङी वी नी हुवी ! ”
23 ईशु ने पुठे मुड़ती कने पतरसा नु केहले, “ओ शैतान माकनु दूर हुती जा ! तू माये वास्ते ठोकर चा कारण छी, कांकि तू नरीकार ची बातां कनु कोह्नी, पर तू बन्दा चिया बाता पे विश्वास राखी ।”
ईशु चे भांसु टुरने चा अर्थ
( मरकुस 8:24-9:1 लूका 9:23-27)
24 बल्ति ईशु ने आपणे चेला नु केहले, “अगर कुई माये भांसु आणे चाहवे, ते आपणे आप चा इन्कार करो, ते आपणा क्रूस चाओ, ते माये भांसु टुरती पड़ो । 25 कांकि जको कुई आपणे प्राणा नु बचावी, ऊ गार करी, अगर जको माये वास्ते आपणे प्राणा नु गार करी, ऊ ओह्नु लाभी । 26 बन्दे सारे संसारा नु प्राप्त करती गिहे, ते आपणे प्राणा नु गार करती ब़ेसे, ते ओह्नु का फेदा हुवी ? या बन्दे आपणे प्राणा नु पुठे गेहणे चाहवे ते बदले में का ङिही ? कसा ना! 27 ‘मैं, बन्दे चा पुत स्वर्गदूता लारे आपणे ब़ा नरीकारा ची महिमा मां आवी, ओ वख्ता पे, हर हेक नु ओह्चे कामा चे अनुसार प्रतिफल ङिही । 28 ‘मैं, तम्हानु सच किहे, कि इठे कोच्छ इसड़े छी जबतक ‘मैं, बन्दे चे पुता नु आपणे राज्य मां आते हुले नी ङेखे, ओ बेह्ले तक वे मोती चा स्वाद नी चाखे ।”