Boasi ikʉmmwega Lʉtɨ
4
Boasi alɨnkʉfyʉka ʉkʉbʉʉka pabʉjo bwa kʉbombela ʉlʉkomaano, kʉ kɨfigo ɨkya ilinga lya kaaja kaabo, alɨnkʉtʉʉgala ʉkʉtɨ annguulɨlege ʉnkamu ʉgwa kɨlɨngo nkɨkolo kyabo, bo muumo aalɨmmbʉʉliile Lʉtɨ. Ʉmundʉ jʉla alɨnkʉfika, Boasi alɨnkʉmmwambɨlɨla, alɨnkʉtɨ, “Isaga, paagʉka apa nkamu gwangʉ, tʉʉgasya.” Alɨnkʉpaagʉka, alɨnkʉtʉʉgasya. 2 Po Boasi, alɨnkwenda nʉ kʉbabʉngaania abanyambala abanyago kalongo, abenekaaja kaa Betelehemu, alɨnkʉbasʉʉma ʉkʉtɨ batʉʉgale, balɨnkʉtʉʉgala. 3 Boasi alɨnkʉjoba kʉ nkamu, alɨnkʉtɨ, “Naʉmi ʉjʉ iisile ʉkʉfuma kʉ Moabu, ikʉʉlɨsya ʉngʉnda ʉgʉ gwalɨ gwa nkamu gwɨtʉ Elimeleki. 4 Syo ɨsi ngʉkooleliile ʉkʉtɨ gʉʉle ʉngʉnda gʉla, nkyeni mmbandʉ aba babʉngeene apa, na nkyeni mbanyago aba balipo apa. Lɨnga kwitɨka ʉkʉtɨ ʉbagiile ʉkʉʉla ʉngʉnda gʉla, po kanunu itolo. Looli lɨnga ʉtikʉlonda ʉkʉʉla, po gʉʉmbʉʉle lɨɨlɨno, ʉkʉtɨ mmanye, paapo ʉgwe ʉlɨ gwa kwanda, ʉne ndɨ gwa kɨbɨlɨ ndɨ aba sibabagiile ʉkʉʉla nkɨkolo kyɨtʉ.” Po leelo ʉmundʉ jʉla alɨnkwitɨka, alɨnkʉtɨ, “Eena, ngʉʉla ʉne.”5 Po paapo Boasi alɨnkongelapo ʉkʉjoba, ʉkʉmmbʉʉla ʉgwa kɨlɨngo, alɨnkʉtɨ, “Ɨliisikʉ ɨlɨ kʉʉlɨlaga ʉngʉnda gʉla nkɨboko kya Naʉmi, po kwendaga nʉ kʉmmwega joope Lʉtɨ ʉMmoabu, ʉjʉ aalɨ nkasi gwa Maloni ʉjʉ afwile. Ajege nkasigo, ʉpaapege nagwe abaana, ʉkʉtɨ ɨngamu jaa ndʉme ʉjʉ aafwile jɨkole akaaja kaake.”
6 Po ʉmundʉ jʉla ʉgwa kɨlɨngo alɨnkwamula alɨnkʉtɨ, “Lɨnga bo silɨ bʉnoobʉno, ʉne ndekile, ngabagɨla ʉkʉʉla paapo nangwisa koonanga ɨkɨlɨngo kya baanangʉ abaa kwisa kwingɨlapo pamyangʉ. Po leelo ngʉjoba ngʉtɨ, ʉngʉnda ʉgo gwegege ʉgwe, paapo ʉne ngabagɨla.”
7 ABanyaisilaɨli abaa ijolo, baalɨ nalo ʉlwiho ʉlwa kʉtɨ panongwa ɨjaa kwegela nʉ kʉʉlɨkɨsania fimo, pakwitɨkana ʉkʉpinya ɨnongwa syabo, po jʉmo amfuulɨlaga ɨkɨlato kyake ʉnnine, nʉ kwenda nʉ kʉmpa. 8 Ʉnkamu jʉla ʉgwa kɨlɨngo alɨnkʉjoba kwa Boasi, alɨnkʉtɨ, “Gwɨtʉ, agwijʉʉlɨlege jʉjʉʉgwe ʉngʉnda gʉla.” Po ʉmundʉ jʉla alɨnkʉmfuulɨla ɨkɨlato kyake. 9 Boasi alɨnkʉjoba kʉ bandʉ abanyago bala na bandʉ boosa, alɨnkʉtɨ, “Ʉmwisyʉgʉ lɨɨlɨno ʉmwe mulɨ bakeeti, ʉkʉtɨ ʉne nʉʉlile fyosa ɨfi fyalɨ fya Elimeleki, kangɨ na fyosa ɨfi fyalɨ fya Maloni na Kilyoni, mmaboko gaa Naʉmi. 10 Kangɨ na jʉ Lʉtɨ ʉMmoabu, ʉnkasi gwa Maloni, joope ngʉmmwega ʉkʉtɨ ajege nkasi gwangʉ. Ngʉpaapaga nagwe abaana ʉkʉtɨ ɨngamu jaa Maloni, ʉndʉme gwa Lʉtɨ ʉjʉ afwile, jɨkole akaaja kaake nʉ kʉjamo mbakamu baake. Ʉmwe mulɨ bakeeti lɨɨlɨno.”
11 Po abanyago na bandʉ boosa abaa lʉkomaano ʉlʉ balɨnkʉtɨ, “Eena, ʉswe tʉlɨ bakeeti. ɄNTWA jo ampelege ʉnkiikʉlʉ ʉjʉ ikwingɨlaga mu nyumba jaako, ʉkʉja bo Laheli kangɨ ajege bo Leeja, paapo aba bo bakiikʉlʉ babɨlɨ aba bakyolwisye ɨkɨkolo kya Isilaɨli. Sinogege itolo kʉmyako mwa Efulati, kangɨ ʉjege mundʉ mwɨmɨkigwa itolo mu Betelehemu. 12 Abaana aba ɄNTWA ikʉkʉpaga mbwegi bwako ʉgwe nʉ nkiikʉlʉ ʉjʉ, bajege bo abaana baa Pelesi ʉjʉ aapaapiigwe na Juuta mu nkasi Tamali.”
Boasi nʉ lʉjungu lwake
13 Po paapo Boasi alɨnkwenda nʉ kʉmmwega Lʉtɨ, alɨnkʉja nkasi gwake. Alɨnkʉmmanya, po leelo ɄNTWA alɨnkʉnsaja Lʉtɨ, po alɨnkʉja nɨ kɨfuba. Bo kafikile akabalɨlo, alɨnkʉmpaapa ʉmwana ʉnnyambala. 14 Abakiikʉlʉ abaa mu Betelehemu balɨnkʉjoba kwa Naʉmi, balɨnkʉtɨ, “Atuufigwege ɄNTWA, ʉjʉ akʉpaakiisye mbʉfwɨle bwako, akʉpeele ʉmwisʉkʉlʉgo ʉgwa kʉkʉkeetelela nkɨkolo kya ndʉmego. Ɨngamu jaake ʉmwana ʉjʉ aajɨjege ngʉlʉmba moosa mu Isilaɨli. 15 Ʉnkamwanago akʉganile fiijo, akʉbagiile ʉkʉkɨnda nʉ kʉja na baana bahaano na babɨlɨ. Akʉpaapiile ʉmwana, jo ikwisa kʉkʉsekeesyaga mbʉʉmi bwako. Ikwisa kʉkʉkeetelelaga mbʉkangale bwako.” 16 Po Naʉmi alɨnkʉja mundʉ gwa lʉgano kʉ mwana nʉ kʉja nswɨli gwake.
17 Abakiikʉlʉ abapalamani balɨnkʉtɨ, “Naʉmi akabile ʉmwana.” Balɨnkʉmpapo ɨngamu ɨjaa Obeti, ʉjʉ jo gwise gwa Jese, ʉgwise gwa Ndaabɨti.
18 Ɨkɨ kyo kɨkolo ɨkya Pelesi:
Pelesi alɨnkʉmpaapa Esoloni,
19 Esoloni alɨnkʉmpaapa Lamu,
Lamu alɨnkʉmpaapa Aminatabu,
20 Aminatabu alɨnkʉmpaapa Nasyoni,
Nasyoni alɨnkʉmpaapa Salimoni,
21 Salimoni alɨnkʉmpaapa Boasi,
Boasi alɨnkʉmpaapa Obeti,
22 Obeti alɨnkʉmpaapa Jese,
Jese jo ʉjʉ aalɨmpaapile Ndaabɨti.