Ʉbʉtʉlanongwa bwa bandʉ
Kʉ mpaali gwa lwɨmbo. Ʉkʉkongana nʉ lʉbaatɨko ʉlwa Mahalati. Ʉlwɨmbo ʉlwa mahala ʉlwa Ndaabɨti.
53
Ʉnkonyofu ikʉjoba mu ndumbula ikʉtɨ,“Akajako Kyala.”
Boonangiike boosa, bikʉbomba ɨnyali,
akajako najʉmo ʉjʉ ikʉbomba ɨnunu.
2 Ʉkʉfuma kʉmwanya Kyala ikʉbakeeta abandʉ,
ʉkʉtɨ akeete lɨnga alipo jʉmo ʉgwa mahala,
ʉjʉ ikʉnndonda Kyala.
3 Abandʉ boosa balekile ʉkʉntiila Kyala,
boonangiike akajɨɨlo kaabo.
Akajako najʉmo ʉjʉ ikʉbomba ɨnunu,
akajako najʉmo.a
4 Bʉle, ababomba mbiibi batikʉsyagania?
Bikʉbalya abandʉ bangʉ ngatɨ fisyesye,
balekile ʉkʉmmwipuuta Kyala.
5 Aabikʉkoligwa nʉ lʉtende ʉlʉkʉlʉmba,
ʉlʉ bakalʉbonamo sikʉ.
Kyala aikʉnyambania ɨfifupa fya balʉgʉ bɨɨnu,
aabikʉsʉʉka namanga Kyala abakaanile.
6 Ngʉnyonywa bʉpoki bwa Isilaɨli lɨnga bwisaga,
ʉkʉfuma nkyamba Syoni!
Kyala bo ikʉbagomokesya ɨsajo abandʉ baake,
abaa ndʉjungu lwa Jaakobo aabikʉsekelaga,
aBanyaisilaɨli aabikʉhobokaga.