Ʉlwipuuto ʉlwa kʉsʉʉma ʉlʉhobokelo
Kʉ mpaali gwa lwɨmbo. Ʉlwɨmbo ʉlwa Ndaabɨti, bo ʉnkunguluka Natani ankemiile ʉkʉlogwa na Batiseba.a
51
Gwe Kyala, gʉʉmbaakɨsye,ʉkʉkongana ni ipyana lyako.
Goomole ʉbʉtʉlanongwa bwangʉ,
ʉkʉkongana nʉ bwingi bwa kɨsa kyako.
2 Ʉʉsuke loosa ɨmbiibi syangʉ,
ʉbʉtʉlanongwa bwangʉ ʉʉnyeelʉsye.
3 Namanga nsimeenye ɨmbiibi syangʉ,
ʉbʉtʉlanongwa bwangʉ bʉlɨ pabwelu bwila.
4 Ndʉlile ɨnongwa kʉmyako ʉgwe gwimwene,
mbombile ɨmbiibi nkyeni mmyako.
Ʉbʉlamuli bwako bʉgolofu,
ʉbʉlongi bwako bwa bwanalooli.b
5 Ndɨ nsobi ʉkʉfuma pa kʉpaapigwa kwangʉ,
ndɨ ntʉlanongwa ʉkʉfuma ndwanda lwa jʉʉba.
6 Looli ʉgwe gwikyeliile nʉ bwanalooli ʉbwa nkatɨ.
Kʉʉmanyisya ɨsya mahala nkatɨ mu ndumbula jangʉ.
7 Ʉʉmisɨle amɨɨsi, neelʉke.
Ʉʉsuke, nje mwelu swee.
8 Ʉʉnyiisʉsye ʉlʉsekelo nʉ kʉluluutɨla,
ʉʉhobosye kangɨ, ʉne ne gwalɨndakeenie.
9 Ʉsanuke, ʉlɨngakeetaga ʉbʉtʉlanongwa bwangʉ,
goomole ɨmbiibi syangʉ syosa.
10 Gwe Kyala, ʉmbele ʉkʉja nɨ ndumbula ɨnyeelu,
ʉjɨbɨɨke nkatɨ mmyangʉ ɨndumbula ɨmbya, ɨngake.
11 Ʉlɨngangaga nkyeni mmyako,
ʉlɨngansoosya Mbepo Mwikemo gwako.
12 Ʉʉngomokesye ʉlʉsekelo lwa bʉpoki bwako,
ʉmbepo ɨndumbula jaa kʉkʉtiila, jɨngasyege.
13 Po angʉbamanyisyaga abasobi ɨnjɨla syako,
abatʉlanongwa aabikʉgomokelako kʉmyako.
14 Gwe Kyala, ʉmboke kʉ mbiibi jaa bʉgogi,
ʉne angʉlaataga ʉkwɨmba ɨsya bʉgolofu bwako.
15 Gwe Ntwa, ʉndʉʉle ʉkʉjoba,
ʉndomo gwangʉ gʉfumusyege ɨnduufyo syako.
16 Ʉtikwikyela na makemo, ngalɨ ngʉsookiisye,
amakemo amookye ʉtikwikyela.
17 Gwe Kyala, iikemo lyangʉ kʉmyako,
jo ndumbula jangʉ ɨjaa lwijiisyo.
Gwe Kyala, ʉtikʉjɨkaana ɨndumbula ɨjɨ jɨpɨndwike.
18 Gwe Kyala, ʉje mooloolo kʉkaaja kaa mu Syoni,
ʉgajenge amamato gaa mu Jelusalemu.
19 Po aakwikyelaga na makemo agaa bʉgolofu,
na makemo agaa kʉbooligwa na mookye.
Po aabikʉsoosyaga ɨngambakʉ syabo,
ʉkʉja ikemo, pamwanya pa kɨgemo kyako.