Ʉlʉfundo kʉ balongosi abasita bʉgolofu
Kʉ mpaali gwa lwɨmbo. Ʉkʉkongana nʉ lwɨmbo ʉlʉ bikʉtɨ, Ʉlɨngoonanga. Ʉlwɨmbo ʉlwa Ndaabɨti, Mikitami.
58
Bʉle, mwe balagɨli bakʉlʉmba fiijo,mukʉjoba ɨsya nalooli?
Bʉle, mukʉbalonga abandʉ boosa kʉ bʉgolofu?
2 Hɨmma! Mukwinogona kwene ʉkʉbomba ɨmbiibi,
mukʉtwala ʉbwite pakiisʉ.
3 Abatʉlanongwa bikwanda bo balɨ munda,
ʉkʉfuma munda mbannabo basobile,
bikʉjoba ɨsya bʉtʉngʉlʉ.
4 Amasyʉ gaabo gaa bʉgogi bo ʉlwa kʉlʉmigwa nɨ njoka,
bo ʉlwa swila ɨjɨ jɨkabagɨla ʉkʉpɨlɨka,
5 ɨjɨ jɨtikʉpɨlɨka ni isyʉ lya balosi,
pamo ʉlwɨmbo lwa ndosi ʉmmangʼanyi.
6 Gwe Kyala, ʉbakoomole amiino gaabo, ʉbakʉʉle.
Gwe NTWA, ʉnyukule amiino gaa ngalamu ɨsyo.
7 Bamalɨkege loosa bo ʉlwa mɨɨsi aga gikʉbopa,
nalɨnga bikʉlʉʉlɨka ɨmitipʉlo gyabo, batoligwege.
8 Bamalɨkege bo ʉlwa itone ɨlɨ likwengʉka,
bajege bo ʉlwa mwana ʉjʉ apaapiigwe mfwe,
ʉjʉ akalɨbonamo sikʉ iisʉba.
9 Ɨndeko syɨnu bo sikapya mmooto gwa miifwa,
abatʉlanongwa aabikʉpyagɨligwa kʉbʉtali,
abatubwa na bakangale boosa pamopeene.
10 Abagolofu aabikʉhobokaga,
bo bikʉbabona ababiibi bikʉfundigwa.
Aabikʉsugusulaga amalʉndɨ gaabo,
mwi ilopa lya batʉlanongwa.
11 Abandʉ boosa aabikʉjobaga ʉkʉtɨ,
“Nalooli filiko ɨfihombigwa kʉ bagolofu,
nalooli aliko Kyala ʉjʉ ikʉkɨlonga ɨkiisʉ.”