Ʉlwipuuto lwa kʉsʉʉma ʉbʉtʉʉli
Ʉlwɨmbo lwa Ndaabɨti.
108
Gwe Kyala, ɨndumbula jangʉ jiitotiike mmyako,angʉkwɨmbɨlaga nʉ kʉkʉpaala ʉgwe,
nɨ ndumbula jangʉ joosa.
2 Lembʉka, gwe kɨsango na gwe ipango!
Angʉlaabɨla ʉkʉkwɨmbɨla kʉbʉkye.
3 Gwe NTWA, ngʉkʉgwɨlaga ʉlʉpi mfikolo ɨfya bandʉ,
ngʉkwɨmbɨlaga ɨnduufyo mfilʉndɨlo ɨfya bandʉ.
4 Iipyana lyako ikʉlʉmba ʉkʉkɨnda ʉmpaalanga,
ʉbʉsʉʉbɨligwa bwako bʉfikile na kʉmwanya.
5 Gwe Kyala, gwɨmɨkigwege kʉmwanya,
ʉbʉsisya bwako bʉbalanilege pakiisʉ poosa.
6 Ʉtʉtʉʉle nʉ kʉtwitɨkɨla,
ʉkʉtɨ abakʉndwe baako bapokigwege.
7 Kyala ajobile ʉkʉfuma pabwikemo bwake atile,
“Ngʉtola nʉ kʉbajabania ɨkiisʉ kya mu Syekemu,
ngʉbapɨmɨla ʉlʉsooko ʉlwa mu Sukoti.
8 Ɨkiisʉ kya Giliati kyangʉ, kyope ɨkya Manase kyangʉ,
ɨkya Efulaimu kɨlɨ bo ʉlwa kɨtili kyangʉ ɨkya kyela,
nɨ kya Juuta ngili jangʉ ɨjaa bʉtwa.
9 Ɨkiisʉ kya Moabu lyo ibeeseni lyangʉ ɨlya kʉsugusulɨlamo,
ɨkɨlato kyangʉ ngʉkɨsopela ɨkiisʉ ɨkya Etomu,
Filisiti ngʉnnjwegelelaga ʉnjwego gwa bʉtoli.”
10 Jwani aikʉndwala nkaaja aka kalɨ ni ilinga?
Aikʉʉndongosya jwani mpaka nkaaja ako akaa mu Etomu?
11 Gwe Kyala, bʉle, ʉtʉlekile loosa?
Bʉle, ʉtikʉbʉʉka na basikali bɨɨtʉ?
12 Ʉtʉpepo ʉbʉtʉʉli kʉ balʉgʉ bɨɨtʉ,
ʉbʉtʉʉli bwa mundʉ bʉtikʉbomba nafimo.
13 Kyala lɨnga alɨ kʉ lʉbafu lwɨtʉ, aatukʉtola,
ʉmwene aikʉbakanyania abalʉgʉ bɨɨtʉ.