Ʉlwipuuto ʉlwa kʉsʉʉma ʉbʉpoki
Kʉ mpaali gwa lwɨmbo. Ʉkʉkongana nʉ lwɨmbo ʉlʉ bikʉtɨ, Ɨliijɨbɨjɨbɨ ɨlya lwitɨkano. Ʉlwɨmbo ʉlwa Ndaabɨti, Mikitami, ʉlwa kʉmanyisya. Aalyɨmbile bo ikʉlwa na bandʉ abaa mu Mesopotamija na bandʉ baa mu Alamusoba. Akabalɨlo aka Joabu aagomwike nʉ kʉbagoga aBaetomu 12,000, nDʉsooko ʉlwa Muunyu.a
60
Gwe Kyala, ʉtʉtaagile nʉ kʉtʉkanyania,ʉkaleele, tʉpelile ʉtʉgomokesye amaka.
2 Ʉkɨpelile ɨkiisʉ ʉkʉsenyendeka, ʉkɨbalwile.
Po ʉlʉ ʉkɨtendekesye, namanga kikʉjʉngaanika.
3 Ʉbatwɨkile abandʉ baako ʉlʉfundo,
tukʉpʉpʉʉtɨka ngatɨ tʉgaalile ʉbwalwa.
4 Ʉbape ɨkɨmanyilo aba bikʉkʉtiila ʉgwe,
ʉkʉtɨ ɨmitipʉlo gya balʉgʉ gɨlɨngabalasaga. Sela
5 Ʉtʉtʉʉle nʉ kʉtwitɨkɨla,
ʉkʉtɨ abakʉndwe baako bapokigwege.
6 Kyala ajobile ʉkʉfuma pabwikemo bwake atile,
“Ngʉtola nʉ kʉbajabania ɨkiisʉ kya mu Syekemu,
ngʉbapɨmɨla ʉlʉsooko ʉlwa mu Sukoti.
7 Ɨkiisʉ kya Giliati kyangʉ, kyope ɨkya Manase kyangʉ,
ɨkya Efulaimu kɨlɨ bo ʉlwa kɨtili kyangʉ ɨkya kyela,
nɨ kya Juuta ngili jangʉ ɨjaa bʉtwa.
8 Ɨkiisʉ kya Moabu lyo ibeeseni lyangʉ ɨlya kʉsugusulɨlamo,
ɨkɨlato kyangʉ ngʉkɨsopela ɨkiisʉ ɨkya Etomu,
Filisiti ngʉnnjwegelelaga ʉnjwego gwa bʉtoli.” b
9 Jwani aikʉndwala nkaaja aka kalɨ ni ilinga?
Aikʉʉndongosya jwani mpaka nkaaja ako akaa mu Etomu?
10 Gwe Kyala, bʉle, ʉtʉlekile loosa?
Bʉle, ʉtikʉbʉʉka na basikali bɨɨtʉ?
11 Ʉtʉpepo ʉbʉtʉʉli kʉ balʉgʉ bɨɨtʉ,
ʉbʉtʉʉli bwa mundʉ bʉtikʉbomba nafimo.
12 Kyala lɨnga alɨ kʉkɨbafu kyɨtʉ, aatukʉtola,
ʉmwene aikʉbakanyania abalʉgʉ bɨɨtʉ.