Ʉlwipuuto lwa kʉsʉʉma ʉbʉponelo
Kʉ mpaali gwa lwɨmbo. Ʉkʉkongana nʉ lwɨmbo ʉlʉ bikʉtɨ, Ʉlɨngoonanga. Ʉlwɨmbo ʉlwa Ndaabɨti, Mikitami, ʉlʉ aalyɨmbile bo Saʉli abatʉmile abandʉ kʉkaaja kaake kʉkʉnngoga.a
59
Gwe Kyala, ʉmboke kʉ balʉgʉ bangʉ,ʉʉndɨndɨlɨle kʉlɨ aba bikʉlwa na niine.
2 Ʉmbonesye kʉ babomba mbiibi,
ʉmboke kʉ bandʉ abagogi.
3 Keeta biibɨɨliile, bikʉʉsigɨla ʉkʉtɨ baangoge,
abaa maka bikʉʉsyʉngʉʉtɨla ʉkʉlwa na niine.
Gwe NTWA, ngaja na nongwa najɨmo,
kangɨ ngabomba ɨmbiibi najɨmo.
4 Ngaja na nongwa najɨmo,
poope biitendekiisye ʉkʉlwa na niine,
gwinʉke, ʉngeete nʉ kʉndʉʉla.
5 Gwe NTWA, Kyala gwa filʉndɨlo,
Kyala gwa Isilaɨli, gwinʉke!
Ʉfifunde ɨfikolo fyosa,
ʉlɨngampaakɨsya najʉmo ʉjʉ akʉsambʉkiile. Sela
6 Abalʉgʉ bangʉ bikʉgomokelako kʉkʉtɨ majolo,
bikʉkema ngatɨ mbwa nʉ kwembeela nkaaja.
7 Keeta, bikʉteeka amaheelu nkanwa kaabo,
ɨmilomo gyabo lʉʉbo ʉlʉʉgi,
kangɨ bikʉtɨ, “Jwani ikʉpɨlɨka?”
8 Looli ʉgwe gwe NTWA kʉbaseka,
kʉfyangalɨla ɨfikolo fyosa ɨfyo.
9 Gwe maka gangʉ, ngʉkʉsʉʉbɨla ʉgwe,
gwe Kyala gwangʉ, gwe ilinga lyangʉ.
10 Kyala gwangʉ aikʉʉnyiisɨla ni ipyana lyake,
aikʉmbela ʉkʉbabona abalʉgʉ bangʉ bo batoliigwe.
11 Ʉlɨngabagoga, abandʉ bangʉ bangiisa kwibwa,
ʉbatetemesye na maka gaako, ʉbagwɨsye paasi,
gwe Ntwa, gwe ngʉlʉ jɨɨtʉ.
12 Bikʉtʉla ɨnongwa ndɨ syosa ɨsi bikʉjoba,
po leelo bakoligwe mmatingo gaabo,
kʉnongwa jaa kʉguna nʉ bʉsyobi bwabo.
13 Ʉbapyute kʉ bʉkalale bwako,
bamalɨkege loosa,
abandʉ boosa bamanye ʉkʉtɨ,
Kyala jo ndagɨli gwa baa ndʉjungu lwa Jaakobo nɨ fiisʉ fyosa. Sela
14 Abalʉgʉ bangʉ bikʉgomokelako kʉkʉtɨ majolo,
bikʉkema ngatɨ mbwa nʉ kwembeela nkaaja.
15 Bikwembeela ʉkʉlonda ɨfindʉ,
lɨnga bakiikʉta bikwibuneesya bʉkye.
16 Ʉne ngwɨmbaga ɨnduufyo ɨsya maka gaako,
nʉlʉbʉnjʉ ngʉsekelaga mwi ipyana lyako.
Namanga ʉgwe ʉlɨ ilinga lyangʉ,
gwe bʉbopelo bwangʉ mbʉtolwe bwangʉ.
17 Gwe maka gangʉ, ngʉkwɨmbɨlaga ɨnduufyo,
gwe Kyala, ʉgwe ʉlɨ ilinga lyangʉ,
gwe ʉʉnganile fiijo ʉne.