पहाड़ी उपदेश
5
1 ईशु ऐ भीड़ी नु ङेखती कर पहाड़ा पे चढ़ती कने ब़हेसती रहेला ते ओह्चे चेले ओह्चे गोढु आले । 2 ईशु ने वानु उपदेश ङिला ।सच्ची खुशी
(लूका 6.20-23)
3 धन्न छी वे जको मना चे दीन छी
कांकि स्वर्गा चा राज्य वांह्चा छे ।
4 a धन्न छी वे जको रोई पले कांकि
वानु शांन्ति मिली ।
5 धन्न छी वे जको नम्र छी
कांकि वे धरती चे अधिकारी हुवे ।
6 b धन्न छी वे जको धार्मिक्ता चे भुखे ते तरसेले आले छी
कांकि वे रजाले जाये ।
7 धन्न छी वे जको दयावन्त छी
कांकि वांह्चे पर दया करली जही ।
8 c धन्न छी वे जाये मन शोध्द छै,
कांकि वह नरीकारा नु ङेखे,
9 धन्न छी वह जको मेल कराणे आले छी,
कांकि वह नरीकारा चे पुत, किह्वावे ।
10 d धन्न छि वे जको धार्मिक्ता चे कारण सताले जाये
कांकि स्वर्ग चा राज्य वांह्चा छे।
11 e धन्न छिवा तम्ही माये कारण सताले जावा, ते कुड़ मारती-मारती कने बन्दी तम्चे विरोध मां सारी प्रकार ची बुराईया ची बाता किही, ते अपमान करी । 12 f ओ बेह्ले आनन्द चे लारे मगन हुजा, कांकि तम्चे वास्ते स्वर्गा में ब़ोहत ब़ङा फल छै, वाह्णे ओ बेह्ले वां भविष्यवक्ता नु वी सतालेते ।
लूण ते सोज़ले
(मरकुस: 9.50; लूका: 14.34, 35)
13 g तम्ही धरती चे लुण छिवा, जिसे बेह्ले लुणा चा स्वाद बिगड़ती जाये, बल्ति किसी चीजे लारे नमकीन करले जई ? बल्ति कुई कामा चे कोह्नी, हेको ऐ कि ब़ाहर भुकाले जहि, ते बन्दा चे पगा चे तेले लुथड़ले जही ।
14 h तम्ही जगत चे सोज़ले छिवा, जको नगर पहाड़ा पर बसला ला छे, ओ सारा कनु लुकला कोह्नी । 15 i बन्दी ङीवा ब़ालती खाटी तले ना मेहली, पर जाले में मेहली ताकि सारे घरा मां रहणे आली बन्दा नु सोजले मिलो । 16 j जुही तम्चे सोजले बन्दा चे सामणे चमको, वे तम्चे भले कामा नु ङेखती कने तम्चे ब़ा नरीकारा ची महिमा करो जको स्वर्गा मां छै:।
व्यवस्था चे बारे मां सीख
17 पर, ईं ना समझा कि मैं व्यवस्था भविष्यवक्ता चिया किताबा नु लोप करने वास्ते कोह्नी, बल्कि पुरा करने चे वास्ते आला । 18 l में तम्हानु सच किहे कि जबतक आसमान ते धरती टलती नही जाओ,k तबतक व्यवस्था महु हेक मात्रा या बिन्दु वी बिना पुरा हुला नही टली । 19 ऐ वास्ते जको कुई वी छोटी कनु छोटी आज्ञा नु तेरोड़े, ते जुही बन्दा नु सिखावे, ओह स्वर्ग चे राज्य मां सारा कनु छोटा करला जहि, पर जको कुई आज्ञा चा पालन करी, ते वानु सिखावी, ओही स्वर्गा चे राज्य मां महान हुवी । 20 कांकि मैं तम्हानु सच किहे कि अगर तम्ची धार्मिकता, शाश्त्रीया ते फरीसिया ची धार्मिकता कनु बढ़ती कने ना हो, तम्ही स्वर्ग चे राज्य मां कङी वी ना जा सगा ।
हत्या ना करजा
21 m पेहले चे बन्दा ने केहले कि ‘हत्या’ ना करजा, ते ‘जको हत्या करी, ऊ कचहरी में दोषी ठहराती कने ङन्ड चे लायक हुवी ।’ 22 पर मैं तम्हा नु किहे कि जको कुई आपने भावा पे गुस्सा करे,n ओ सजा चे लायक हुवी, ते निकमा किही, ऊ महासभा में ङन्ड चे भागी हुवी । ते जको कुई आपणे भावा नु बद्दुआ ङिये, नरीकार ओह्नु नरक चे जाख्ते मां नाखती ङीही ।
23 ऐ वास्ते जिसेबेले तु आपणी भेंट नु नरीकारा चे वास्ते चढ़ावी, ओठे तनु याद आवे कि, आपणे भावा चे तरफु माये मना में जको बैर छे,। 24 ते आपनी भेंट ऊठी वेदी चे सामणे छोड़ती ङे, ते जति कने आपणे भावा लारे मेल मिलाप करती गे, ते बल्ति आती कने आपणी भेंट नु चढ़ा आती ।
25 जबतक तू आपणे बैरिया चे लारे कचहरी चे रस्ते में छी, ओह्चे लारे झटपट मेल मिलाप करती गे, कङी इसड़े ना कि बैरी तनु हाकिमा नु सौपे, ते हाकिम तनु सिपाही चे हाथ सौपती ङिये ते जेली में नाखती ङिये । 26 मैं तम्हा नु किहे कि जब तक तू पाई - पाई भरती ना ङि, वे जेली मु तू आजाद ना हो सगी ।
व्यभिचार चे बारे मां शिक्षा
27 o “ मैं तम्हा नु केहले, ‘कि व्यभिचार ना करजा, 28 पर में तम्हा नु हा वी किहे पला, कि जको कुई पराई अस्त्री नु बुरी नजरी लारे ङेखे, ओह आपणे मना मां ही विच्चे लारे व्यभिचार करती चुकला । 29 p अगर दुधी सजी आंख तनु ठोकर खुलावै तां विनु काढ़ती कने भुकाती नाख, कांकि दुधे वास्ते हाओ भले छै कि, दुधे ऐ शरीरा महु हेक खत्म हुती जाओ ते दुधे सारे शरीर नरक मां ना नाखले जाओ । 30 q अगर तनु सज्जा हाथ तनु ठोकर खिलाये तां ते ओह्नु बाड़ती कने भुकाती नाख,कांकि दुधे वास्ते हाओ भले छै कि हेक हाथ कोह्नी होणे पर दुधे सारे शरीर नरका में ना जाओ ।”
तलाक
(मत्ती: 19.9; मरकुस:10.11, 12; लूका 16.18)
31 r “ईं वी केहले गले, ‘जको कुई वी आपणी घराली नु तलाक ङेणे चावे तां त्यागपत्र लिखती ङियो ।’ 32 s पर में तम्हानु किहे कि जको आपणी घराआली नु व्यभिचार चे सिवा कुई नेरे कारणा कनु तलाक ङिये, ओ विकनु व्यभिचार करवावे, ते विचा जिम्मेदार विचा पहला मोणंस छै:, ते जको तलाक आली लारे बिहा करे, ओ व्यभिचार करे ।”
कसम नी खाणी
33 t “तम्ही हा वी सुणती चुकले पेहले चे बन्दा नु केहले गेले तम्ही कुड़ी कसम ना खाजा, ‘पर प्रभु वास्ते आपणी कसम नु पुरी करजा ।’ 34 u पर मै तम्हानु किहे पला कि कङी कसम ना खाजा, ना तां स्वर्ग ची .कांकि ओ नरीकारा चा सिंहासन छै । 35 v ना तां धरती ची, कांकि वा ओह्चे पगा ची चोकी छे, ना यरुशलेम शहरा ची, कांकि ओ महाराजे चा शहर छे । 36 ना ही आपणे ठोङा ची कसम खाजा, कांकि तू हेक वी माला नु चिठ्ठे ते काले ना कर सगी । 37 पर तम्ची हां ची हां, ते ना ची ना हो, कांकि जको कोच्छ ऐकनु जादा हुवे, ऊं शैतान चे तरफु हुवे ।
बदला नी गेह्णा
(लूका 6.29, 30)
38 w तम्ही सुणले कि केहले गेलेते, आंख चे बदले आंख ते ङाता चे बदले ङात । 39 पर तम्हानु में हा किहे कि बुराई करने आले बन्दे लारे बुराई ना करा, पर जको दुधे सज्जे गलवे पर थप्पड़ मारे ओह्चे सनु ङुजा वी फेरती ङे । 40 अगर कुई वी दुधे लारे जबरदस्ती करती कने कुड़ता खोसणे चाहवे, ओह्नु चादर वी ङे जती । 41 अगर कुई बन्दे तनु मां जबरदस्ती आपणा समान चुवाती कने हेक मीलx गेहली जाये, तां ओह्चे लारे ङोन मील चाहला जा । 42 जको कुई वी तोकनु मांगे ओह्नु ङे, ते उधार मांगे तां ओकनु मुंह ना मोड़ ।
दुशमना लारे प्रेम करा
(लूका 6.27, 28, 32-36)
43 तम्ही सुणले कि केहले गेलते, “तम्ही आपणे पड़ोसिया लारे प्यार राखजा ते आपणे बैरीया लारे बेर । 44 पर मैं तम्हा नु किहे कि आपणे बेरिया लारे प्यार राखा, ते आपणे सताणे आला वास्ते प्राथना करा । 45 पर तम्ही आपणे स्वर्गीय ब़ा ची ओलाद ठहराली जावा, कांकि ओ भले ते बुरे पर सूरज ऊगावे ते धर्मी ते अधर्मी पर मिही बरसावे । 46 कांकि तम्ही आपणे प्यार करने आले लारे ही प्यार करा तां तम्चे वास्ते का फल हुवी ? कांकि चुगी गेहणे आले वी इसड़े ही करी । 47 अगर तम्ही हेको आपणे भावा नु ही नमस्कार करा, तां किसे बङे काम करा वी ? का जको नरीकारा नु ना जाणी वे इसड़े ना करी ? 48 y ऐ वास्ते चाही छे कि तम्ही सिध्द बणा, जिंवे तम्चा स्वर्गीय ब़ा सिध्द छैः।”