KALATA GWA
LɄTƗ
ƗSYAKɄLONGOSYA
Kalata ʉjʉ bampeele ɨngamu ɨjaa nkiikʉlʉ jʉmo, ɨngamu jaake Lʉtɨ, ʉgwa kɨkolo ɨkya Bamoabu. ABamoabu baalɨ bapalamani baa kiisʉ ɨkya Isilaɨli. Akabalɨlo ako aBamoabu nɨ kiisʉ kya Isilaɨli baamanyeene fiijo. Kalata ʉjʉ ikʉpanga ɨnongwa ɨsi syabonekaga, bo ɨkiisʉ kya Isilaɨli kikʉlongosigwa na balamuli (ɨkyɨnja kya 1375-1050 Kɨlɨsiti bo akaalɨ ʉkʉpaapigwa). Kʉbwandɨlo ɨkiisʉ kya Isilaɨli kyalongosigwaga na balamuli, kɨkaalongosigwaga na banyafyale. Abalamuli baalɨ bandʉ aba Kyala aabakooliile ʉkʉbalongosya aBanyaisilaɨli ʉkʉlwa na balʉgʉ baabo. Kangɨ baalamulaga ɨnongwa ɨsya Banyaisilaɨli. Bala kalata gwa Abalamuli 2:10-19.
Kalata ʉjʉ ikʉtʉmanyisya ʉkʉtɨ, ɨsajo sya Kyala ikʉbapapo abandʉ baa fikolo fyosa ɨfya nkiisʉ. Kyala aalɨnsajile Lʉtɨ ʉkʉja gwa kɨkolo ɨkɨ aafumile Ndaabɨti. Ɨfyɨnja fingi bo fikɨndile, Jesu Kɨlɨsiti aapaapiigwe ʉkʉfuma nkɨkolo ɨkyo. Kalata ʉjʉ ikʉnangɨsya ʉbooloolo nʉ bwanalooli ʉbʉ aalɨ nabo Lʉtɨ kʉ kɨkolo ɨkya ndʉme. Kangɨ ʉbwanalooli bwa Kyala ʉbwa kʉbakeeta abandʉ baake pakabalɨlo akaa ndaamyo, bʉlɨ pabwelu itolo.