KALATA GWA
LɄTƗ
Elimeleki nʉ nkasi bikʉbopela kʉ Moabu
1
1-2 Ijolo pakabalɨlo kamo nkiisʉ ɨkya Isilaɨli, bo kikʉlongosigwa na balamuli, aalipo ʉnnyambala nʉ nkasi na baanaabo abalʉmyana babɨlɨ. Ʉnnyambala ɨngamu jaake aalɨ jo Elimeleki, ʉnkiikʉlʉ aalɨ jo Naʉmi, abaana baalɨ bo baa Maloni na Kilyoni. Baalɨ baa nkɨkolo ɨkya Efulati mu Betelehemu, akaaja kaa Jutai. Nkiisʉ kyabo jaagwile ɨnjala, po abeene balɨnkʉsaamɨla nkiisʉ kya Moabu. 3 Po bo kakɨndile akabalɨlo, Elimeleki alɨnkʉfwa. Ʉnkasi Naʉmi alɨnkʉsyala mfwɨle na baanaake bobabɨɨlɨ. 4 Abaanaake Maloni na Kilyoni balɨnkwenda nʉ kʉja nʉ bwegi, balɨnkʉbeega abalɨndwana aBamoabu, jʉmo ɨngamu jaake aalɨ jo Lʉtɨ, ʉjʉngɨ aalɨ jo Olipa. Balɨnkʉja mula mula mu Moabu ɨfyɨnja kalongo bʉno. 5 Po leelo Maloni na Kilyoni boope balɨnkwenda nʉ kʉfwa. Ʉnnabo Naʉmi ʉmfwɨle, alɨnkʉsyala kɨsita ndʉme na kangɨ kɨsita baanaake.Naʉmi na Lʉtɨ bikʉbuja kʉ Betelehemu
6 Naʉmi bo akaalɨ mu Moabu, alɨnkʉpɨlɨka ʉkʉtɨ ɄNTWA abakeetileko abandʉ baake kʉ Isilaɨli, abapeele ɨfindʉ. Bo apɨliike ɨsyo, alɨnkwinogona ʉkʉbuja kʉmyabo kʉ Isilaɨli. 7 Alɨnkʉsumuka ʉmwene na bakamwana ʉkʉfuma apa baalipo mu Moabu, nʉ kʉbʉʉka kʉkaaja kʉ Jutai. 8 Naʉmi alɨnkʉjoba kʉ bakamwana baake bobabɨɨlɨ, alɨnkʉtɨ, “Baanangʉ, amubujege, mubʉʉkege kʉkʉtɨ mundʉ kʉ bapaapi baake. ɄNTWA jo ajege ni ipyana kʉmyɨnu, bo apa nuumwe mwalɨ kʉ balʉme bɨɨnu aba bafwile, kangɨ bo apa mwalɨ na kʉmyangʉ. 9 ɄNTWA abapege ʉbʉsangalʉfu, kʉkʉtɨ mundʉ ammwage ʉnnyambala ʉgwa kwegana nagwe nʉ kʉja nʉ bʉʉmi ʉbʉnunu mu nyumba jaa ndʉme.” Po alɨnkwenda nʉ kʉbafipa.a Looli abeene baa Lʉtɨ na Olipa balɨnkʉkuuta, balɨnkʉlɨla fiijo. 10 Balɨnkʉmmwamula balɨnkʉtɨ, “Gwe jʉʉba, hɨmma sikabagɨla. Ʉswe tukʉbʉʉkaga itolo na nungwe kʉ bandʉ baako!”
11 Looli Naʉmi alɨnkʉtɨ, “Mwe, amubujege baanangʉ! Mbelile fiijo, mulɨngangongaga. Bʉle, ʉmwe mukʉtɨ ʉne mbagiile ʉkʉpaapa abaana abanyambala kangɨ, ʉkʉtɨ bo bajege balʉme bɨɨnu? 12 Amubujege baanangʉ, bʉʉkaga! Ʉne ndɨ nkangale mfikilepo, ngabagɨla ʉkwegigwa kangɨ. Nalɨnga poope neegigwaga gʉʉ mwisyʉgʉ, nʉ kʉpaapa abaana abanyambala. 13 Eemwa, kalɨ mwabagiile poope ʉkʉbaguulɨlɨla ʉkʉfika apa bakʉlile? Kalɨ, mwifundɨkɨliile itolo ʉmwe kɨsita kʉlonda ʉkwegigwa na bangɨ? Somma baanangʉ, keeta kʉmyangʉ mbalapala fiijo ʉkʉkɨnda kʉmyɨnu, paapo ʉne ɄNTWA angomile.”
14 Abakamwana baake balɨnkwandɨsya, balɨnkʉlɨla fiijo bo paa pabwandɨlo. Po Olipa alɨnkʉnsanukɨla ʉnkamwana, alɨnkʉmfipa nɨ kɨsa, alɨnkʉnndaga, alɨnkʉbʉʉka kʉ bapaapi baake. Looli ʉmwene Lʉtɨ jo alɨnkʉmmʉʉmɨɨlɨla ʉnkamwana gwake. 15 Naʉmi alɨnkʉtɨ, “Keeta, ʉnkasi nnino abʉʉkile kʉ bandʉ baake na kwa gyabaakyala gyake. Nungwe ngʉsʉʉma, syo nunu ʉkʉtɨ ʉnkonge ʉnnino.”
16 Ʉmwene Lʉtɨ alɨnkʉmmwamula ʉnna, alɨnkʉtɨ, “Jʉʉba, mbelile, ʉlɨngambyelesyaga ʉne ʉkʉtɨ ngʉleke ʉgwe, mbujege kʉkaaja.
Kʉno kʉbʉʉkaga, niine ngʉbʉʉkaga na nungwe.
Pabʉjo apa kʉgonaga na niine ngʉgonaga.
Abandʉ baako bo bikʉjaga bandʉ bangʉ.
Kyala gwako ikʉjaga jo Kyala gwangʉ.
17 Apa kʉfwɨlaga po ngwakʉfwɨlaga nʉ kʉsyɨligwa.
Syo ɄNTWA ambepo ʉlʉfundo lɨnga ngasikonga ɨsi njobile.
Looli ʉbʉfwe bwene bukʉtʉtapʉlaniaga ʉgwe na niine.”
18 Naʉmi bo ikʉsikeeta ɨsya kʉtɨ Lʉtɨ atumwile ʉkʉnkonga, alɨnkʉsita kwandɨsya ʉkʉmpyelesya. 19 Po leelo balɨnkwendelela bobabɨɨlɨ nɨ njɨla jaabo, balɨnkwakʉfika mu Betelehemu. Bo bafikile mu Betelehemu abandʉ boosa balɨnkʉswiganika, ʉkʉpɨlɨka muno bajɨɨliile ʉkwisɨla kwabo. Boope abakiikʉlʉ biinaabo balɨnkʉlaalʉʉsania, balɨnkʉtɨ, “Mwe, nalooli ʉjʉ akaja jo Naʉmi?” 20 Naʉmi alɨnkʉbabʉʉla alɨnkʉtɨ, “Mulɨngangoolelaga ɨngamu ɨjaa Naʉmi,b mutɨgɨ Mala,c paapo Kyala ʉgwa Maka aambombiile ɨmbalapala ɨsi sikʉʉmbaba fiijo. 21 Naasookilemo ʉne muno bo ndɨ nnoge, ɄNTWA jʉʉjo andwele kangɨ kɨsita nafimo. Po apa ʉne ngʉtɨ fiki mukʉngoolela ɨngamu ɨjaa Naʉmi? Kaabʉno ɄNTWA ʉgwa Maka aafundile, andwaliile ʉbʉtolwe!”
22 Mo muno Naʉmi nʉ nkamwana Lʉtɨ ʉMmoabu, baabujile kʉ Isilaɨli ʉkʉfuma kʉ Moabu. Bo bikʉfika mu Betelehemu, kaalɨ ko kabalɨlo akaa bwandɨlo bwa ntondolo gwa syaɨli.d