Ʉkʉgwa ʉlʉpi kʉ booloolo bwa Kyala
Ʉlwɨmbo lwa Ndaabɨti.
103
Gwe ndumbula jangʉ, ʉntuufyege ɄNTWA!Fyosa ɨfi filɨ nkatɨ mmyangʉ,
fijɨpaalege ɨngamu jaake ɨnyiikemo.
2 Gwe ndumbula jangʉ, ʉntuufyege ɄNTWA!
Ʉngiibwaga ʉbooloolo bwake boosa.
3 Ikʉkʉswa ʉbʉtʉlanongwa bwako boosa,
ikʉkʉbʉmbʉlʉsya ʉbʉbine bwako boosa.
4 Ikʉkʉpoka ʉbʉʉmi bwako kʉ bʉfwe,
ikʉkʉfwɨka iipyana nɨ kɨsa, ʉkʉja ngɨga.
5 Jo ʉjʉ ikʉkʉpa ɨfinunu mbʉʉmi bwako boosa,
ʉkʉtɨ mbʉtubwa bwako ʉjege na maka bo ʉlwa ipʉʉla.
6 ɄNTWA ikʉlonga kʉ bʉgolofu,
ikʉbalwɨla aba bikʉboneligwa.
7 Aalɨnndɨngeenie Moose ɨnjɨla syake,
aabanangiisye aBanyaisilaɨli ɨmbombo syake.
8 ɄNTWA gwa kɨsa ni ipyana,
akaja mwengo ʉkʉkalala, gwa ipyana fiijo.
9 Atikʉtʉkemela kemela bwila,
kangɨ ɨngalalɨsi syake sitikʉjako bwila.
10 Atikʉtʉfunda ʉkʉfwana nɨ mbiibi syɨtʉ,
atikʉtʉbukɨsya ʉkʉfwana nʉ bʉtʉlanongwa bwɨtʉ.
11 Namanga muno ʉmpaalanga gʉjɨɨliile ʉbʉtali ʉkʉfuma pakiisʉ,
mo muno lɨjɨɨliile ʉbwingi iipyana lyake kʉlɨ aba bikʉntiila.
12 Bo ʉlʉ kʉbʉsookelo kʉlɨ patali na kʉbʉjongelo,
mo muno asibɨɨkiile kʉbʉtali ɨmbiibi syɨtʉ na nuuswe.
13 Bo muno taata ikʉbapaakɨsya abaanaake,
mo muno joope ɄNTWA ikʉbabonela ɨkɨsa aba bikʉntiila.
14 Namanga ʉmwene atʉmeenye muno twabʉmbɨliigwe,
ikʉkʉmbʉka ʉkʉtɨ ʉswe tʉlɨ lʉfumbɨ.
15 Ʉmundʉ amasikʉ gaake galɨ bo ʉlwa liisʉ,
ikʉbaalʉka bo ʉlwa bʉlenge.
16 Namanga ʉmbelo bo gukʉkula bukʉlagala,
bukʉsoosigwapo, bʉtikʉboneka kangɨ.
17 Looli iipyana lya NTWA lya bwila na bwila,
kʉlɨ boosa aba bikʉntiila,
nʉ booloolo bwake bʉliko kʉ sopelo syosa,
18 kʉlɨ boosa aba bikʉlʉkola ʉlwitɨkano lwake,
aba bikʉsikʉmbʉka ɨndagɨlo syake nʉ kʉsibombela.
19 ɄNTWA akɨbɨɨkile ɨkɨkota kyake ɨkya bʉtwa kʉmwanya,
ʉmwene jo ndagɨli gwa fyosa.
20 Mwe bandʉmi baake, muntuufyege ɄNTWA,
mwe baa maka, mwe mukʉbomba ɨsi alagiile,
mwe mukʉpɨlɨkɨsya ɨsi ikʉlagɨla nʉ kʉsikonga.
21 Mwe filʉndɨlo fyake, muntuufyege ɄNTWA,
mwe babombeli baake, mwe mukʉbomba ɨsi iiganile.
22 Mwe fipeligwa fyake fyosa, muntuufyege ɄNTWA,
muntuufyege poosa apa mulipo mbʉlagɨli bwake.
Gwe ndumbula jangʉ, ʉntuufyege ɄNTWA!