Lʉtɨ ikʉfulʉʉla mu ngʉnda gwa Boasi
2
Kʉ Betelehemu aaliko ʉmundʉ jʉmo ʉmwɨmɨkigwa kangɨ ʉnkabi, ɨngamu jaake aalɨ jo Boasi. Ʉmundʉ ʉjʉ aalɨ nkamu gwa Elimeleki ʉjʉ aafwile, ʉndʉme gwa Naʉmi. 2 Ɨliisikʉ lɨmo Lʉtɨ ʉMmoabu alɨnkʉjoba kʉ nkamwana, alɨnkʉtɨ, “Jʉʉba, ngʉlonda ʉne mbʉʉke kʉ migʉnda, ngafulʉʉlege muno bikʉtondola. Lʉmo ʉmundʉ jʉmo kɨmmwage ɨkɨsa ende nʉ kʉʉnyiitɨkɨsya.” Ʉnkamwana alɨnkʉmmwitɨkɨla, alɨnkʉtɨ, “Eena, syo nunu mwanangʉ, bʉʉkaga kabombe.”3 Lʉtɨ alɨnkwakʉfikɨla pa ngʉnda gʉmo, alɨnkʉsalasala munyuma mbatondoli. Kʉ lʉsako lwake ʉlʉnunu, ngɨmba ʉngʉnda gʉla gwalɨ gwa Boasi, ʉnkamu gwa Elimeleki.
4 Joope Boasi ʉmwene ngʉnda, alɨnkwisako ʉkʉfuma kʉ Betelehemu. Bo afikile pa ngʉnda alɨnkʉbaponia boosa, alɨnkʉtɨ, “ɄNTWA ajege na nuumwe.” Boope balɨnkwamula balɨnkʉtɨ, “ɄNTWA akʉsajege na nungwe.” 5 Boasi alɨnkʉnndaalʉʉsya ʉmwɨmɨlɨli, alɨnkʉtɨ, “Kalɨ ʉndɨndwana jʉla jo jwani?” 6 Ʉmwɨmɨlɨli alɨnkwamula alɨnkʉtɨ, “Ʉndɨndwana jʉla Mmoabu, jo nkamwana gwa Naʉmi ʉjʉ aaliisile nagwe ʉkʉfuma kʉ Moabu. 7 Lɨɨlɨno iisile apa pakʉsʉʉma, atile, ‘Mbelile ngʉsʉʉma mfulʉʉlemo nʉ kʉbʉngaania munyuma ndɨ aba bikʉtondola.’ Po leelo nʉmmwitɨkiisye. Alipo na nuuswe pa mbombo apa ʉkʉfuma lʉʉ lʉbʉnjʉ ʉkʉfika ʉlʉ. Atʉʉsiisyepo panandɨ itolo mwi itembe mula.”
8 Boasi bo apɨliike sisiisi, po alɨnkʉnkoolela Lʉtɨ alɨnkʉmmbʉʉla alɨnkʉtɨ, “Mwanangʉ, ngʉtɨ komma ʉkʉbʉʉka kʉkʉfulʉʉla kʉ ngʉnda ʉgwa mundʉ ʉjʉngɨ. Ʉfulʉʉlege munomuno, ʉlɨngasookangamo. Looli ʉjege pamopeene na balɨndwana aba bikʉbomba mu ngʉnda gwangʉ. 9 Ʉfulʉʉlege mu ngʉnda gʉʉgo abaa mbombo bangʉ bikʉtondola. Ʉlɨngatiilaga, mbalagiile abalʉmyana aba ʉkʉtɨ bangakʉtaamyaga ndɨ syosa itolo. Looli ʉbakongesyege abalɨndwana abo munyuma. Kangɨ lɨnga kʉʉmɨlwa amɨɨsi, po ʉbʉʉkege kʉkʉnwa amɨɨsi agaa mu ndeko, aga banegile abalʉmyana.”
10 Ʉmwene Lʉtɨ alɨnkwijiisya, alɨnkwinamisya ɨkyeni kyake paasi, alɨnkʉtɨ, “Gwe malafyale gwangʉ, ʉne ndɨ nheesya muno. Po ndɨgɨ kalɨ fyo findʉ fiki, ɨfi ʉne fimbeliile ʉkʉtɨ ndyagege ɨliipyana ɨliikʉlʉmba bo ɨlɨ kʉmaaso gaako?” 11 Boasi alɨnkʉmmwamula alɨnkʉtɨ, “Mbʉʉliigwe fiijo boosa ʉbʉnunu ʉbʉ gʉmmbombiile ʉnkamwanago, ʉkʉfuma paa pabʉfwe bwa ndʉmego, nʉ kʉtɨ ʉtumwile ʉkʉbaleka ʉgʉʉso nʉ nyoko, kangɨ nɨ kiisʉ kyako kyope ɨkɨ ʉpaapɨliigwe ʉkɨlekile. Gwendile nʉ kwisa kʉ bandʉ aba ʉkaabameenyemo sikʉ. 12 Bo ʉlʉ leelo ʉlondile jʉjʉʉgwe ʉbʉtʉʉli nʉ bʉponelo bwa bʉʉmi bwako kʉ NTWA, Kyala gwa Isilaɨli. Po leelo jʉʉjo ʉmwene ɄNTWA akʉsajege palɨ ɨsi ʉbombile, nʉ kʉtɨ akʉhombege ɨfinunu nalooli.”
13 Po leelo Lʉtɨ alɨnkʉtɨ, “Gwe ntwa gwangʉ, ʉne bo ndyagile nalooli bʉnoobʉno ɨliipyana kʉmyako! Ʉʉsʉʉbiisye, ʉjobile ɨnunu kʉmyangʉ ngatɨ ndɨ jʉmo mbabombeli baako, na paapo ngaja mbombeli gwako.”
14 Pakabalɨlo akaa kʉlyamo ɨfindʉ, po Boasi alɨnkʉjoba kwa Lʉtɨ, alɨnkʉtɨ, “Isaga leelo kʉmyɨtʉ apa, ʉlyemo nungwe ɨfindʉ pamopeene na nuuswe. Ɨfi apa ɨfimeenya ɨfya fisyesye, nɨ fyakʉlɨɨla fyake kʉtobelaga mmɨɨsi gaa maafiilʉ aga.” Lʉtɨ alɨnkʉtʉʉgasya kɨfuki na batondoli, Boasi alɨnkʉmpapo ɨfindʉ ɨfikasinge. Po Lʉtɨ alɨnkʉlya, alɨnkwikʉta, alɨnkʉsyasya fimo. 15 Bo baliilemo, Lʉtɨ alɨnkʉsumuka, alɨnkʉbʉʉka kʉkʉkwendelela ʉkʉfulʉʉla. Boasi alɨnkʉbalagɨla abalʉmyana, alɨnkʉtɨ, “Munndekege nalɨnga ikʉsala muno syalimo ɨngose ɨsya syaɨli, mulɨngansʉʉsyaga. 16 Kangɨ munnduusɨlengepo ɨfisaasali fimo ʉkʉfuma mu ngose, munndekelege afisalege, mulɨngankaanisyaga.”
17 Lʉtɨ alɨnkʉfulʉʉla mu ngʉnda, alɨnkʉfika nkabalɨlo akaa namajolo, alɨnkʉpʉʉla ɨsyaɨli ɨjɨ aabʉngeenie. Ɨsyaɨli ɨjɨ aapʉʉlile, jaalɨ pa kɨgelelo ɨkya bʉsito ʉbwa kilo kalongo na itatʉ. 18 Alɨnkʉpɨmba, alɨnkʉbʉʉka najo kʉkaaja. Bo afikile, alɨnkʉnnangɨsya ʉnkamwana ɨsyaɨli ɨjɨ afulʉʉlile. Ɨfindʉ ɨfi aasyesye bo alɨ pakʉlya kʉ ngʉnda, alɨnkʉmpa.
19 Ʉnkamwana alɨnkʉnndaalʉʉsya, alɨnkʉtɨ, “Mwanangʉ ʉfulʉʉlile kʉʉgʉ ʉmwisyʉgʉ? Gwabombaga kʉʉgʉ ɨmbombo? Asajigwege itolo ʉjʉ akwambɨliile.” Ʉmwene Lʉtɨ alɨnkʉmpangɨla ʉnkamwana ɨsya kʉla aabombaga, alɨnkʉtɨ, “Jʉʉba, ɨngamu jaake ʉmundʉ jʉla jo Boasi.” 20 Naʉmi alɨnkʉmmwamula ʉnkamwana kangɨ, alɨnkʉtɨ, “Asajigwege ʉmwene nʉ NTWA. Iipyana lyake ɄNTWA lyo lɨkabaleka abʉʉmi na bafwe.” Naʉmi alɨnkongelapo ʉkʉmmbʉʉla, alɨnkʉtɨ, “Ʉnnyambala ʉjʉ Boasi nkamu gwɨtʉ, jo jʉmo mbaa kɨlɨngo.”
21 Po Lʉtɨ ʉMmoabu alɨnkwendelela ʉkʉmpangɨla, alɨnkʉtɨ, “Ʉnnyambala jʉla kangɨ atile, ‘Ʉjege nabo kɨfuki abaa mbombo bangʉ, mpaka paapo bikʉmalɨlaga ʉntondolo gwangʉ.’ ”
22 Naʉmi alɨnkʉmmwitɨkɨla ʉnkamwana, alɨnkʉtɨ, “Mwanangʉ, syo moomuumo fiijo ʉkʉtɨ ʉgwe ʉbakongesyege abaa mbombo baake abalɨndwana, bo lʉʉlo ajobile jʉʉjo. Komma ʉkʉbʉʉka kʉ migʉnda ɨgɨngɨ, kaabʉno babagiile ʉkʉkwangalɨla.”
23 Po paapo ʉmwene Lʉtɨ alɨnkʉja gwa kʉbakongesya abaa mbombo abaa Boasi, bo ikʉbʉʉka kʉkʉfulʉʉla, mpaka paapo ʉntondolo ʉgwa syaɨli nʉ ntondolo ʉgwa nganu gwamalɨkiile. Ʉbʉsikʉ boosa ʉbo Lʉtɨ aajaga na jʉ nkamwana gwake.