Ʉbooloolo bwa Kyala kʉ bandʉ baake
106
Amuntuufyege ɄNTWA.Munngwɨlege ʉlʉpi ɄNTWA, namanga mooloolo,
iipyana lyake lya bwila na bwila.
2 Jwani abagiile ʉkʉsijoba ɨmbombo ɨngʉlʉmba ɨsya NTWA?
Pamo ʉkʉsifumusya kanunu ɨnduufyo syake?
3 Basajiigwe aba bikʉkonga ɨsya bʉgolofu,
aba bikʉbomba ɨnunu akabalɨlo koosa.
4 Gwe NTWA, ʉngʉmbʉke ʉne,
bo kʉbanangɨsya ʉbooloolo abandʉ baako,
ʉndʉʉle niine bo kʉbapoka,
5 ʉkʉtɨ mbʉbone ʉbʉnoge bwa basʉngʉligwa baako,
nsekelege ʉlʉsekelo lwa kɨkolo kyako,
nʉ kʉkʉtuufya pamopeene na bandʉ baako.
6 Tʉtʉlile ɨnongwa ʉswe na biisʉkʉlʉ bɨɨtʉ,
tʉbombile ɨmbiibi, tʉbombile ɨnyali.
7 Abiisʉkʉlʉ bɨɨtʉ bo balɨ mu Misili,
bakaasiinogonaga ɨmbombo syako ɨsisya.
Bakaakʉmbʉkaga ʉbwingi bwa ipyana lyake,
looli balɨnkʉsambʉka pa Nyanja ɨNgeseefu.
8 Looli poope aabapokile kʉnongwa jaa ngamu jaake,
ʉkʉtɨ aganangɨsye amaka gaake amakʉlʉmba.
9 Alɨnkʉjɨkemela ɨNyanja ɨNgeseefu, jɨlɨnkʉʉma,
alɨnkʉbalongosya mbʉsolofu bwa nyanja pa bʉʉmu itolo.
10 Alɨnkʉbaabʉla nkɨboko kya balʉgʉ baabo,
alɨnkʉbapoka nkɨboko kya aba baabafwɨmaga.
11 Amɨɨsi galɨnkʉbiibɨsya abalʉgʉ baabo,
akaaponilepo ʉmundʉ najʉmo.
12 Po balɨnkʉgiitɨka amasyʉ gaake,
balɨnkwɨmba ɨnyɨmbo ɨsya kʉntuufya.a
13 Leelo nakalɨnga balɨnkwibwa ɨsi aababombiile,
balɨnkʉbomba kɨsita kʉguulɨla ʉkʉtɨ abalɨngaanie.
14 Balɨnkʉnyonywa fiijo ɨfindʉ ndʉngalangala,
balɨnkʉnngela Kyala ndʉkʉbo.
15 Alɨnkʉbapa ɨfi baalondaga,
looli alɨnkʉtʉma ɨmbʉngo ɨngalɨ pakatɨ pamyabo.b
16 Mmasaasa abandʉ balɨnkʉja nʉ bʉʉfi kwa Moose,
na Aaloni ʉmwikemo gwa NTWA.
17 Kɨlɨnkʉbalʉka ɨkiisʉ, kɨlɨnkʉmmila Ndatani,
nʉ kʉnsyɨla Abilamu nɨ kɨlʉndɨlo kyake kyosa.
18 Ʉmooto gʉlɨnkwaka pa lʉkomaano lwabo,
ɨndapɨ silɨnkʉbookya abaniongafu.c
19 Baatendekiisye ɨngwata kʉ Holebu,
balɨnkwipuuta kʉ kɨfwani kya kyela.
20 Baalyandwile ʉbʉsisya bwa Kyala,
balɨnkwipuuta kʉ kɨfwani kya ngʼombe ɨjɨ jikʉlya ɨliisʉ.
21 Balɨnkʉmmwibwa Kyala ʉjʉ aabapokile,
ʉjʉ aabombile ɨngʉlʉmba mu Misili,
22 ɨmbombo ɨsisya kʉ baana baa Hamu,
ɨsya kʉtiilɨsya pa Nyanja ɨNgeseefu.
23 Po alɨnkʉjoba ʉkʉtɨ ikʉbapyuta,
looli Moose ʉnsʉngʉligwa alɨnkwɨma pakatɨ,
ʉkʉsigɨla ɨngalalɨsi jaa Kyala ʉkʉtɨ alɨngabapyuta.d
24 Po balɨnkʉkɨkaana ɨkiisʉ kɨla ɨkɨnunu,
bakaaliitiike ɨsya lʉfingo lwake.
25 Biibuneesyaga mmasaasa gaabo,
balɨnkʉkaana ʉkʉmpɨlɨkɨsya ɄNTWA.
26 Po Kyala alɨnkʉlapa,
ʉkʉtɨ ikʉbagoga ndʉngalangala,
27 aikʉbalania ʉlʉjungu lwabo mfiisʉ ɨfingi,
nʉ kʉbanyambania pakiisʉ poosa.e
28 Po balɨnkʉmmwipuuta Baalɨ ʉgwa pa Peoli,
balɨnkʉlya amakemo amookye aga gasoosiigwe kʉ basyʉka.
29 Balɨnkʉnkalalɨsya ɄNTWA kʉ mbombo syabo,
ɨmbʉngo jaa kɨlalilali jɨlɨnkʉtupuka pakatɨ pamyabo.
30 Looli Finehasi alɨnkʉsumuka,
alɨnkʉbagoga aba babombile ɨmbiibi,
ɨmbʉngo ɨjaa kɨlalilali jɨlɨnkwenda nʉ kʉmalɨka.
31 Abandʉ bikʉkʉmbʉka ɨsya bʉgolofu ɨsi aabombile Finehasi,
akabalɨlo koosa bikʉsikʉmbʉkaga.f
32 Baalɨnkalaliisye ɄNTWA pa nyiibʉko ɨjaa mu Meliba,
Moose alɨnkʉtaamigwa kʉnongwa jaabo.
33 Namanga balɨnkʉnsambʉkɨla,
alɨnkʉjoba amasyʉ amasita kʉbagɨla.g
34 Bakaabapyutile abaa fikolo ɨfya bapanja,
ɨfi ɄNTWA aalagiile ʉkʉfipyuuta.
35 Balɨnkwijongaania na bapanja,
balɨnkʉmanyila ɨmbombo syabo ɨsya mwalo.
36 Balɨnkwipuuta kwa gyabaakyala,
lʉlɨnkʉja lʉtambo lwa kʉbapyuta.h
37 Balɨnkʉbagoga abaanaabo abalʉmyana na balɨndwana,
ʉkʉja ikemo lya mbepo ɨnyali.
38 Balɨnkoona iilopa iisita nongwa najɨmo,
iilopa lya baanaabo abalʉmyana na balɨndwana.i
Baabaningile ʉkʉja ikemo lya gyabaakyala ɨgya mu Kaanaani,
ɨkiisʉ kɨlɨnkʉnyasigwa kwi ilopa ɨlyo.
39 Balɨnkwinyasya kʉlɨ ɨsi baabombile,
ɨmbombo syabo silɨnkʉfwana nɨ sya bandʉ abalogwe.
40 Ɨngalalɨsi sya NTWA silɨnkwaka kʉ bandʉ baake,
po alɨnkʉbasila abasʉngʉligwa baake.
41 Alɨnkʉbabɨɨka mmaboko gaa bandʉ abapanja,
aba baababengile balɨnkʉja balagɨli baabo.
42 Abalʉgʉ baabo balɨnkʉbabonela,
balɨnkʉbɨɨkigwa paasi pa bʉlagɨli bwabo.
43 Kaa kingi ɄNTWA aabapokaga abandʉ baake,
looli abeene balɨnkʉsala ʉkʉnsambʉkɨla,
balɨnkwitumbukɨsya mu mbiibi syabo.
44 Looli aakʉbonaga ʉkʉtaamigwa kwabo,
bo apɨliike ɨnguuto jaabo.
45 Kʉnongwa jaabo aakʉmbwike ʉlwitɨkano lwake,
alɨnkʉbapaakɨsya kʉ bwingi bwa ipyana lyake.
46 Alɨnkʉbapela ʉkʉpaakɨsigwa,
bo bakoliigwe mbwite.j
47 Gwe NTWA Kyala gwɨtʉ, ʉtʉpoke,
ʉtʉbʉngaanie ʉkʉfuma kʉ bapanja,
ʉkʉtɨ tʉjɨgwɨlege ʉlʉpi ɨngamu jaako ɨnyiikemo,
nʉ kʉsekela mu mbaalo syako.
48 Atuufigwege ɄNTWA Kyala gwa Isilaɨli,
apeeligwege ɨnduufyo bwila na bwila.
Abandʉ boosa bajobe ʉkʉtɨ, “Ameni!”
Muntuufyege ɄNTWA!