Ʉlwipuuto lwa nalooli
Ʉlwɨmbo ʉlwa Asafu.
50
Kyala ʉNkʉlʉmba ikʉjoba,ɄNTWA ikʉbakoolela abandʉ abaa pakiisʉ,
ʉkʉfuma kʉbʉsookelo mpaka kʉbʉjongelo.
2 Ʉkʉfuma nkyamba Syoni,
nkaaja akanunu fiijo,
Kyala ikʉlangala.
3 Kyala gwɨtʉ atikwisa kɨmyemye,
gukʉntalɨlapo ʉmooto ʉgʉ gukookya,
nʉ mbelo ʉnkalɨ gukʉnsyʉngʉʉtɨla.
4 Ikʉkoolela ʉmpaalanga nɨ kiisʉ,
ʉkʉtɨ fikeetege bo ikʉbalonga abandʉ baake.a
5 Ikʉtɨ, “Muumbʉngaanikɨsye aba bikʉndiila ʉne,
aba bafingile na niine ʉlwitɨkano,
kwi ikemo ɨlyokye.”b
6 Ʉmpaalanga gukʉfumusya ʉbʉgolofu bwake,
namanga Kyala jʉʉjo jo ndongi. Sela
Kyala ikʉtɨ,
7 “Pɨlɨkɨsya, mwe bandʉ bangʉ ɨsi ngʉjoba,
ndɨ nasyo ɨsya kʉjoba na nungwe Isilaɨli,
ʉne ne Kyala, kangɨ ne Kyala gwako.
8 Ndikʉkʉkemela kʉnongwa jaa makemo gaako,
amakemo amookye kʉndwalɨla bwila.
9 Ndikwambɨlɨla ɨngambakʉ ɨjaa nnyumba jaako,
joope nɨ mbene ɨjaa nkɨbaga kyako.
10 Ɨfinyamaana fyosa ɨfya ndiisʉ fyangʉ,
nɨ ngʼombe ɨsya mfyamba fyosa.
11 Ɨnjʉni syosa ɨsya mmatengele syangʉ,
ʉtʉndʉ toosa ʉtʉʉmi mmigʉnda twangʉ.
12 Lɨnga najangamo nɨ njala, ngakʉbʉʉlaga ʉgwe,
namanga ɨkiisʉ na ʉtʉ tʉlimo toosa twangʉ.
13 Bʉle, kʉtɨ ngʉlya ɨnyama jaa ngambakʉ?
Bʉle, kʉtɨ ngʉnwa iilopa lya mbene?
14 Ʉʉsookesyege iikemo ɨlya kʉʉngwɨla ʉlʉpi,
ɨsi ʉfingile kwa Kyala ʉNkʉlʉmba, ʉsibombege.
15 Ʉngoolelege pi isikʉ ɨlya bʉtolwe,
angʉkʉpoka, po aakʉnduufyaga.”
16 Looli Kyala ikʉmmbʉʉla ʉmbiibi, ikʉtɨ,
“Fiki kʉsijoba joba ɨndagɨlo syangʉ?
Fiki kʉjoba joba ɨsya lwitɨkano lwangʉ?
17 Namanga ʉgwe kʉkaana ʉkʉsokigwa,
na masyʉ gangʉ ʉkiigana ʉkʉgakonga.
18 Lɨnga gʉmmbwene ʉnhɨɨji, kʉmanyana nagwe,
abalogwe, kʉlɨɨlanila nabo.
19 Ʉndomo gwako gukʉjoba ɨmbiibi,
ʉlʉlɨmi lwako lwengo ʉkʉtʉngʉlʉpa.
20 Kʉtʉʉgala nʉ kʉnheeha ʉnkamugo,
ʉjʉ mulɨ nna jʉmo, kʉntʉngʉlʉpɨla.
21 Ʉbombile ɨsyo syosa, ʉne ndɨ kɨmyemye.
Bʉle, kʉtɨ ʉne ndɨ bo ʉgwe?
Looli ʉlʉ ngʉkʉkemela,
ngʉʉmana pabwelu.”
22 “Gwe kʉmmwibwa Kyala, ʉsimanye ɨsi,
angʉkʉnyaafulania, atikʉjako ʉgwa kʉkʉpoka.
23 Ʉjʉ ikʉsoosya ɨfya kʉʉngwɨla ʉlʉpi,
ʉjo ikʉʉnyɨɨmɨka ʉne.
Gwesa ʉjʉ ikwenda mu njɨla ɨngolofu,
ʉjo ʉne angʉmpoka.”