Bʉkonyofu ʉkʉsʉʉbɨla ʉbʉkabi
Kʉ mpaali gwa lwɨmbo. Ʉlwɨmbo ʉlwa Banya Koola.
49
Mwe baa mfikolo fyosa, namupɨlɨke ɨsi,mwesa mwe bandʉ baa pakiisʉ, namupɨlɨkɨsye.
2 Mwe bakʉlʉmba na mwe banandɨ, mupɨlɨkɨsye mwesa,
nuumwe mwe bakabi na mwe balondo.
3 Amasyʉ gangʉ gikʉja gaa mahala,
ɨnyiinogono syangʉ sikʉmanyisya ɨnunu.
4 Ngʉpɨlɨkɨsya kanunu ɨsya mbʉpɨngamu,
bo ngʉkʉba iipango, ngʉsilɨngaaniaga.
5 Fiki ndiilege bo ʉbʉtolwe bukwisa?
Fiki ndiilege bo abasyobi baasyʉngʉʉtiile?
6 Abasyobi abo bikʉsʉʉbɨla ɨkyʉma kyabo,
bikwituukɨfya ʉbʉkabi bwabo ʉbwingi.
7 Akajako ʉmundʉ ʉjʉ abagiile ʉkʉnhomba Kyala,
ʉntengo gwa bʉʉmi bwa nnine,
ʉntengo ʉgwa kʉmpoka kʉ bʉfwe.
8 Namanga ʉntengo gwa bʉʉmi nnywamu fiijo.
Kɨkajako ɨkyʉma ɨkɨ kɨbagiile ʉkʉfwana,
9 ʉkʉtɨ ʉmundʉ aje mʉʉmi bwila na bwila,
alɨngafwamo sikʉ.
10 Boosa bameenye ʉkʉtɨ abaa mahala bikʉfwa,
abakonyofu na balema bo lʉlʉʉlo.
Boosa bikʉbalekela ɨkyʉma kyabo abangɨ.
11 Amapʉmba gaabo sikʉja syo nyumba syabo bwila na bwila,
bʉjo bwabo amasikʉ goosa,
na paapo biibonaga ʉkʉja bandʉ bakʉlʉmba fiijo.
12 Looli ʉmundʉ atikʉjaga nʉ lwɨmɨko bwila,
ikʉfwaga itolo bo ʉlwa finyamaana.
13 Ɨsyo syo ɨsi sikʉbaaga aba bikwisʉʉbɨla,
pamopeene na aba bikʉsikonga ɨnongwa sya bandʉ abo. Sela
14 Balɨ bo ʉlwa ngʼoosi ɨsi sibɨɨkɨliigwe ʉkʉgogigwa,
bikʉfwa nʉ kʉsyɨligwa.
Nʉlʉbʉnjʉ abagolofu bikʉlagɨlaga pamwanya pamyabo,
ɨmibɨlɨ gyabo bo gikʉbola mmapʉmba,
kʉbʉtali nɨ nyumba syabo ɨnunu.
15 Looli Kyala aikʉʉnyaabʉla ʉkʉfuma kʉ bʉsyʉka,
namanga ikwisa kʉʉnyambɨlɨla. Sela
16 Ʉlɨngapaasyaga lɨnga ʉmundʉ ikʉja nkabi,
na lɨnga ɨkyʉma kyake kikongelapo fiijo.
17 Namanga bo ikʉfwa atikwisa kwegapo nakamo,
atikwisa kʉsuluka nako nakamo.
18 Na paapo aapeeliigwe ɨsajo ɨnyingi,
nʉ kʉtuufigwa ʉkʉtɨ anogile,
19 looli ikwisa kʉfwa bo ʉlwa biisʉkʉlʉ baake,
aba bakabagɨla sikʉ ʉkʉlʉbona ʉlʉmuli.
20 Ʉmundʉ ʉmwɨmɨkigwa ʉnsita mahala,
ikʉfwa itolo bo ʉlwa kɨnyamaana.