Ʉbwanalooli bwa Kyala kʉ Banyaisilaɨli
(1 Ɨsya Ntʉbalɨlo 16:8-22)
105
Munngwɨlege ʉlʉpi ɄNTWA,mufumusyege ʉbʉkʉlʉmba bwake,
mubabʉʉlege abandʉ ɨsi abombile.
2 Mummwɨmbɨlege ɨmbaalo,
mufumusyege ɨmbombo syake ɨsisya.
3 Musekelege mu ngamu jaake ɨnyiikemo,
sihobokege ɨndumbula sya aba bikʉnndonda ɄNTWA.
4 Munndondege ɄNTWA na maka gaake,
munndondege bwila.
5 Mukʉmbʉkege ɨmbombo syake ɨsisya,
ɨfiika nʉ bʉlongi bwake ʉbʉ aajobile,
6 mwe baa ndʉjungu lwa Abulahamu ʉmbombeli gwake,
mwe baana baa Jaakobo, mwe basʉngʉligwa baake.
7 Ʉmwene jo NTWA, Kyala gwɨtʉ,
ʉbʉlongi bwake bʉlipo pakiisʉ poosa.
8 Ikʉlʉkʉmbʉka ʉlwitɨkano lwake bwila,
ʉlʉfingo ʉlʉ aalagiile kʉ sopelo elʉfu,
9 ʉlwitɨkano ʉlʉ aaliitɨkeene na Abulahamu,a
nʉ lʉfingo lwake kwa Isaka.b
10 Ʉlo aalʉsisimɨkiisye kwa Jaakobo ʉkʉja lʉlagɨlo,
kwa Isilaɨli ʉkʉja lwitɨkano lwa bwila na bwila.c
11 Aatile, “Ngʉbapapo ɨkiisʉ kya mu Kaanaani,
ʉkʉja kɨlɨngo kyɨnu.”
12 Akabalɨlo ako baalɨ banandɨ itolo,
baalɨ banandɨ kangɨ baheesya mu Kaanaani,
13 balɨnkʉbeeta beeta nkiisʉ ɨkɨ na ɨkɨ,
ʉkʉfuma mbʉnyafyale bʉmo mpaka ʉbʉngɨ.
14 Looli akaalɨmmwitɨkiisye najʉmo ʉgwa kʉbabonela,
aabakemelaga abanyafyale kʉnongwa jaabo,
15 alɨnkʉtɨ, “Mulɨngabakolangapo abasʉngʉligwa bangʉ,
somma ʉkʉbafulasya abakunguluka bangʉ.”
16 Alɨnkʉpela ɨnjala nkiisʉ kya mu Kaanaani,
alɨnkoonanga ɨfindʉ fyabo fyosa.
17 Aalɨntʉmile ʉmundʉ ʉkʉbatalɨlapo,
Joosefu ʉjʉ aalyʉlɨsiigwe alɨnkʉja ntʉmwa.
18 Baalɨmpinyile nɨ mbɨngo mmalʉndɨ,
aapinyiigwe nɨ kyela mmakosi,
19 ʉkʉfika apa syabonekiile ɨsi aajobile,
iisyʉ lya NTWA lɨlɨnkʉnsisimɨkɨsya.
20 Ʉmalafyale gwa Misili alɨnkʉlagɨla ʉkʉtɨ Joosefu aabʉligwe,
ʉndagɨli gwa fikolo alɨnkʉnndekesya,
21 alɨnkʉmmbɨɨka ʉkʉja ndagɨli gwa nkɨtangaalala kyake,
alɨnkwɨmɨlɨla ɨkyʉma kyake kyosa,
22 ʉkʉtɨ Joosefu abalongosyege ababombeli baa malafyale,
nʉ kʉbamanyisya ɨsya mahala abalongosi.d
23 Po Isilaɨli alɨnkwingɨla nkiisʉ kya Misili,
Jaakobo alɨnkʉja nheesya gwa baana baa Hamu.
24 ɄNTWA alɨnkʉbapela ʉkooloka fiijo,
balɨnkʉja na maka ʉkʉkɨnda abalʉgʉ baabo.
25 Alɨnkʉbapela aBamisili ʉkʉbabenga abandʉ baake,
balɨnkʉbabombela ɨsya bʉkomu ababombeli baake.
26 Po alɨnkʉntʉma Moose ʉmbombeli gwake,
pamopeene na Aaloni ʉjʉ aalɨnsalile.
27 Balɨnkʉbomba ɨfiika fya Kyala pakatɨ pamyabo,
nɨ fiswigo kʉ baana baa Hamu.
28 Aatʉmile ɨngiisi, ɨkiisʉ kɨlɨnkʉja ngiisi,
poope aBamisili baakaanile ɨsi aalagiile.
29 Alɨnkʉsanusya amɨɨsi gaabo ʉkʉja ilopa,
ɨɨswɨ syosa silɨnkʉfwa.
30 Ɨkiisʉ kyabo kɨlɨnkwisʉla ɨfyʉla,
na nnyumba jaa malafyale filɨnkʉjamo.
31 Alɨnkʉlagɨla, filɨnkwisa ɨfilʉndɨlo fya mbwele,
ɨkiisʉ kyabo kyosa kyaliiswile amasaasi.
32 Alɨnkʉbatʉmɨla ɨfula ɨjaa mabwe,
ɨnjasi jɨlɨnkʉmulɨka ɨkiisʉ kyabo kyosa.
33 Alɨnkoonanga ɨmipiki gyabo ɨgya maafiilʉ nɨ mikʉjʉ,
alɨnkʉgɨbalʉla ɨmipiki ɨgya nkiisʉ kyabo.
34 Bo ajobile, galɨnkwisa amapalaalɨla,
nɨ mbaasi ɨnyingi ɨsi sitikʉbaligwa.
35 Silɨnkʉlya fyosa ɨfi fyamelile nkiisʉ,
silɨnkʉmala fyosa ɨfi fyamelile mu mfu.
36 Aagogile abaa fipanda boosa nkiisʉ kyabo,
boosa aba baaliimanyikiisyemo ʉkʉpaapa.e
37 Alɨnkʉbasoosya aBanyaisilaɨli nkiisʉ ɨkyo,
bo balɨ nɨ feesa nɨ sahabʉ,
akaalipo najʉmo ʉmoonywa pamo ʉmfulale.
38 ABamisili balɨnkʉsekela ʉkʉsookamo aBanyaisilaɨli,
namanga ʉlʉtende lwabakolile, baatiilaga.
39 Alɨnkʉbaalʉla iibɨngo ɨlya kʉbakinga,
nʉ mooto ʉkʉbamulɨkɨla pakɨlo.
40 Balɨnkʉnsʉʉma ʉmwene, alɨnkʉbatwalɨla ɨngwale,
alɨnkʉbapa ɨfisyesye ɨfya kʉfuma kʉmwanya.
41 Alɨnkʉbalʉla ʉlwalabwe, amɨɨsi galɨnkʉsooka,
galɨnkwenda ndʉngalangala bo ʉlwa lwɨsi.f
42 Namanga aakʉmbwike ʉlʉfingo lwake ʉlwikemo,
na Abulahamu ʉmbombeli gwake.
43 Alɨnkʉbasoosya abandʉ baake nʉ lʉsekelo,
abasʉngʉligwa baake balɨnkwɨmba nʉ kʉmpaala.
44 Alɨnkʉbapa ɨfiisʉ fya bapanja,
balɨnkʉkaba ʉbʉkabi boosa ʉbwa bapanja.
45 Aabombile ɨsi ʉkʉtɨ abandʉ baake,
basitiilege ɨndagɨlo syake,
nʉ kʉsikonga ɨngomeelesyo syake.
Muntuufyege ɄNTWA!