Ʉbʉlongi ni ipyana fya Kyala
Kʉ mpaali gwa lwɨmbo. Ʉlwɨmbo ʉlwa mahala ʉlwa Ndaabɨti, bo Ndoegi ʉMwetomu abʉʉkile kwa Saʉli kʉkʉmmbʉʉla ʉkʉtɨ Ndaabɨti abʉʉkile kʉkaaja kaa Ahimeleki.a
52
Gwe ngaasi ʉgwe, fiki kwituukɨfya ʉbʉbiibi bwako?Iipyana lya Kyala lɨlipo bwila.
2 Ʉlʉlɨmi lwako lukʉbaatɨka ɨsya loonangɨko,
lʉlɨ bo ʉlwembe ʉlʉʉgi, gwe nsyobi ʉgwe.
3 Ʉbʉganile ʉbʉbiibi ʉkʉkɨnda ʉbʉnunu,
ʉkʉjoba ɨsya bʉtʉngʉlʉ ʉkʉkɨnda ʉbwanalooli. Sela
4 Ʉsiganile syosa ɨsi sikʉbafulasya abandʉ,
ʉgwe gwe gwa lʉlɨmi ʉlwa bʉsyobi.
5 Looli Kyala aikʉkʉpyuta loosa,
aikʉkʉkola nʉ kʉkʉsoosyamo nnyumba jaako,
aikʉkʉnyukula nkiisʉ ɨkya bandʉ abʉʉmi. Sela
6 Abagolofu bikwisa kʉsibona ɨsyo nʉ kʉtiila,
po aabikʉkʉsekaga ʉgwe bikʉtɨgɨ,
7 “Namukeete ɨsi simmwagile ʉmundʉ ʉjʉ!
Akaaliiganile ʉkʉtɨ Kyala aje bʉponelo bwake.
Looli aasʉʉbɨlaga ʉbwingi ʉbwa kyʉma kyake,
aakabile amaka kʉ njɨla jaa kʉboonanga abandʉ.”
8 Leelo ʉne ndɨ bo ʉlwa nsyʉngʉtɨ,
ʉgʉ gʉmelile nnyumba jaa Kyala.
Ngʉsʉʉbɨla iipyana lya Kyala,
bwila na bwila.
9 Gwe Kyala, ngʉkʉgwɨlaga ʉlʉpi bwila,
kʉlɨ ɨsi ʉbombile.
Ngʉjɨsʉʉbɨlaga ɨngamu jaako paapo nunu,
nkyeni mbiikemo baako.