गरीबा नु दान
6
1 a“सावधान रिहा ! तम्ही बन्दा नु ङिखाणने वास्ते आपणे धर्मा चे काम ना करा * नही तां आपणे स्वर्गीय ब़ा कनु कौछ वी फल नी पा सगा ।”2 “ऐ वास्ते जिसे बेह्ले तू गरीबा नु दान करी, ते आपणे आगु बाजा ना बजवा, जिंवे कपटी, सभा मां ते गलिया मां करी, ताकि बन्दी वांह्ची बड़ाई करी में तम्हानु सच किहे कि वे वानु आपणा बदला मिलती चुकला । 3 पर जिसे बेह्ले तू गरीबा नु दान करी, तां जको दुधा सजा हाथ का करे, ओह्नु दुधा खब़ा हाथ ना जाण सगो । 4 ताकि दुधा दान गुप्त रिहो, ते बल्ति दुधा ब़ा नरीकार जको गुप्त मां ङेखे, तनु फल ङीही ।”
प्राथना
(लूका 11.2-4)
5 bजिसे बेह्ले तू प्राथना करी, तां कपटिया चे जिसड़ा ना हो, कांकि बन्दा नु ङिखाणे वास्ते कोह्नी आराधनालय मां ते सड़का चे मोड़ा पे खड़े हुती कने प्राथना करने वानु आच्छे लागे । में तम्हानु सच किहे पला कि वें आपणा फल पाती चुकले । 6 पर जिसे बेह्ले तू प्राथना करी, तां आपणी भितरली कोठी मां जा, ते दरवाजे बन्द करती कने आपणे ब़ा नरीकार जको गुप्त में छै: प्राथना कर । बल्ति दुधा ब़ा नरीकार जको गुप्त मां ङेखी तनु फल ङीही ।
7 प्राथना करते बखत नेरीया जातियां रोक बक-बक ना करा, कांकि वे समझती कि वांह्चे ब़ोहत ब़ोलणे लारे वांह्ची सुणली जही । 8 ऐ वास्ते तम्ही वांह्चे रोक ना बणा, कांकि तम्चा ब़ा तम्चे मांगणे कनु पेहले जाणे, कि तम्ची का जरुरत छै: । 9 “अत: तम्ही ऐ रीति लारे प्राथना करा, ‘हे अम्चा ब़ा, तू जको स्वर्गा मां छी: दुधे ना पवित्र मनले जाओ,। 10 दुधा राज्य आओ,। दुधी इच्छा जिंवे स्वर्गा मां पूरी हुवि जूहि धरती पे वी हुवो । 11 अम्ची ङियो भर ची रोटी आज़c अम्हानु ङे । 12 ते जिंवे अम्ही आपणे अपराधियो नु माफ करले, जूहि तू वी अम्चे अपराधा नु माफ कर । 13 ते अम्हा नु परीक्षा ची घड़ी मां सम्भाल । पर बुराई कनु बचा, कांकि राज्य ते पराक्रम ते महिमा सदा - सदा दुधी ही छी: । dआमीन । 14 eऐ वास्ते अगर तम्ही बन्दा चे अपराधा नु माफ करा तां तम्चा स्वर्गीय ब़ा वी तम्चे अपराधा नु माफ करी । 15 ते अगर तम्ही बन्दा चे अपराधा नु माफ नी करा तां तम्चा स्वर्गीय ब़ा वी तम्चे अपराधा नु माफ नी करी ।
ब्रत चे बारे मां शिक्षा
16 जिसे बेह्ले तम्ही ब्रत राखा तां कपटिया रोक तम्चे मुंहा पे उदासी ना छाली रिहो, कांकि वे आपणे मुंह बणाली राखी, ताकि बन्दी वानु ब्रत राखली आली जाणो । में तम्हानु सच किहे कि वे आपणा फल पाती चुकले । 17 पर जिसे बेह्ले तम्ही ब्रत राखा तां आपणे ठोङा पे तेल लावा ते मुंह धोवा, 18 ताकि बन्दी ना, पर तम्चा ब़ा नरीकार जको गुप्त मां छै:, तम्हानु ब्रत राखले आले जाणे । इसड़ी दशा में दुधा ब़ा नरीकार जको गुप्त मां ङेखे तनु फल ङीही ।
स्वर्गीय धन
(लूका12.33,34)
19 f “आपणे वास्ते धरती पे धन भेला ना करा, जिठै कीड़े ते काई बिगाड़ती नाखी, ते जिठै चोर कंधी मां मोरे करती कने चोरी करती गिहे । 20 पर आपणे वास्ते स्वर्गा मां आत्मिक धन भेलाकरा, जिठै ना ते कीड़ा ते ना ही काई बिगाड़े, ते जिठै ना चोर कंधी मां मोरे करती कने चोरी कर सगे । 21 कांकि जिठै तम्चे धन छै: उठी ही तम्चे मन लागले रिही ।
शरीरा चा ङिवा आंख छै:
(लूका 11.34-36)
22 “शरीर चा ङिवा आंख छै: ऐ वास्ते अगर दुधी आंख सही हुवे, तां दुधे सारै शरीर वी सोजले हुवी । 23 पर अगर तम्ची आंख खराब हुवे तां, तम्चे पूरे शरीर वी अन्धियारे हुवी, ऐही कारण जको तम्चे मां छै: अगर अन्धकार छै: तां ओ अन्धकार केङा ब़ङा हुवी ।
नरीकार ते धन ङुहु ची सेवा ना कर सगा
(लूका 16.13; 12.22-31)
24 “कुई बन्दे ङुहु गुरुवा ची सेवा ना कर सगी, ओ हेके लारे बेर ते ङुजे लारे प्रेम राखी, या ते हेके लारे मिड़ला रिही ते ङुजे नु तोच्छ जाणी तम्ही नरीकारा ची ते धन ङुहु ची सेवा ना कर सगा ।”
25 ऐ वास्ते में तम्हानु किहे कि आपणे प्राणा वास्ते हा चिन्ता ना करा, कि अम्ही का खऊ, ते का पिऊ, ना ही आपणे शरीरा वास्ते कि अम्ही का घालु, का प्राण रोटी कनु, ते शरीर ओढणा कनु बढ़ती कने कोह्नी ? 26 आसमाना चे पखीया नु ङेखा, वे ना ते रावी, ना बाढ़ी, ते ना खेता में भेले करी, बल्ति वी तम्चा स्वर्गीय ब़ा वानु खुलावै । का तम्ही वाकनु ज्यादा मुल्यवान कोह्नी ? 27 तम्हा मु कुंण छै:, जको चिन्ता करती कने आपणी उम्री मु हेक घड़ी वी बढ़ा सगे g ?
28 ते ओढणा वास्ते चिन्ता का करा वी ? जंगली रंग बिरंगा फूला पे ध्यान ङिया, कि वे किवें बढ़ी, वे ना ते मेहनत करी, ते ना ही काती या ते बल्ति ना ङोरा बणाती कने ओढणी सिवी । 29 hतां वी में तम्हानु किहे पला कि राजा सुलेमान वी आपणे सारी शानसौकत मु, वा फूला ची सुन्दरता चे समान ओढणी घाले आला कोह्नी हुता । 30 ऐ वास्ते जिसे बेह्ले नरीकार मैदान ची घास नु, जको आज छै: काल जाखते मां झोंकती ङिली जही, अगर नरीकार इतनी आच्छी तरावे संजावे, तां ओ अल्पविशवासी बन्दी, तम्हा नु नरीकार ऐकनु बढ़ती कने ओढणी के वास्ते नी घलावी ?
31 ऐ वास्ते तम्ही चिन्ता करती कने हा ना कहेजा कि अम्ही का खऊ, ‘ते का पिऊ, या का घालु ।’ 32 कांकि नेरीया कौमा, यां सारियां चीजा नु सोंधणे मां लागलिया रिही, पर तम्चा स्वर्गीय ब़ा जाणे कि तम्हानु या सारियां चीजा ची लोड़ छै:। 33 ऐ वास्ते पेहले तम्ही नरीकारा चे राज्य ची ते ओह्चे धर्मा ची खोज करा तां ये सारियां चीजा तम्हानु मिलती जाऐ । 34 ऐ वास्ते कलोखी चिन्ता ना करा, कांकि कलोखा ङियो आपणी चिन्ता आप करती गिही, आज चे वास्ते आज ही चा ङोख ब़ोहत छै:।