तलाक चे बारे मां ईशु ची शिक्षा
( मरकुस 10:1-12 )
19
1 जिसे बेह्ले ईशु या बातां केहती चुकला, ते गलील कनु चाहला गेला; ते यरदन नदी चे पार यहुदिया चे प्रदेश मां आला । 2 बल्ति ब़ङी भीड़ ओह्चे भांसु टुरती पली ते ओह्णे ओठे वानु बिमारा नु चंगा करले ।3 बल्ति कोच्छ फरीसी ओची परीक्षा गेहणे वास्ते गोढु आती कने किहुं लागले, “का हर-हेक मर्दा नु कुई वजह कनु आपणी घराआली नु त्यागणे ठीक छे ?”
4 ईशु ने उत्तर ङिला, “का तम्ही शास्न मां कोह्नी पढ़ले ? कि जेह्णे वानु बणाले, वानु शुरु कनु हेक मर्द ते हेक अस्त्री बणाती कने केहले 5 ‘ऐ ही कारण बन्दे आपणे आई-ब़ा कनु अलग हुती कने आपणी घराआली चे लारे रिही ते, वे ङोनी हेको तन रिहे ।’ 6 तां वे हमा ङोन कोह्नी पर हेक तन छी । ऐ वास्ते जेनु नरीकार ने जोड़ले ओह्नु कुई बन्दी अलग ना करो ।”
7 फरीसिया ने ईशु नु केहले, “बल्ति मूसा ने का ठहराले कि तलाक ङिती कने छोड़ती ङियो ?”
8 ईशु ने वानु केहले, “मूसा ने तम्चे मना ची कठोरता चे कारण तम्हानु आपणी-आपणी घराआली नु छोड़णे चा हुकम ङिला; पर शुरु कनु इसड़े कोह्नी हुते । 9 पर ‘मैं, तम्हानु किहे, कि जको कुई व्यभिचारा नु छोड़ ओर कुई नेरे कारणा लारे आपणी घराआली नु तलाक ङिती कने ङुजि लारे बिहा करे, ओ विचे लारे व्यभिचार करे ।”
10 चेला ने ईशु नु केहले, “अगर मर्दा चा अस्त्री लारे इसड़ा सम्बन्ध छे ते बिहा करने आच्छे कोह्नी ।”
11 ईशु ने वानु केहले, “सारे हां वचन ना मन सगी, हेको ओ ही कर सगे जाई मदत नरीकार कर सगे । 12 कांकि कोच्छ हिजड़े इसड़े छी जको आई चे ढ़िड़ा कनु ही इसड़े जमले । ते कोच्छ हिजड़े इसड़े छी जानु बन्दा ने हिजड़े बणाले; ते कोच्छ बन्दी इसड़ी छी, जेह्णे स्वर्गा चे राज्य मां जाणे वास्ते बिहा कोह्नी करने चा फैसला करला ।” जको ऐ उपदेशा नु गेहणे चाहवे ऊ गिहो ।
ब़ाला नु आशीर्वाद
( मरकुस 10:13-16, लूका 18-15-17)
13 बल्ति बन्दी ब़ाला नु ईशु चे गोढु गेहती आली कि ओ वांह्चे पे हाथ मेलो ते प्राथना करो, पर चेला ने वानु डांटले । 14 ईशु ने केहले, “ब़ाला नु माये गोढु आऊ ङिहां, ते वानु मना ना करा, कांकि स्वर्गा चा राज्य इसड़ा बन्दा आलीकर ही छे ।”
15 ते ईशु औचे बाद वांह्चे पे हाथ मेहलती कने उठु चाहला गेला ।
धनी बन्दे ते अनन्त जीवन
( मरकुस 10:17-31, लूका 18:18-30 )
16 हेक बन्दे ईशु चे गोढु आले ते ओह्नु केहले, “ओ भला गुरु, मैं किसे भले काम करे कि नरीकारा लारे अनन्त जीवन पा सगे ?”
17 ईशु ने ओह्नु केहले, “तू माकनु भलाई चे बारे मां का पूछी ? भला तां नरीकार ही छै, अगर तू अनन्त जीवन मां जाणे चावी ते, ओह्चे हुक्मा नु मनले कर ।”
18 ओह्णे ईशु नु केहले, “किसे हुकम ?”
ईशु ने केहले, “यह हुक्म छी, हत्या ना करियो, व्यभिचार ना करियो, चोरी न करियो, झूठी गवाही ना ङियो । 19 आपणे ब़ा ते आई चा आदर करियो ते आपणे पड़ोसिया लारे आपणे समान प्रेम करियो ।”
20 ते ओ जवाना ने ईशु नु केहले, “या सारिया बाता नु ते मैं मनले; हमा माये मां किसी बाती ची कमी छे ?”
21 ईशु ने ओह्नु केहले, “अगर तू सिध्द होणे चाहवी तां जा, आपणा माल बेचती कने कंगाला नु ङे जती । ते तनु स्वर्गा मां सच्चा धन मिली । ते आती कने माये भांसु टुरती पड़ ।”
22 बल्ति ओ जवान हां बात सुणती कने घणा ङुखी हुती कने चाहला गेला, कांकि ओ ब़ोहत धनी हुता ।
23 बल्ति ईशु ने आपणे चेला नु केहले, “मैं तम्हानु सच किहे, कि धनवाना चा स्वर्गा चे राज्य मां जाणे कठिन छे । 24 मैं तम्हानु बल्ति किहे, कि नरीकार चे राज्य मां धनवान चे जाणे इतने मुशकिल छै, जिंवे ऊंट चे सुई चे मोरे मूं निकलणे मुश्कल छे ।
25 हां सुणती कने चेले अचम्भे मां पड़ती गेले ते ईशु नु केहले, “बल्ति काया उध्दार हो सगी ?।”
26 ईशु ने वांह्चे सनु ङेखती कने केहले, “बन्दा कनु तां हां ना हो सगी पर नरीकार कनु सारे कोच्छ हो सगे ।”
27 ऐचे पे पतरसा ने ईशु नु केहले, “ङेख अम्ही तां सारे कोच्छ छोड़ती कने दुधे भांसु टुरती पले ते अम्हानु का मिली ?”
28 ईशु ने वानु केहले, “मैं तम्हानु सच किहे पला कि नवीं सृष्टि मां जिसे बेह्ले ‘मैं, बन्दे चा पुत आपणी महिमा मां सिंहासन पे ब़ेसी, ते तम्ही वी जको माये भांसु टुरती पले, ब़ारहा सिंहासन पे ब़ेहेसती कने इस्राएल चे ब़ारहा गोत्रा चा न्यां करा । 29 ते जेह्णे कने माये वास्ते घरा नु, या भावा नु, या ब़हणियां नु, या ब़ा नु, या आई नु, या ब़ाला-बच्चा नु, या खेता नु माये नावां पे छोड़ती ङिये वानु धरती पे साओ गुणा मिली ते, ऊ अनन्त जीवन चे अधिकारी हुवी । 30 घणे सारे जको आगु छी, वे भांसु हुवे । घणे सारे जको भांसु छी, वे आगु हुवे ।”