Ʉkwibuneesya kwa mundʉ ʉjʉ alɨ mbʉtolwe
Kʉ mpaali gwa lwɨmbo. Ʉlwɨmbo lwa Ndaabɨti.
109
Gwe Kyala, gwe ngʉkʉtuufya,ʉlɨngajaga kɨmyemye itolo,
2 namanga abandʉ ababiibi na basyobi bikʉndʉngʉlʉpɨla,
bikʉʉnjobela ʉne ɨsya bʉtʉngʉlʉ.
3 Baasyʉngʉʉtiile na masyʉ agaa bʉbengwe,
bikʉlwa na niine kɨsita nongwa najɨmo.
4 Ɨsi bikʉʉngomolela kʉ lʉgano lwangʉ ko kʉʉsitaaka,
poope ʉne ngʉbiipuutɨla.
5 Bikʉʉhomba ɨmbiibi pa nunu syangʉ,
bikʉʉmbenga kʉ lʉgano lwangʉ.
6 Ʉmmbɨɨke ʉndongi ʉmbiibi, anndonge ʉndʉgʉ gwangʉ,
ʉgwa kʉmmoohela, antwale pabʉlongi.
7 Pala pabʉlongi atobesigwe,
ʉkwinosya kwake bʉjege bʉtʉlanongwa ʉbʉngɨ.
8 Amasikʉ gaa bʉʉmi bwake gajege mapimba,
ʉjʉngɨ apyanilepo pabʉjo bwake ʉbwa bʉlongosi.a
9 Abaanaake bajege bapɨɨna,
ʉnkasi ajege mfwɨle.
10 Abaanaake babeetege nʉ kʉsʉʉma sʉʉma,
bakalondege ɨfyakʉlya kʉbʉtali nɨ fisaame fyabo.
11 Ʉjʉ ikʉmmelela apokege ɨkyʉma kyake kyosa,
abaheesya bapʉpege ɨfi akabile mu mbombo jaake.
12 Alɨngajangapo ʉmundʉ ʉgwa kʉmpaakɨsya,
pamo ʉgwa kʉbabonela ɨkɨsa abaanaake abapɨɨna.
13 Ʉlʉjungu lwake loosa ʉlʉpyute,
ɨngamu syabo syomoligwe mu sopelo ɨjɨ jikwisa.
14 Ʉbʉtʉlanongwa bwa baagwise,
bʉkʉmbʉkigwege nkyeni mu NTWA,
ɨmbiibi sya nna,
silɨngahobokeligwaga.
15 Ɨmbiibi syabo sijege nkyeni mu NTWA bwila,
looli abeene balɨngakʉmbʉkigwaga loosa.
16 Namanga ʉjo akaakʉmbwike ʉkʉbapelela ɨkɨsa abangɨ,
looli aabakagile abalondo na bafweje,
aba boonywike amaka mpaka baafwile.
17 Aaliiganile ʉkʉbaguna abandʉ,
ɨkɨgune kɨmmwage jʉʉjo.
Akaaliiganile ʉkʉbasaja abangɨ,
ʉmwene atoligwe ʉkʉsajigwa.
18 Aakʉfwele ʉkʉguna bo ʉlwa mwenda,
ɨkɨgune kingɨle nkatɨ mmyake ngatɨ mɨɨsi,
mfifupa fyake bo ʉlwa mafuta.
19 Ɨkɨgune kɨnkupɨkɨle bo ʉlwa mwenda,
kɨnsyʉngʉʉtɨle bo ʉlwa mpango ʉgʉ ikʉfwala.
20 Gwe NTWA, ʉbahombe ɨsyo aba bikʉʉsitaaka,
aba bikʉʉnjobela ɨmbiibi ʉne.
21 Looli ʉgwe gwe NTWA Kyala,
ʉʉmbombelege ʉne mu ngamu jaako.
Ʉmboke, kʉnongwa jaa booloolo ni ipyana lyako.
22 Namanga ʉne ndɨ moonywa ndɨ ndondo,
mfulasiigwe mpaka mu ndumbula jangʉ.
23 Ngʉkɨnda bo ʉlwa nsyʉngʉʉlʉ ʉgwa namajolo,
ngʉbelelʉsigwa bo ʉlwa ipalaalɨla.
24 Amafundo gangʉ moonywa kʉnongwa jaa kʉfipɨɨka ɨfindʉ,
ʉmbɨlɨ gwangʉ gʉgandile fiijo.
25 Niipelile ʉkʉja kandʉ kaa koobeligwa na bandʉ,
lɨnga baambwene, bikʉsukaania ɨmitʉ gyabo ʉkʉʉnyangalɨla.
26 Gwe NTWA Kyala gwangʉ, ʉndʉʉle,
ʉmboke, ʉkʉkongana ni ipyana lyako.
27 Ʉbanangɨsye abandʉ ʉkʉtɨ jo ʉgwe ʉbombile ɨsyo,
ʉgwe gwe NTWA, jo ʉgwe ʉbombile bo ʉlo.
28 Ʉbaleke bagunege, looli ʉgwe ʉʉsajege.
Basʉʉkege apa bikʉlwa na niine,
ne mbombeli gwako nhobokege.
29 Abalʉgʉ bangʉ bafwɨkigwe ʉbʉfujufu,
bafwalege ɨsoni syabo bo ʉlwa mwenda.
30 Ngʉgwaga ʉlʉpi kʉ NTWA na kanwa kangʉ,
ngʉntuufyaga pa kɨlʉndɨlo ɨkɨnywamu.
31 Namanga ʉmwene ikʉmmwɨmɨla ʉndondo,
ikʉmpoka bo bikʉntiilɨsya.