बाड़ी चे मजदूरा ची मिसाल
20
1 “स्वर्गा चा राज्य कुई खेता चे मालिका रोक छे जको सवेले निकड़ला कि आपणी अंगुरा ची बाड़ी मां मजदूरा नु लावे । 2 ओह्णे मजदूरा लारे हेक चांदी चा सिक्का रोजा चा ठेहेराला ते वानु आपणी दाख ची बाड़ी मां काम करने चे वास्ते भेजले । 3 बल्ति ओह्णे सवेले करीब नवें बजे जिसे बेह्ले ओ ब़ाहरु आला, ते नेरा लोका नु बजारा मां बेकार भिले आले ङेखले, जको युही बेकार भिलते ले । 4 ते ओह्णे वानु केहले, “तम्ही वी अंगुरा ची बाड़ी मां जवा, ते जको कोच्छ ठीक छे, ऊ तम्हानु ङिही, बल्ति वे वी काम करने चे वास्ते गेले ।” 5 बल्ति ओह्णे ब़ारहा बजे आला लारे, ते तींई बजे आला लारे लगभग ब़ाहरु निकलती कने इसड़े ही करले । 6 लगभग पांचे बजे वापस ब़ाहर निकलती कने ओह्णे ङुजा बन्दा नु ओठे खड़े ङेखले ते वानु केहले, “का तम्ही इठे ङियो भर बेकार मां खड़ रहले ?” 7 वाह्णे ओह्नु केहले, “कांकि अम्हानु मजदुरी पे कने कोह्नी लाले ।” ओह्णे वानु केहले , “तम्ही वी अंगुरा ची बाड़ी मां काम करने चे वास्ते जवा ।”8 “शामी चे अंगुरा ची बाड़ी चे मालिका ने आपणे मुनिमा नु केहले, “मजदूरा नु हकारती कने पिछला कनु लाती आगला तक वानु मजदूरी ङिती ङे ।” 9 करीब पांचे बजे शामी चे वख्ता पे जको मजदुरी पे लाले गेलते ले, वे आले ते वानु हेक चांदी चा सिक्का मिड़ला । 10 जको पेहले आलते ले, वाह्णे हां समझले कि अम्हा नु, याकनु ज्यादा मिली, बल्ति वानु वी हेक-हेक चांदी चा सिक्का मिड़ला । 11 जिसे बेह्ले वानु मिड़ला ते वे घरा चे मालिका पे कुड़कुड़ाती कने किहुं लागले, 12 “यां पिछला ने तां हेक ही घंटा काम करले, यानु वी तें अम्चे बराबर करती ङिले, अम्ही जको सारा ङियो तपते चिटके मां मेहनत करली ?
13 “ओह्णे वांह्चे मूं हेक नु उत्तर ङिला, ‘ओ दोस्त मैं दुधे लारे कुई अन्याय कोह्नी करला । का ते माये लारे हेक चांदी चा सिक्का कोह्नी ठहरालता ला ? 14 जको दुधा छे, चती ते चाहला जा; माई इच्छा हां छे कि जितना तनु ङिये उतने ही यां भांसला नु ङिये । 15 का हा ठीक कोह्नी की मैं आपणे धना लारे जको चावे ऊ करे ? का माये भले होणे चे कारण तू जलन का राखी ?’ ”
16 बल्ति ईशु ने वानु केहले, “जको भांसले छी, वे आगु हुवे, ते जको पेहले छी, वे भांसु हुवे ।”
आपणी मोती चे बारे मां ईशु ची तींजी भविष्यवाणी
(मर1च0:32-34, लूका 18:31-34)
17 ईशु यरुशलेमा सनु जते वख्ता पे ब़ाहारा चेला नु एकान्त मां गेहती गेला, ते रस्ते मां वानु किहुं लागला, 18 “ङेखा, अम्ही यरुशलेम नगर सनु जऊ पले ते ‘मैं, बन्दे चा पुत प्रधान याजका ते यहूदी धर्मशास्त्रीया चे हाथा मां पकड़ीला जई, ते वे मनु मारने चे लायक ठहरावे । 19 वे मनु ङुजीया जातियां चे हाथा मां सौंपे कि वे मनु ठट्ठा मां उङारे ते कोड़े मारे ते क्रूसा पे चढ़ावे ते, मैं तींजे ङियो जीता हुती जही ।”
हेकी आई ची बिनती
( मर 10:35-45)
20 बल्ति जबदी चे पुता ची आई ने आपणे पुता चे लारे ईशु चे गोढु आती कने प्रणाम करले, ते बिनती करती ओकनु कसा मांगु लागली ।
21 ई वानु केहले, “तू का चावी ?”
वा ओह्चे लारे ब़ोली , “हा हुक्म ङे कि दुधे राज्य मां हेक दुधे सज्जे पासु ते नेरा खब़े पासु ब़सो ।”
22 ईशु ने उत्तर ङिला, “तम्ही ना जाणा कि का मांगा । जको मुंगर मैं पीणे पे छे का तम्ही पी सगा ?”
वाह्णे केहले, “अम्ही पी सगु ।”
23 ईशु ने वानु केहले, “जरुर ही तम्ही माया मुंगर ते पिहिया, पर आपणे सज्जे पासु ते खब़े पासु ब़िसाणने माये हक्का मां कोह्नी । पर जाये वास्ते माये ब़ा नरीकारा ची ओर कनु तियार करला गेला, वांह्चे वास्ते ही छे ।”
24 हां सुणती कने ओह्चे ङस चेले वां ङु भावा पे गुस्से हुले । 25 ईशु ने वानु आपणे गोढु हकारती कने केहले, “तम्ही जाणा वी की नेरीया कौमा चे हाकिम वा छोटा बन्दा नु सतावी, ते जको वांह्चे खास बङे नेता छी, वे वांह्चे पे आपणा जबरदस्ती हक्क जतावी । 26 पर तम्चे बीच मां इसड़े नी होणे चाही छै । पर जको तम्चे मूं बङे होणे चावे, ओ तम्चा सेवक बणो । 27 ते जको तम्चे मूं प्रधान होणे चावे, ओ तम्चा दास बणों । 28 जिंवे की ‘मैं, बन्दे चा पुत ऐ वास्ते कोह्नी आला, की माई सेवा टेहल करली जाओ, पर ऐ वास्ते आला की मैं सेवा टहल करे, ते घणा चे वास्ते आपणे प्राण ङिऊ आला ।”
ङु अन्धा नु आंखिया चा दान
( मर 10:46-52, लूका 18:35-43)
29 जिसे बेह्ले वे यरीहो नगर कनु निकली पलते, ते हेक ब़ङी भीड़ ईशु चे भांसु टुरती पली । 30 ते ङोन अन्धे जको सड़की चे किनारे ब़ेहलते ले, हा सुणती कने की ईशु जाये पला, रोल मचाती कने किहुं लागले, “ओ प्रभु, दाऊद ची ऊलाद, अम्चे पे दया कर !”
31 बन्दा ने वानु डांटले कि चौप रिहा, पर वे ते रोल मचाती कने ब़ोले, “ओ प्रभु, दाऊद ची ऊलाद अम्चे पर दया कर ।”
32 बल्ति ईशु भिला रेहेती गेला, वानु हकारते तां केहले, “तम्ही का चावा कि मैं तम्चे वास्ते करे ?”
33 वाह्णे ईशु नु केहले, “ओ प्रभु, अम्ही चाहु कि अम्ही ङेख सगु ।”
34 ईशु ने तरस खाती कने वांह्चिया आंखिया नु हाथ लाला, ते वे तुरन्त बल्ति कनु ङेखु लागती गेले; ते ओह्चे भांसु टुरती पले ।