Ʉkʉntuufya ʉmpeli
104
Gwe ndumbula jangʉ, ʉntuufyege ɄNTWA!Gwe NTWA Kyala gwangʉ, ʉgwe ʉlɨ nkʉlʉmba fiijo.
Gwifwɨkile ʉlwɨmɨko nʉ bʉsisya,
2 gwisyʉngʉʉsiisye ʉlʉmuli bo ʉlwa mwenda.
Gwɨmiike ʉmpaalanga bo ʉlwa heema,
3 ʉjengile ʉbʉjo bwako pamwanya pa mɨɨsi agaa mu mpaalanga.
Ʉlɨpelile iibɨngo ʉkʉja igeleeti lyako,
gwe kwitoga pa mapɨko agaa mbelo.
4 Kʉgʉpela ʉmbelo ʉkʉja bandʉmi baako,
na babombeli baako ʉkʉja ndapɨ sya mooto.
5 Ʉkɨbɨɨkile ɨkiisʉ pa lwalo lwake,
ʉkʉtɨ kɨlɨngajʉngaanikaga sikʉ.
6 Amɨɨsi gaakɨkupɨkiile ɨkiisʉ bo ʉlwa mwenda,
amɨɨsi galɨnkwɨma pamwanya pa fyamba.
7 Looli bo ʉgakemiile, gaabopile,
kwi isyʉ lyako ɨlya njasi, galɨnkʉjonga.
8 Galɨnkʉsuluka ʉkʉfuma mfyamba,
galɨnkwakʉfika mu sooko,
galɨnkʉbʉʉka pabʉjo apa gwagabɨɨkiile.
9 Gwagabɨɨkiile ʉmpaka ʉkʉtɨ amɨɨsi galɨngakɨndaga,
ʉkʉtɨ galɨngiisa kʉkiibɨsya kangɨ ɨkiisʉ.
10 Kʉtupusya ɨnyiibʉko sikʉbʉʉka mu sooko,
amɨɨsi gaake gikwenda pakatɨ pa fyamba.
11 Ɨfinyamaana fyosa fikʉnwa amɨɨsi ago,
ɨmbunda sya ndiisʉ sikwitalalɨsya ɨkyʉmɨlwa kyabo.
12 Ɨnjʉni sikʉtenga mmipiki kɨfuki nɨ nyɨɨsi,
sikwɨmba mu samba sya mipiki.
13 Ʉkʉfuma kʉbʉjo bwako kʉmwanya,
kʉfitimɨkɨsya ɨfyamba ɨfula,
ɨkiisʉ kikwikʉta ɨseke ɨsi kʉsipela.
14 Kʉmesya ɨliisʉ lya kʉlya ɨmitiimo,
na ɨfi abandʉ bikʉbyala.
Po kʉ njɨla ɨjo ʉmundʉ ikʉfyagaga ɨfindʉ fyake mu mfu,
15 nɨ finga ɨjaa kʉnsangalʉsya,
na mafuta agaa kʉnosya ʉmbɨlɨ gwake,
nɨ findʉ ɨfya kʉmpapo amaka.
16 Ɨmipiki gya NTWA gikooneleligwa amɨɨsi amingi,
ɨmipiki ɨmikafu ɨgya mu Lebanoni ɨgɨ aagɨbyele.
17 Ʉmo ɨnjʉni sikʉtenga ɨfifufumbwa fyabo,
baafulo bikʉtenga mmyale.
18 Mfyamba ɨfitali mo muno silimo ɨmbabala,
mu nyaalabwe mo mbwibɨɨlɨlo ɨngenge.
19 Gwapelile ʉmwesi ʉkʉnangɨsya ʉtʉbalɨlo,
iisʉba lɨkameenye akabalɨlo kaake akaa kʉjonga.
20 Kʉtwala ɨngiisi, kukʉja po pakɨlo,
ɨfinyamaana fyosa ɨfya ndiisʉ fikʉsooka.
21 Ɨngalamu sikʉguluma bo sikʉfwɨma,
sikʉlonda ɨfindʉ ɨfi Kyala asipeele.
22 Iisʉba bo likʉsooka, sikʉsookapo,
sikwakʉlambalala mu mbako syabo.
23 Po ʉmundʉ ikʉbʉʉka kʉ mbombo jaake,
ikʉbomba ɨmbombo jaake mpaka namajolo.
24 Gwe NTWA, ʉbombile ɨmbombo nyingi fiijo!
Syosa ʉsibombile kʉ mahala!
Ɨkiisʉ kiiswile ɨfipeligwa fyako.
25 Jɨlipo ɨnyanja, ɨnywamu kangɨ ɨnyeeleefu,
ʉmo fiiswile ɨfipeligwa ɨfi ʉkabagɨla ʉkʉfibala,
ɨfipeligwa ɨfyʉmi, ɨfinywamu nɨ finandɨ.
26 Ʉmo sikwendamo ɨsitima,
mo muno jɨlimo nɨ nyiifwɨla,
ɨjɨ ʉjɨpelile ʉkʉtɨ jɨkinege ʉmo.
27 Fyosa fikʉkʉkeeta jʉjʉʉgwe,
ʉkʉtɨ ʉfipege ɨfindʉ bo fikʉlʉmigwa nɨ njala.
28 Bo ʉfipeele, fikʉlya,
bo ʉbaalwile ɨkyanja kyako,
fikwikʉta ʉtʉndʉ ʉtʉnunu.
29 Bo ʉfisindile iikosi, fikʉtiila.
Bo kwega ʉmʉʉji gwabo, fikʉfwa,
fikʉgomokela ndʉfumbɨ muno fyafumile.
30 Bo ʉfitʉʉjiile ʉmʉʉji gwako,
fikʉja fyʉmi,
ʉgwe kʉkyandʉla ɨkiisʉ ʉkʉja kɨpya.
31 Ʉbʉsisya bwa NTWA bʉjengeko bwila na bwila,
ɄNTWA iikyelege kʉlɨ ɨfi aafipelile.
32 Ʉmwene bo ikʉkɨkeeta ɨkiisʉ, kikʉtetema,
bo afipalamaasiisye ɨfyamba, fikʉfuuka ɨlyosi.
33 Ngʉmmwɨmbɨlaga ɄNTWA mbʉʉmi bwangʉ boosa.
Ngʉmmwɨmbɨlaga ɨmbaalo Kyala gwangʉ bo ndɨ mʉʉmi.
34 Ʉkwinogona kwangʉ kʉnkyelege ʉmwene,
namanga ʉlʉsekelo lwangʉ lukʉfuma kʉ NTWA.
35 Abatʉlanongwa bapyutigwe pakiisʉ,
ababiibi balɨngajangapo kangɨ.
Gwe ndumbula jangʉ, ʉntuufyege ɄNTWA!
Muntuufyege ɄNTWA!