स्वर्गा चे राज्य मां बङे कूण छे ?
( मरकुस 9:33-37, लूका 9:46-48)
18
1 ओही बेह्ले ईशु चे चेले आती कने ओह्चे कनु पूछु लागले, “स्वर्गा चे राज्य मां बङे कूण छे ?”2 ऐचे पे ईशु ने हेक ब़ाला नु आपणे गोढु हकारती कने वांह्चे बीच मां खड़े करती ङिले । 3 ते केहले, “मैं तम्हानु सच किहे कि जब तक तम्ही मन ना फिरावा ते ब़ाला चे समान ना बणा, तम्ही स्वर्गा चे राज्य मां नी जा सगा । 4 जको कुई आपणे आप नु ऐ ब़ाला चे समान छोटे करी, ऊ स्वर्गा चे राज्य मां बङे हुती । 5 ते जको कुई माये नावां लारे बन्दा नु या तां कानु वी, हेक इसड़े ब़ाला रोक मनी ऊ मनु मनी ।”
पाप करने ची परीक्षा
( मरकुस 9:42-48, लूका 17:46-481-2)
6 “पर जको यां छोटा मु छोटे नु जको माये पे विश्वास करी, ठोकर मारे, ओह्चे वास्ते हाओ भले हुवी की ब़ङी चक्की चा पत्थर ओची गिची मां लटकाती ङिला जाओ, ते ओह्नु गहरे समुन्द्रा मां ङुब़ाती नाखले जाओ । 7 ठोकर चे कारण संसार पे हाय ! ठोकरा चे लागणे जरूरी छे, पर हाय ओ बन्दे पे जेचे कारण ठोकर लागे ।
8 अगर दुधा पग या हाथ दुधे वास्ते ठोकर चा कारण बणे तां वानु बाढ़ती कने भुकाती नाख, टुन्डे या लंगड़े हुती कने जीवन मां जाणे दुधे वास्ते ऐचे कनु भले छे, कि ङोन हाथ या ङोन पग रहते हुले, वी तू नरका चे जाखते मां नाखला जई । 9 अगर दुधी आंख दुधे वास्ते ठोकर चा कारण बणे तां विनु काढ़ती कने भुकाती नाख, काणे हुती कने जीवन मां जाणे दुधे वास्ते ऐचे कनु भले छे कि ङु आंखिया चे रहते हुले वी तू नरका चे जाखते मां नाखला जई ।
गार हुली आली भेङी ची मिसाल
( लूका 15:3-7)
10 ङेखा, तम्ही यां छोटा मूं कानु वी तोच्छ ना जाणा; कांकि मैं तम्हानु किहे कि स्वर्गा मां वांह्चे स्वर्गदूत माये स्वर्गीय ब़ा नरीकारा चा मूंह सदा ङेखी । 11 कांकि ‘मैं, बन्दे चा पुत गार हुला आला नु बचाऊ आला ।
12 “तम्ही का सोचा ? अगर कुई बन्दे चा साओ भेङा हो, वांह्चे मूं हेक गार हुती जाओ, ते ओ जती कने, निन्याणवे भेङा नु पहाड़ा पे छोड़ती कने, वा जको गार हुती गेली विनु के वास्ते नी सौधी ? जरूर सोधी । 13 अगर इसड़े हुवे वा लाभती जाऔ, ते मैं तम्हानु सच किहे पला कि वे जको निन्याणवे भेङा हुतियां, जको गार कोह्नी हुलतियां, इतनी खुशी नी मनावी, जितना की वे भेङी वास्ते खुशी मनावी जको गार हुती गेलती । 14 इसड़े ही जको तम्चाa ब़ा स्वर्गा मां छे, ओची हां इच्छा कोह्नी की या छोटा मूं हेक वी खत्म हो ।”
पापी भावा नु सही रस्ता ङिखाणना
15 “अगर दुधा विश्वासी भऊ दुधे, खिलाफ कुई अपराध करे, ते जती कने ओह्नु हेकले मां बातचीत करती कने समझा; अगर दुधी सुणती गिहे, बल्ति तें आपणे भावा नु अपनाती गेले । 16 अगर ओ ना सुणे ते हेके या ङु जणा नु लारे गेहती जा, कि हर हेक बात ङु या तींई गवावा चे मुंहा कनु साबित हुती जाये । 17 अगर ओ वांह्ची वी ना मनी ते कलीसिया नु केहती ङे, अगर वे कलीसिया ची वी ना मनी, ते ओह्नु तु नेरीया जातियां रोक, ते चुंगी गेहणे आले जिसड़े जाण ।”
ब़ान्धणे ते खोलणे
18 “मैं तम्हानु सच किहे, जको कोच्छ तम्ही धरती पे ब़ान्धा, ऊ स्वर्गा मां बन्धिजी, ते जको कोच्छ तम्ही धरती पे खोला, ऊ स्वर्गा मां खुली ।
19 बल्ति मैं तम्हानु सच किहे, अगर तम्चे मूं ङोन जणे धरती पे कुई बाती चे वास्ते हेक मन हुती कने कसा मांगे, ते ऊ माये ब़ा नरीकारा ची ओर कनु जको स्वर्गा मां छे वांह्चे वास्ते हुती जई । 20 कांकि जिठे ङोन या तीन जणे माये नावां पे भेले हुवी, ओठे में वांह्चे बीच मां मौजूद रिहे ।”
दया ना करने आले सेवका ची मिसाल
21 बल्ति पतरसा ने ईशु चे गोढु आती कने केहले, “ओ प्रभु, अगर माया विश्वासी भऊ अपराध करता रिहे, ते मैं ओह्नु कितना वारी माफ करे, का सात वारी तक” ?
22 ईशु ने ओह्नु केहले, “मैं तनु हा ना किही कि सात वारी तक, वरन सात वारी चे सत्तर गुणा तक माफ करता रेहेb । 23 “ऐ वास्ते स्वर्गा चा राज्य ओ राजा चे समान छे, जेह्णे आपणे दासा कनु लेखा गेहणा चाहला । 24 जिसे बेह्ले ओ लेखा गिहुं लागला, ते हेक जणा ओह्चे सामणे हाजिर हुला, जको ङसा लखा रुपिया चा कर्जदार हुता । 25 जबकि कर्जा चुकाणे वास्ते ओकनु कसा वी कोह्नी हुते ते ओह्चे स्वामियां ने केहले , ‘ ते ऐची घराआली ते ब़ाले - ब़च्ची ते जको कौछ ऐचा छे सारे बेचले जाओ, ते कर्जा चुकाती ङिला जाओ ।’ 26 ऐचे पे ओह्चा दास पगा मां ढे़हती कने ओह्नु प्रणाम करले ते केहले, ‘हे स्वामी, तसल्ली राख, मैं सारे कौछ भरती ङिही ।’ 27 बल्ति ओ दासा चे स्वामियां ने तरस खाती कने ओह्नु छोड़ती ङिले ते ओह्चा कर्जा वी माफ करती ङिला ।”
28 “पर जिसे बेह्ले ओ दास ब़ाहरु निकड़ला, ते ओह्चे लारे चा दास हेक ओह्नु मिड़ला जको साओ दिनार चा कर्जदार हुता; ओह्णे ओह्नु पकड़ती कने ओची गिची चा गला पकड़ती कने केहले, ‘जको कोच्छ दुधे पे कर्जा छे ओह्नु भरती ङे !’ 29 ऐचे पे ओह्चे लारे चा दास ढे़हती कने बिनती करू लागला, ‘तसल्ली राख मैं सारे कोच्छ भरती ङिही ।’ 30 पर ओह्णे कोह्नी मनले ते जती कने ओह्नु जेली मां नाखती ङिले, कि जबतक कर्जा भरती ना ङिही ओ तक इठी रहे । 31 ओह्चे लारे चे दास जको हुलेते ङेखती कने ब़ोहत उदास हुले ते जती कने आपणे स्वामियां नु सारा हाल बावड़ला । 32 बल्ति ओह्चे स्वामियां ने ओह्नु हकारती कने केहले, ‘ओ दोष्ट दास! ते माकनु बिनती करली ती की मैं दुधा सारा कर्जा माफ करती ङिलता । 33 ऐ वास्ते जिसड़ी मैं दुधे पे दया करली, उसड़ी ही का तनु वी आपणे लारे चे दासा पे दया करनी ठीक कोह्नी हूती ?’ 34 ते ओह्चे स्वामियां ने गुस्से मां आती कने ओह्नु ङन्ड ढे़णे आला चे हाथा मां सोंपती ङिले, कि जब-तक ओ सारा कर्जा भरती ना ङियो, तबतक वांह्चे हाथा मां रिहो ।”
35 “ऐही रीति लारे अगर तम्चे मूं हर-हेक आपणे भावा नु मना लारे माफ नी करी, ते माया ब़ा नरीकार जको स्वर्गा मां छे तम्चे लारे वी इसड़े ही करी ।”