Ɨkɨjabo ɨkya bʉhaano
(Ɨsabʉli 107–150)
Ʉkʉgwa ʉlʉpi kʉ booloolo bwa Kyala
107
Munngwɨlege ʉlʉpi ɄNTWA paapo mooloolo,namanga iipyana lyake lya bwila na bwila.
2 Mujobege bo ʉlʉ mwe mupokiigwe nʉ NTWA,
mwe aabaabwile ʉkʉfuma nkɨboko ɨkya balʉgʉ.
3 Aababʉngeenie ʉkʉfuma mfiisʉ fyosa,
ʉkʉfuma kʉbʉsookelo na kʉbʉjongelo,
kʉlʉʉlʉ na kwitongo.
4 Bamo baabeetaga ndʉngalangala kɨsita kʉjaaga ɨnjɨla,
ɨjaa kʉbʉʉka nkaaja akaa kʉjengamo.
5 Baakoliigwe nɨ njala nɨ kyʉmɨlwa,
balɨnkoonyoka amaka loosa.
6 Po balɨnkʉnndɨlɨla ɄNTWA mbʉtolwe bwabo,
alɨnkʉbapoka mu ngʉbɨlo syabo.
7 Alɨnkʉbalongosya mu njɨla ɨnunu,
ʉkwakʉfika nkaaja akaa kwakʉtʉʉgalamo.
8 Banngwɨlege ʉlʉpi ɄNTWA kwi ipyana lyake,
nɨ sya kʉswigɨsya ɨsi ababombiile abandʉ.
9 Ikʉbatalalɨsya aba bʉʉmiilwe,
abaa njala ikʉbiikʉtɨsya ɨfinunu.
10 Bamo baatʉʉgeele mu ngiisi na mbʉsulumanie ʉbʉkʉlʉmba,
baalɨ bapinyigwa mu ngʉbɨlo na mminyololo,
11 paapo baasambwike kʉlɨ ɨsi aabalagiile Kyala,
nʉ kʉsikaana ɨsi aajobile Kyala ʉNkʉlʉmba.
12 Alɨnkʉbabombesya ɨmbombo ɨngafu,
balɨnkʉgwa paasi, akaalipo ʉgwa kʉbatʉʉla.
13 Po balɨnkʉnndɨlɨla ɄNTWA mbʉtolwe bwabo,
alɨnkʉbapoka mu ngʉbɨlo syabo.
14 Alɨnkʉbasoosyamo mu ngiisi na mbʉsulumanie ʉbʉkʉlʉmba,
alɨnkʉgɨlatʉla ɨminyololo gyabo.
15 Banngwɨlege ʉlʉpi ɄNTWA kwi ipyana lyake,
nɨ sya kʉswigɨsya ɨsi ababombiile abandʉ.
16 Ʉmwene ikʉkonyolania nʉ kwigʉla ɨfipata fya kɨbʉngʉ,
nʉ kʉtumulania ɨfiigalɨlo fya kyela.
17 Bamo baalɨ bakonyofu kʉnongwa jaa bʉtʉlanongwa bwabo,
baataamigwaga kʉnongwa jaa mbiibi syabo.
18 Balɨnkʉfikalalɨla ɨfindʉ fyosa,
balɨnkʉja kɨfuki ʉkʉfwa.
19 Po balɨnkʉnndɨlɨla ɄNTWA mbʉtolwe bwabo,
alɨnkʉbapoka mu ngʉbɨlo syabo.
20 Alɨnkʉlɨtʉma iisyʉ lyake, lɨlɨnkʉbabʉmbʉlʉsya,
alɨnkʉbapoka ndʉpyuto.
21 Banngwɨlege ʉlʉpi ɄNTWA kwi ipyana lyake,
nɨ sya kʉswigɨsya ɨsi ababombiile abandʉ.
22 Bansookesyege amakemo agaa kʉgwɨla ʉlʉpi,
bɨmbege ɨmbombo syake nʉ lʉsekelo.
23 Bamo balɨnkwenda ɨnjɨla mu nyanja nɨ sitima,
balɨnkʉbomba ɨmbombo syabo mmɨɨsi amingi.
24 Balɨnkʉsibona ɨmbombo sya NTWA,
ɨmbombo ɨsya kʉswigɨsya ɨsi aabombile ʉko.
25 Namanga aalagiile ʉkʉkula ʉmbelo gwa maka,
gʉlɨnkwinʉla amajɨga gaa nyanja.
26 Ɨsitima silɨnkwinʉligwa kʉmwanya,
kangɨ silɨnkʉsuluka paasi mbʉsolofu bwa mɨɨsi,
ɨndumbula syabo silɨnkʉtengʉka kʉ lʉtende.
27 Balɨnkʉpʉpʉlʉkɨla kʉno na kʉno,
bo ʉlwa bandʉ aba bagaalile,
syasobile ɨsya kʉbomba.
28 Po balɨnkʉnndɨlɨla ɄNTWA mbʉtolwe bwabo,
alɨnkʉbapoka mu ngʉbɨlo syabo.
29 Alɨnkʉgʉbotesya ʉmbelo ʉnkalɨ,
amajɨga gaa mu nyanja galɨnkʉbatama.
30 Balɨnkʉhoboka bo ɨnyanja jɨlɨ jonjolo,
alɨnkʉbatwala kʉno baalondaga ʉkʉbʉʉka.
31 Banngwɨlege ʉlʉpi ɄNTWA kwi ipyana lyake,
nɨ sya kʉswigɨsya ɨsi ababombiile abandʉ.
32 Bammwɨmɨkege apa abandʉ babʉngeene,
nʉ kʉntuufya ndʉkomaano lwa bakʉlʉmba.
33 Ikʉsisanusya ɨnyɨɨsi ʉkʉja lʉngalangala,
nɨ nyiibʉko sya mɨɨsi ʉkʉja kiisʉ ɨkyʉmu.
34 Ikʉkɨsanusya ɨkiisʉ ɨkya mboto ʉkʉja kya kɨlambo,
kʉnongwa jaa bʉbiibi bwa bandʉ aba bikʉtʉʉgalaga ʉmo.
35 Ikwandʉla ʉlʉngalangala ʉkʉja matubwi,
ɨkiisʉ ɨkyʉmu ʉkʉja nyiibʉko sya mɨɨsi.
36 Ikʉbatʉʉgasya ʉko abaa njala,
bikʉjenga akaaja akaa kwitʉʉgalamo.
37 Bikʉbyala ɨseke mmigʉnda,
bikʉtondola ʉntondolo mwingi.
38 Ikʉbasaja abandʉ baake, bikongelela,
nʉ ntiimo gwabo gʉtikʉnaganika.
39 Lɨnga bikʉnaganika nʉ kʉfujuligwa,
kʉnongwa jaa kʉboneligwa, ʉbʉtolwe nʉ bʉsulumanie,
40 ikʉbafujula abakʉlʉmba baabo,
nʉ kʉbembeesya ndʉngalangala mbʉsita njɨla,
41 looli abatolwe ikʉbafyʉla mu ngʉbɨlo,
nʉ koolosya ʉlʉjungu lwabo bo ʉlwa ntiimo gwa ngʼoosi.
42 Abagolofu bikʉsekela bo bikʉsibona ɨsi,
looli ababiibi boosa bikʉfumbata kʉ kanwa.
43 Abaa mahala baje maaso na ɨsi,
baliinogonege iipyana lya NTWA.