ईशु चा स्वर्गीय रुप चेला ने ङेखला
( मरकुस 9:2-13, लूका 9:28-30)
17
1 छिया ङिहां चे बाद ईशु ने चेला नु पतरस ते याकूब ते ओह्चे भऊ यूहन्ना नु लारे गेहती कने ते वानु एकान्त मां कुई ऊंचे पहाड़ा पे गेहती गेला । 2 ओठे वांह्चे सामणे ईशु चा रुप बदलती गेला, ते ओह्चे मूंह सूरजा रोक चमकले ते ओची ओढणी चीटे सोजले रोक हुती गेली । 3 ते अचानक मूसा भविष्यवक्ता ते एलिय्याह भविष्यवक्ता ओह्चे लारे बाता करते ङिसले ।4 ऐचे पे पतरसा ने ईशु नु केहले, “ओ प्रभु, अम्चे इठे रहणे आच्छे छे । अगर दुधी इच्छा हुवे, तां मैं इठे तीन मण्डप बणावे; हेक दुधे वास्ते, हेक मूसा वास्ते, ते हेक एलिय्याह वास्ते ।”
5 ओ ब़ोले ही पलता ला हेक चीटे बदला ने वानु घेरती गेले, बदला महु हेक इसड़ा साङ आला, “हा माया प्यारा पुत छै ऐकनु मैं खोश छे । ऐची सुणा !”
6 चेले हा सुणती कने चेल मुंहा चे बल भोंये पे ढे़हेती पले ते ब़ोहत ज्यादा ङरती गेले । 7 ईशु ने गोढु आती कने वानु हाथ लाला, ते केहले, “खड़े हुवा ङरा ना ।” 8 बल्ति चेला ने उपर आपणियां आंखिया लारे ङेखले ते ईशु नु छोड़ती कने वाह्णे नेरे कानु वी कोह्नी ङेखले ।
9 जिसे बेह्ले वे पाहाड़ा कनु उतरी पलते, बल्ति ईशु ने वानु हां आज्ञा ङिली, “जब तक ‘मैं, बन्दे चा पुत मरला आला मू जीता ना हुती जई, हमा तक जको तम्ही ङेखले ऐ दर्शन चे बारे मां कानु वी ना केहेजा ।”
10 ऐचे पे ओह्चे चेला ने ओकनु पूछले, “बल्ति धर्मशास्त्री का किही कि एलिय्याह भविष्यवक्ता चे पेहले आणे जरूरी छे ?।”
11 ओह्णे उत्तर ङिला, “एलिय्याह भविष्यवक्ता जरुर आवी, ते सारे कोच्छ सुधारी । 12 पर मैं तम्हानु किहे एलिय्याह भविष्यवक्ता आती चुकला, ते बन्दा ने ओह्नु कोह्नी पिछाड़ले, पर जिसड़े चाहले उसड़े ही ओह्चे लारे करले, ऐही रीति लारे ‘मैं, बन्दे चा पुत वी वांह्चे हाथा चे द्वारा ङौख चवी ।”
13 बल्ति चेला ने समझले की ओह्णे अम्हानु यूहन्ना बपतिस्मा ङेणे आले चे बारे मां केहले ।
मिर्गी मां जकड़ले आले ब़ाला नु ठीक करने
( मरकुस 9:14-29, लूका 9:37-43)
14 जिसे बेह्ले ईशु पुठा भीड़ी चे गोढु आला, ते हेक बन्दे ओह्चे गोढु आले ते घुटने टेकती कने ईशु नु किहुं लागले, 15 “ओ प्रभु, माये पुता पे दयाकर ! कांकि ओह्नु मिर्गी आवे ते घणे बिमार रिहे ते बार-बार जाखते मां ते बार-बार पाणीयां मां ढे़हती पडे़ । 16 मैं ऐनू दुधे चेला चे गोढु आणले हुते, पर वे ओकनु ठीक कोह्नी कर सलगे ।”
17 ईशु ने उत्तर ङिला, “ओ कमविश्वासी ते हठीले बन्दी, मैं कबतक तम्चे लारे रिही ? कबतक मैं तम्ची सहेता रिही ? ओ ब़ाला नु इठे माये गोढु आणा ।” 18 बल्ति ईशु ने ब़लाई नु दड़का ङिला, ते वां ओह्चे मूं निकलती गेली, ते छोर ओही बेह्ले ठीक हुती गेले ।
19 बल्ति चेला ने एकान्त मां ईशु चे गोढु आती कने पुछले, “अम्ही ब़लाई नु के वास्ते कोह्नी काढ़ सगले ?”
20 ओह्णे वानु केहले, “तम्चे विश्वास ची कमी चे कारण, मैं तम्हानु सच किहे पला, कि अगर तम्चा विश्वास राई चे ङाणे चे बराबर वी हुवे हा तां, ऐ पाहाड़ा नु केहे सगा हा, ‘इठु सरकती कने ओठे चाहला जा । ओ चाहला जही हा’ । कुई बात तम्चे वास्ते असम्भव ना रिहा ।
21 पर ये ब़लाया बिना प्राथना ते उपवासा चे ना निकली ।”
ईशु आपणी मोती चे बारे मां बावड़े
( मरकुस 9:30-32; लूका 9:43-45)
22 जिसे बेह्ले वे गलील मां हुते, ते ईशु ने वानु केहले, “मैं, बन्दे चा पुत बन्दा चे हाथा मां पकड़ीला जई । 23 वे मनु मारती नाखे, ते ‘मैं, तींजे ङियो जीता हुती जई ।”
ऐचे पे ईशु चे चेले ब़ोहत उदास हुले ।
मन्दरा चा कर
24 जिसे बेह्ले ईशु ते ओह्चे चेले कफरनहूम मां पूजले, ते मन्दरा चे कर गेहणे आला ने पतरसा कनु आती कने पूछले, “का, तम्चा गुरु मन्दरा चा कर ङिये वे या ना ङिवी ?”
25 पतरसा ने केहले ‘हवे’ ङिये वे ।
जिसे बेह्ले पतरस घरा मां आला, ते पतरसा चे पूछणे कनु पेहले ही ईशु ने ओह्नु केहले, “ओ शमौन, तू का सोची पला ? धरती चा राजा कर ते चुगीं काकनु गिहे, आपणा बन्दा कनु या बल्ति परदेशिया कनु ।”
26 पतरसा ने ओह्नु केहले, “परदेशिया कनु ।”