Lʉtɨ ikʉkaba ʉnnyambala ʉgwa kʉmmwega
3
Bo kakɨndilepo akabalɨlo, Naʉmi alɨnkʉjoba kʉ nkamwana gwake, alɨnkʉtɨ, “Mwanangʉ, ʉne ngʉtɨ lɨɨlɨno ngʉlondele ʉbwegi, ʉkʉtɨ nungwe ʉje na kaaja. 2 Boasi, ʉjʉ gwalɨ nabo abaanaake abalɨndwana, nkamu gwɨtʉ. Pakɨlo ʉmwisyʉgʉ, ʉmwene ikʉja nɨ mbombo ɨjaa kʉlʉlʉʉsya ɨsyaɨli pa kɨpalo. 3 Oko leelo, ega amɨɨsi ogaga, ʉtɨ nʉ kʉpakala amafuta, kangɨ ʉtɨ nʉ kʉfwala ɨmyenda gyako ɨminunu, ʉbʉʉkege kʉ kɨpalo kyake ɨkya kʉpʉʉlɨla. Looli ʉngasulwa ʉkwinangɨsya kʉmyake ʉmundʉ jʉla, looli bo amalile ʉkʉlya nʉ kʉnwa. 4 Lɨnga leelo ikʉtɨ alambalalege, ʉkapakeetege fiijo apa ikʉlambalala. Bo alambaleele, ʉgwe gwingɨlege kɨmyemye itolo, ʉkakingʉlege kʉ njajo syake, ko ʉkalambalalege. Po paapo ʉmwene bo alembwike ikʉkʉbʉʉlaga ɨsya kʉbomba.” 5 Lʉtɨ alɨnkʉmmwamula ʉnkamwana, alɨnkʉtɨ, “Syosa ɨsi ʉsijobile jʉʉba, ngwakʉsibomba.”6 Alɨnkʉsuluka ʉkʉbʉʉka kʉ kɨpalo ɨkya kʉpʉʉlɨlapo, alɨnkʉbomba syosa siisyo anndagiile ʉnkamwana. 7 Boasi bo amalile ʉkʉlya nʉ kʉnwa, kangɨ bo ahobwike, po alɨnkʉbʉʉka pakʉlambalala kɨfuki na apa fyalipo ɨfindʉ ɨfi fipʉʉliigwe, po alɨnkʉgona ʉtʉlo. Po Lʉtɨ alɨnkʉnyaatuka, alɨnkʉfika apa Boasi aalambaleele, aagonile ʉtʉlo. Alɨnkʉnkingʉla ɨnjajo, alɨnkʉlambalala joope palapala, looli alɨnkʉja pambalɨ pa njajo.
8 Pakɨlo pakatɨ Boasi alɨnkʉgʉlʉka ntʉlo, po alɨnkʉsanukɨla ʉlʉbafu ʉlʉngɨ. Alɨnkʉkeeta, alɨnkʉnyomoka ʉnkiikʉlʉ aalipo aalambaleele pambalɨ pa njajo syake. 9 Alɨnkʉnndaalʉʉsya alɨnkʉtɨ, “Gwe gwani ʉgwe?” Po Lʉtɨ alɨnkwamula alɨnkʉtɨ, “Jo ʉne Lʉtɨ ne ntʉmwa gwako. Ʉkʉnangɨsya ʉkʉtɨ kwitɨka ʉkʉʉnyiingɨlapo ɨkɨlɨngo, ngʉsʉʉma ʉnginge ɨkɨpeto ɨkya mwenda gwako.a Kaabʉno ʉgwe gwe jʉmo mbaa kɨlɨngo, nkɨkolo kya nkamwana gwangʉ ʉnnyambala.”
10 Boasi alɨnkʉmmwamula alɨnkʉtɨ, “Ʉsajigwege nʉ NTWA, paapo na ʉlʉ ʉkaalɨ ʉlimo kʉbomba ɨsya booloolo. Kangɨ lɨɨlɨno po ʉbombile ʉkʉkɨnda kʉ sya kwanda, paapo ʉkabʉʉka nkʉbakonga abalʉmyana, abakabi pamo abalondo. 11 Po mwanangʉ, lɨɨlɨno ʉngatiilaga, ʉne angʉkʉbombela syosa ɨsi kʉjoba. Namanga abandʉ boosa nkaaja muno mu Betelehemu, bakʉmeenye ʉkʉtɨ ʉgwe ʉlɨ nkiikʉlʉ gwa kajɨɨlo akanunu. 12 Syope nɨ sya kɨkolo ɨsi ʉjobile ʉkʉtɨ ndɨ nkamu gwako gwa kɨfuki, kangɨ mbagiile ʉkʉkwingɨlapo ɨkɨlɨngo moomuumo, looli alipo ʉjʉngɨ jo gwa kɨfuki ʉkʉkɨnda ʉne. 13 Lɨɨlɨno leka ʉbʉsikʉ bʉkye, po ʉne angwaganila nʉ kʉjobesania nʉ mundʉ ʉjo ʉkʉtɨ akwingɨlepo. Lɨnga ʉjo ikʉkaana, po ʉne angʉkwingɨlapo. ɄNTWA ajege nkeeti gwangʉ. Gonaga ʉtʉlo lɨɨlɨno mpaka nʉlʉbʉnjʉ.”
14 Po paapo Lʉtɨ alɨnkʉgona ʉtʉlo kʉʉ kʉmbalɨ kʉ njajo sya Boasi. Bo kʉkaalɨ ʉkʉjenjelʉka alɨnkʉlembʉka, paapo Boasi aalondaga abandʉ bangamanya ʉkʉtɨ ʉnkiikʉlʉ afumileko kʉ kɨpalo kya kʉpʉʉlɨla. 15 Boasi alɨnkʉtɨ, “Twala apa ʉmwenda gwako ʉgo gwikobiike pa fibeja, mo ʉpinyɨle ɨsyaɨli ɨjɨ ngʉlonda ʉkʉkʉpapo.” Alɨnkʉmpɨmɨla ɨkilo amalongo matatʉ, alɨnkwenda nʉ kʉntwɨka, alɨnkʉsookapo. Po Boasi alɨnkʉbʉʉka kʉkaaja.
16 Naʉmi alɨnkʉmmwambɨlɨla Lʉtɨ, kangɨ alɨnkʉnndaalʉʉsya, alɨnkʉtɨ, “Mwanangʉ, mbʉʉla syendile bʉleebʉle?” Lʉtɨ alɨnkʉmpangɨla syosa muno Boasi ammbombiile. 17 Alɨnkʉnnangɨsya, alɨnkʉtɨ, “Keeta nɨ syaɨli ɨjɨ ambeele, atile, ‘Ʉlɨngabʉʉkaga kʉ nkamwanago maboko matʉpʉ.’ ” 18 Po Naʉmi bo abʉʉliigwe ɨsi, alɨnkʉtɨ, “Kanunu mwanangʉ, lɨɨlɨno ʉlʉ ʉjege nʉ lʉtengaano itolo, ʉkeetege apa sikʉmalɨkɨlaga, paapo ʉmundʉ ʉjo atikʉleka ʉkʉbomba ɨsi ajobile ɨliisikʉ lɨlɨɨlɨ.”