Ʉlwipuuto ʉlwa mundʉ ʉjʉ alɨ mbʉtolwe
Ʉlwipuuto lwa mundʉ ʉjʉ ikʉtaamigwa bo alɨ mbʉtolwe, ikʉnndɨlɨla ɄNTWA.
102
Gwe NTWA, ʉpɨlɨke ʉlwipuuto lwangʉ,ɨnguuto jangʉ jɨfikege kʉmyako.
2 Ʉlɨngiifisaga kʉbʉtali na niine,
pakabalɨlo akaa bʉtolwe!
Ʉtege ɨmbʉlʉkʉtʉ syako kʉmyangʉ,
ʉʉnyaamule mbɨmbɨbɨ bo ngʉkʉkoolela!
3 Amasikʉ gangʉ gikʉkɨnda bo ʉlwa lyosi,
ɨfifupa fyangʉ fikwaka bo ʉlwa nkala ʉgʉ gʉnyekile.
4 Ɨndumbula jangʉ jɨkomiigwe, bo ʉlwa liisʉ jɨkofwike,
ndikʉnyonywa nʉ kʉlya ɨfindʉ.
5 Ngandile, ɨfifupa fyangʉ fikʉboneka,
kʉnongwa jaa nguuto jangʉ.
6 Ndɨ bo ʉlwa njʉni ɨsya ndʉngalangala,
bo ʉlwa ngwitwa ɨjaa mfisaame.
7 Ngʉgona maaso ndɨ bo ʉlwa njʉni,
ɨjɨ jɨlɨ jeene pamwanya pa nyumba.
8 Iisikʉ lyosa abalʉgʉ bangʉ bikʉʉnyoobela,
bikʉbombela ɨngamu jangʉ ʉkʉbʉʉgɨɨlɨla abangɨ.
9 Ngʉlya ʉmfwandɨlo bo ʉlwa findʉ,
ngongaania amaasosi nɨ fya kʉnwa fyangʉ,
10 kʉnongwa jaa ngalalɨsi nʉ bʉkalale bwako,
fyobeene ʉʉnyeegile, ʉndaagile kʉbʉtali.
11 Amasikʉ gangʉ gikʉkɨnda bo ʉlwa nsyʉngʉʉlʉ gwa namajolo,
ʉne ngʉkofuka bo ʉlwa liisʉ.
ɄNTWA Kyala akaganile akaaja kaa mu Syoni
12 Looli ʉgwe, gwe NTWA,
ʉlɨ malafyale bwila na bwila,
abandʉ bikʉkʉtuufya mu sopelo syosa.
13 Jʉjʉʉgwe aakʉsumukaga,
nʉ kʉkapaakɨsya akaaja akaa mu Syoni,
namanga ko kabalɨlo kaa kʉkabonela ɨkɨsa,
akabalɨlo aka kaabaatɨkiigwe, kafikile.
14 Ababombeli baako bakaganile akaaja,
na paapo kapangʉliigwe.
Bikʉkabonela ɨkɨsa,
na paapo koonangiike loosa.
15 Ɨfikolo fyosa aafikʉjɨmɨkaga ɨngamu jaa NTWA,
abanyafyale boosa abaa pakiisʉ aabikʉbʉtiilaga ʉbʉsisya bwake.
16 ɄNTWA aikʉkajenga kangɨ akaaja akaa mu Syoni,
aikʉboneka muno ajɨɨliile ʉbʉsisya bwake.
17 Aikʉpɨlɨka ʉlwipuuto ʉlwa balondo,
atikwisa kʉlʉkaana ʉlwipuuto lwabo.
18 Ɨsopelo ɨjɨ jikwisa jikʉsimbɨligwa ɨsyo,
ʉkʉtɨ aba bakaalɨ ʉkʉpaapigwa biise bantuufyege ɄNTWA,
19 namanga ɄNTWA ʉkʉfuma pabʉjo bwake ʉbwikemo, akeetile paasi,
akɨkeetile ɨkiisʉ bo alɨ kʉmwanya,
20 ʉkʉtɨ apɨlɨke ɨnguuto jaa bapinyigwa,
abaabʉle aba balongiigwe ʉkʉgogigwa.
21 Abandʉ bajɨfumusyege ɨngamu jaa NTWA mu Syoni,
nɨ mbaalo syake mu Jelusalemu,
22 ɨfikolo bo fibʉngeene pamopeene,
na banyafyale bo biisile kʉkʉmmwipuuta ɄNTWA.
Ʉlwipuuto lwa ntubwa ʉmbine
23 Amalile amaka gangʉ bo ngaalɨ ndɨ ntubwa,
apimbwile amasikʉ gangʉ.
24 Po ngʉtɨ, “Gwe Kyala, ʉlɨngaanyeega lʉlʉʉlʉ,
ʉlɨngaasoosyapo bo ngaalɨ ndɨ ntubwa,
ʉgwe ʉliko bwila na bwila.
25 Kʉbwandɨlo jo ʉgwe gwapelile ɨkiisʉ,
ʉmpaalanga mbombo jaa maboko gaako.
26 Ɨfyo fikwisa kʉmalɨka, looli ʉgwe ʉliko amasikʉ goosa,
fyosa aafikwisa kʉkʉʉlʉpa bo ʉlwa mwenda.
Kwisa kʉfyandʉla bo ʉlwa mwenda,
fyope aafikwisa kʉmalɨka.a
27 Looli ʉgwe kʉja bo muno ʉjɨɨliile,
ɨfyɨnja fyako fitikʉmalɨka.
28 Abaana baa babombeli baako bikwisa kʉtʉʉgalangamo,
nkaaja akaa mu Syoni nʉ lʉtengaano,
ʉlʉjungu lwabo lukwisa kʉbaalaga.”